திருவள்ளூர், செப். 24–
திருவள்ளூர் புங்கத்தூரில் உள்ள தமிழ்நாடு நுகர்பொருள் வாணிபக் கழக அரிசி குடோனில் இருந்து பரவி வரும் வண்டுகளால், சுற்றுவட்டாரப் பகுதிகளில் வசிக்கும் பொதுமக்கள் கடந்த மூன்று மாதங்களாக கடும் அவதிக்குள்ளாகி வருவதாகப் புகார் எழுந்துள்ளது. பலமுறை புகார் அளித்தும் நடவடிக்கை இல்லை எனக் கூறி, குடோன் அலுவலகத்தை பொதுமக்கள் முற்றுகையிட்டு அதிகாரிகளிடம் கோரிக்கை மனு அளித்தனர். திருவள்ளூர் நகராட்சி 12-வது வார்டுக்கு உட்பட்ட பத்தியால் பேட்டை, கண்ணதாசன் நகர், மகாவீர் அவென்யூ, ஜெய் நகர், ஜெயா நகர் உள்ளிட்ட பகுதிகளில் வண்டுகளின் தொல்லை அதிகரித்துள்ளதாக அப்பகுதி மக்கள் தெரிவித்துள்ளனர்.
அரிசி குடோனில் இருந்து பரவும் சிறு வண்டுகள் வீடுகள் முழுவதும் நிறைந்து காணப்படுவதாகவும், இரவு நேரங்களில் குழந்தை கள் மற்றும் பெரியவர்களின் காதுகளில் வண்டுகள் நுழைந்து பாதிப்பை ஏற்படுத்துவதாகவும் பொதுமக்கள் புகார் தெரிவித்துள்ளனர்.
மேலும், வீடுகளில் உள்ள உணவுப் பொருட்களில் வண்டுகள் நிறைந்து காணப்படுவதால், உணவைப் பாதுகாப்பாகப் பயன்படுத்த முடியாத நிலை ஏற்பட்டுள்ளதாகவும் கூறப்படுகிறது. துர்நாற்றம், உடல் அரிப்பு உள்ளிட்ட உடல் உபாதைகளும் ஏற்படுவதாக மக்கள் குற்றம்சாட்டி யுள்ளனர். சுமார் ஒரு கிலோ மீட்டர் சுற்றளவில் வண்டுகளின் பாதிப்பு இருப்பதாகத் தெரிவிக்கும் பொதுமக்கள், இப்பிரச்சினைக்கு நிரந்தரத் தீர்வு காண வேண்டும் என வலியுறுத்தியுள்ளனர். இதுதொடர்பாக குடோன் நிர்வாகத்திடம் நேரிலும், தொலைபேசி வாயிலாகவும் பலமுறை புகார்கள் அளித்தும், இதுவரை உரிய நடவடிக்கை எடுக்கப்படவில்லை என அப்பகுதி மக்கள் தெரிவித்தனர்.
இதையடுத்து, திருவள்ளூர் நகர்மன்ற திமுக உறுப்பினர் ராஜ்குமார் என்கிற தாமஸ் மற்றும் அப்பகுதி பொதுமக்கள் இணைந்து தமிழ்நாடு நுகர்பொருள் வாணிபக் கழக அலுவலகத்தை முற்றுகையிட்டனர். தொடர்ந்து, தர ஆய்வாளர் ஆர். மாதவனிடம் கோரிக்கை மனு அளிக்கப்பட்டது. அதில், பொதுமக்களின் உடல்நலனைப் பாதிக்கும் வண்டுகளை முற்றிலும் ஒழிக்க உடனடியாக நடவடிக்கை எடுக்க வேண்டும் என வலியுறுத்தப்பட்டது. முற்றுகை யின்போது, த.வெ.க. ஆட்சி அமைந்த பிறகு கடந்த மூன்று மாதங்களாக வண்டுகளை ஒழிப்பதற்கான மருந்து வரவில்லை என அதிகாரிகள் தெரிவித்ததாக பொதுமக்கள் கூறினர். இதனால், வண்டுகளை கட்டுப்படுத்துவதற்கான நடவடிக்கைகள் தாமதமடைந்துள்ளதாகக் கூறப்படும் நிலையில், பொதுமக்களின் சுகாதாரப் பிரச்சினையில் அரசு நிர்வாகம் உரிய கவனம் செலுத்த வேண்டும் என மக்கள் வலியுறுத்தினர்.
பொதுமக்களின் புகார் தொடர்பாக ஒரு வாரத்திற்குள் வண்டுகளை ஒழிக்க நடவடிக்கை எடுக்கப்படும் என அதிகாரிகள் உறுதி அளித்ததாகத் தெரிவிக்கப்பட்டது. அதிகாரிகள் அளித்த உறுதியைத் தொடர்ந்து தற்போது கலைந்து செல்வதாகவும், குறிப்பிட்ட காலத்திற்குள் நடவடிக்கை எடுக்கப்படாவிட்டால் பொதுமக்களைத் திரட்டி மிகப்பெரிய போராட்டம் நடத்தப்படும் என்றும் பாதிக்கப்பட்ட மக்கள் எச்சரித்தனர்.