புதுடெல்லி, செப். 24 –
இந்திய தேர்தல் ஆணையத்தின் தன்னிச்சையான நடவடிக்கைகளுக்கு எதிர்ப்பு தெரிவித்து இரண்டு தேர்தல் ஆணையர்கள் போர்க்கொடி தூக்கியுள்ளது பெரும் பரபரப்பை ஏற்படுத்தியுள்ளது. நாட்டின் ஜனநாயக தூணாக விளங்கும் தலைமை தேர்தல் ஆணையத்தில் தலைமை தேர்தல் ஆணையர் மற்றும் இரண்டு தேர்தல் ஆணையர்கள் சம அந்தஸ்துடன் செயல்பட்டு வருகின்றனர். கடந்த 2023ம் ஆண்டு சட்ட விதிகளின்படி, ஆணையத்தின் அனைத்து முக்கிய முடிவுகளும் ஒருமனதாக அல்லது பெரும்பான்மை அடிப்படையில் மட்டுமே முறைப்படி எடுக்கப்பட வேண்டும் என்ற கட்டாயம் உள்ளது. இதற்கிடையே, கடந்த 2025ம் ஆண்டு ஜூன் மாதம் பீகாரில் தொடங்கப்பட்ட வாக்காளர் பட்டியல் சிறப்பு தீவிர திருத்தப் பணி (எஸ்ஐஆர்) நாடு முழுவதும் 30 மாநிலங்கள் மற்றும் யூனியன் பிரதேசங்களில் தீவிரமாக விரிவுபடுத்தப்பட்டது.
இந்த நடவடிக்கையின் மூலமாக, சுமார் 13 கோடி வாக்காளர்களின் பெயர்கள் வரைவு வாக்காளர் பட்டியலிலிருந்து அதிரடியாக நீக்கப்பட்டன. இது ஜனநாயக அமைப்புகள் மற்றும் பொதுமக்கள் மத்தியில் தங்களுக்கு வாக்களிக்கும் உரிமை பறிக்கப்படுகிறதோ என்ற கடுமையான சந்தேகத்தையும் பெரும் விவாதத்தையும் ஏற்படுத்தி இருந்தது. இந்நிலையில், தலைமை தேர்தல் ஆணையர் ஞானேஷ் குமார் தலைமையிலான நிர்வாகம் எடுத்து வரும் முடிவுகளுக்கு எதிராக, மற்ற இரண்டு தேர்தல் ஆணையர்களான சுக்பீர் சிங் சந்து மற்றும் விவேக் ஜோஷி ஆகியோர் கடந்த 10 மாதங்களில் 14 முறை எழுத்துப்பூர்வமாக கடும் எதிர்ப்பை பதிவு செய்துள்ள அதிரடி தகவல்கள் தற்போது அம்பலமாகியுள்ளன.
புதிய வாக்காளர் சேர்க்கைக்கான படிவம் 6ல் ஒன்றிய அரசு விதிகளில் திருத்தம் செய்யாமல் சட்டவிரோதமாக புதிய நிபந்தனைகளை சேர்த்தது, கள அளவில் செயல்படும் வாக்காளர் பதிவு அதிகாரிகளின் அதிகாரங்களை பறித்து தேர்தல் ஆணைய கம்ப்யூட்டர் இணையதளத்தை டெல்லியில் இருந்து முழுமையாக கட்டுப்படுத்த முயன்றது உள்ளிட்ட பல்வேறு விவகாரங்களை அவர்கள் சுட்டிக்காட்டியுள்ளனர். இதுகுறித்து ஆணையக் கூட்டத்தில் முறையிட்ட சுக்பீர் சிங் சந்து, ‘எங்களுக்கு தெரிவிக்காமல் மேற்கொள்ளப்பட்ட இந்த தன்னிச்சையான நடவடிக்கைகள் சட்டவிரோதமானவை’ என்று காட்டமாக எச்சரித்ததோடு, ஒன்றிய அமைச்சரவை செயலாளருக்கும் தனித்தனியாக கடிதம் அனுப்பி தங்கள் எதிர்ப்பை பதிவு செய்துள்ளனர்.
குறிப்பாக, மேற்குவங்கத்தில் நீதிமன்ற அதிகாரிகள் (நீதிபதிகள்) வாக்காளர் பட்டியலில் சேர்த்த வாக்காளர்களுக்கு எதிராக தேர்தல் ஆணையத்தின் சார்பில் யாருடைய அனுமதியுடன் மேல்முறையீடு செய்யப்பட்டது என்பது குறித்தும், உச்சநீதிமன்ற உத்தரவு இருந்தும் மென்பொருள் (தேர்தல் ஆணைய சாப்ட்வேர்) கோளாறால் கோவாவில் 97 தகுதியான வாக்காளர்கள் நீக்கப்பட்ட விவகாரத்திலும் ஆணையர்கள் கடும் அதிருப்தி அடைந்துள்ளனர். இந்த அடுக்கடுக்கான புகார்கள் மற்றும் கடந்த 9ம் தேதி நடந்த ஆலோசனை தொடர்பாக தேர்தல் ஆணையத்திடம் விளக்கம் கேட்டும் இதுவரை எந்த பதிலும் அளிக்கப்படவில்லை. அரசமைப்புச் சட்டத்தின் 324வது பிரிவை நிலைநிறுத்த வேண்டிய ஒரு தன்னாட்சி அமைப்பிற்குள், பெரும்பான்மை ஆணையர்களின் கருத்துகளை புறந்தள்ளிவிட்டு தன்னிச்சையாக முடிவுகள் எடுக்கப்படுவது தேர்தல் நடைமுறையின் வெளிப்படைத்தன்மைக்கே பெரும் அச்சுறுத்தலாக மாறியுள்ள நிலையில், இதற்கு முறையான தீர்வு காணப்பட வேண்டும் என்ற கோரிக்கையும் எழுந்துள்ளது.
தேர்தல் ஆணையத்தின் கட்டமைப்பு மற்றும் 2023 சட்டம் சொல்வது என்ன?
இந்திய அரசியலமைப்புச் சட்டத்தின் 324-வது பிரிவின்படி தேர்தல் ஆணையம் செயல்படுகிறது. இதில் தலைமைத் தேர்தல் ஆணையர் ஒருவரும், இரண்டு தேர்தல் ஆணையர்களும் இருப்பார்கள். சட்டப்படி மூவருமே சமமான அந்தஸ்து கொண்டவர்கள்.. தலைமைத் தேர்தல் ஆணையர் என்பவர் சமமான பவர் கொண்டவர்களில் முதன்மையானவர் மட்டுமே தவிர, தனிச்சையாக சர்வாதிகார முடிவுகளை எடுக்க அவருக்கு அதிகாரம் கிடையாது.
2023 ஆம் ஆண்டு கொண்டுவரப்பட்ட தலைமைத் தேர்தல் ஆணையர் மற்றும் பிற தேர்தல் ஆணையர்கள் நியமனச் சட்டத்தின் பிரிவு 18-ன் படி:
1. ஆணையத்தின் அனைத்து அலுவல்சார் நடவடிக்கைகளும், முடிவுகளும் முடிந்தவரை ஒருமனதாகவே எடுக்கப்பட வேண்டும்.
2. ஒருவேளை கருத்து வேறுபாடு ஏற்பட்டால், பெரும்பான்மை உறுப்பினர்களின் கருத்தின் அடிப்படையிலேயே முடிவு செய்யப்பட வேண்டும்.
3. ஆணையத்தின் செயல்பாட்டு விதிகள் மற்றும் வேலைப் பகிர்வுகளை மாற்றியமைக்க வேண்டும் என்றாலும், அதற்கு மூன்று ஆணையர்களின் ஒருமனதான ஒப்புதல் அவசியம்.
ஆனால், இந்த விதிகள் மீறப்படுவதாக ஏப்ரல் 16 அன்று சுக்பீர் சிங் சாந்து அதிகாரிகளுக்குக் கடிதம் எழுதினார். அதில், தேர்தல் ஆணையத்தின் 3 அதிகாரிகளின் ஒருமித்த ஒப்புதல் இன்றியே பல சுற்றறிக்கைகளும் உத்தரவுகளும் ஆணையத்தின் பெயரில் வெளியிடப்பட்டு வருவதாகக் குற்றம் சாட்டினார். அடுத்த எட்டு நாட்களில், ஏப்ரல் 24 அன்று விவேக் ஜோஷியும் இதே விவகாரத்தை எழுப்பி, அரசியலமைப்புப் பிரிவு 324 மற்றும் 2023 சட்ட விதிகளின்படி ஆணையத்தின் முழு ஒப்புதல் இல்லாமல் எந்த அறிவிப்பும் வெளியாகக் கூடாது என்று கண்டிப்புடன் தெரிவித்தார்.
இரண்டு ஆணையர்கள் எழுப்பிய
4 முக்கியப் புகார்கள்!
ஆணையர்கள் சாந்து மற்றும் ஜோஷி எழுப்பிய 14 ஆட்சேபனைகளும் தேர்தல் ஆணையத்தின் மிக முக்கியமான நான்கு அடிப்படைப் பணிகளை மையமாகக் கொண்டுள்ளன.
அரசியலமைப்புச் சட்டத்தின்படி நியமிக்கப்பட்ட மூன்று தேர்தல் ஆணையர்களில், பெரும்பான்மை யான இரண்டு ஆணையர்களின் கருத்துகள் புறக்கணிக்கப்பட்டு, தன்னிச்சையாக முடிவுகள் எடுக் கப்பட்டு வந்ததாக எழுந்துள்ள இந்தக் குற்றச்சாட்டுகள், இந்திய ஜனநாயகத்தின் தூணாக விளங் கும் தேர்தல் ஆணையத்தின் நடு நிலைமை மீது மிகப்பெரிய கேள்வி களை எழுப்பி உள்ளன. தேர்தல் ஆணைய வட்டாரங்கள் அனைத்து முடிவுகளும் ஒருமனதாகவே எடுக்கப்பட்டு வருவதாக வெளியே செய்திகள் வந்தாலும்.. அவை எல்லாம் பொய் என்பது தற்போது தெரிய வந்துள்ளது. இந்த கடிதங்கள் மூலம் தேர்தல் ஆணையத்தில் ஆல் இஸ் நாட் வெல்என்பது தெரிய வந்துள்ளது!