கிருஷ்ணகிரி, செப்.24-–-
கிருஷ்ணகிரி அரசு பள்ளியில் காலை உணவுத் திட்ட விரிவாக்கத்தில் குளறுபடி ஏற்பட்டது. இதனால் ஓட்டல்களில் மாணவிகளுக்கு சாப்பாடு வாங்கி கொடுத்த அவலம் நடந்தது.
காலை உணவுத்திட்டம்
தமிழ்நாடு முழுவதும் உள்ள அரசு, அரசு உதவிபெறும் தொடக்கப்பள்ளிகளில் காலை உணவுத் திட்டம் விரிவாக்க விழா நேற்று நடந்தது.
சென்னையில் முதல்- அமைச்சர் விஜய் தொடங்கி வைத்ததுடன், அந்தந்த மாவட்டங்களில் அமைச்சர்கள், மாவட்ட கலெக்டர்கள் தொடங்கி வைத்தனர்.
கிருஷ்ணகிரியில்...
கிருஷ்ணகிரி அரசு மகளிர் மேல்நிலைப்பள்ளியில் காலை உணவுத் திட்டம் தொடக்க விழா நேற்று முன்தினம் நடந்தது. மொத்தம் 430 மாணவிகளுக்கு உணவு வழங்க ஏற்பாடு செய்யப்பட்டது. முகுந்தன் எம்.எல்.ஏ. முன்னிலையில் கலெக்டர் தினேஷ்குமார் இந்த திட்டத்தை தொடங்கி வைத்தார். 2 குழுக்களாக மாணவிகள் பிரித்து அமர வைக்கப்பட்டனர். கலெக்டர் தொடங்கி வைக்கும்போது முதல் குழுவான 250 மாணவிகளுக்கு வெண்பொங்கல், காய்கறி சாம்பார் மற்றும் இனிப்பு பொங்கல் வழங்கப்பட்டது. அந்த உணவும் மாணவிகளுக்கு போதுமானதாக இல்லையாம். தொடர்ந்து 2-வது குழுவுக்கு உணவு வழங்க ஊழியர்கள் தயாரானார்கள். ஆனால் அங்கு உணவு இல்லை. எனவே சுமார் 200-க்கும் மேற்பட்ட மாணவிகள் தட்டுடன் காத்திருந்தனர். பசியால் அந்த மாணவிகள் கடும் சிர மத்தை சந்தித்தனர்.
ஓட்டல் சாப்பாடு
கலெக்டர் மற்றும் கல்வித் துறை அதிகாரிகள் அங்கிருந்து சென்று விட்டனர். அதன்பிறகு உணவு கிடைக்காத மாணவிகளுக்கு பள்ளிக்கூட ஆசிரியர்களே சாப்பாடு கொடுக்க ஏற்பாடு செய்தனர். கிருஷ்ணகிரியில் உள்ள ஓட்டல், ஓட்டலாக சென்று 200-க்கும் மேற்பட்ட மாணவிகளுக்கு சாப்பாடு வாங்கும் அவலம் நடந்தது.
அப்போது ஓட்டல் நிர்வாகத்திடம் என்ன சாப்பாடு இருக்கிறதோ, அதனை தாருங்கள் என்று வாங்கினர். அதாவது இட்லி, தோசை, பூரி, பொங்கல் என என்ன இருக்கிறதோ அதனை வாங்கி மாணவிகளுக்கு கொடுத்தனர். அப்படி இருந்தும் மாணவிகளுக்கு உணவு கொடுக்க 10.30 மணி ஆகிவிட்டதாம். இதனால் பெற்றோர் கடும் அதிர்ச்சி அடைந்தனர். காலை உணவத் திட்ட விரிவாக்கத்தில் முதல் நாளிலேயே குளறுபடி ஏற்பட்டுள்ளது மாணவிகள், பெற்றோர் மத்தியில் அதிருப்தியை ஏற்படுத்தியது.