திருவள்ளூர், செப். 25:
திருவள்ளூர் மாவட்டம், கடம்பத்தூர் ஒன்றியம், கொட்டையூர் ஊராட்சியில் உள்ள அரசு நடுநிலைப் பள்ளியில் மாணவ–மாணவிகளுக்கு வழங்கப்பட்ட காலை உணவில் பல்லி விழுந்ததாக எழுந்துள்ள புகார் பெரும் அதிர்ச்சியை ஏற்படுத்தியுள்ளது.
இந்த உணவை உட்கொண்ட 40 மாணவ–மாணவிகள் 108 ஆம்புலன்ஸ் வாகனத்தில் அழைத்துச் செல்லப்பட்டு திருவள்ளூர் அரசு மருத்துவமனையில் சிகிச்சை மேற்கொண்டு வருகின்றனர்
இச்சம்பவம் மாணவர்களின் பெற்றோர்கள் மத்தியில் கடும் அச்சத்தையும் அதிருப்தியையும் ஏற்படுத்தியுள்ளது.
பள்ளிக் குழந்தைகளுக்கு வழங்கப்படும் உணவு பாதுகாப்பானதாகவும், சுகாதாரமானதாகவும் இருப்பதை உறுதி செய்ய வேண்டியது அரசின் முக்கியப் பொறுப்பாகும். ஆனால், மாணவர்களுக்கு வழங்கப்பட்ட காலை உணவில் பல்லி விழுந்ததாக புகார் எழும் அளவுக்கு கண்காணிப்பு எப்படி இருந்தது? கண்காணிப்பு அதிகாரிகள் என்ன செய்து கொண்டிருந்தனர்? என்ற கேள்விகள் எழுந்துள்ளன.
அரசுப் பள்ளி மாணவர்களுக்கான காலை உணவுத் திட்டம் செப்டம்பர் 22ஆம் தேதி விரிவுபடுத்தப்பட்டு, ‘காமராஜர் காலை உணவுத் திட்டம்’ என்ற பெயரில் ரீல்ஸ் முதலமைச்சர் தொட ங்கி வைத்தார் நிலையில், திட்டம் தொடங்கிய சில நாட்களிலேயே உணவின் தரம் மற்றும் சுகாதாரம் குறித்து இத்தகைய புகார் எழுந்திருப்பது பெற்றோர்கள் மத்தியில் கவலையை ஏற்படுத்தியுள்ளது.
குழந்தைகளுக்கு வழங்கப்படும் உணவு தரமானதா, சுகாதாரமானதா, பாதுகாப்பானதா என்பதை உறுதி செய்வதில் த.வெ.க. அரசு ஏன் கோட்டை விட்டது? என்று பெற்றோர்கள் கேள்வி எழுப்புகின்றனர்.
குழந்தைகளுக்கு வழங்கப்படும் உணவின் தரத்தைக் கூட முறையாக உறுதி செய்ய முடியாத நிலையில், விளம்பரங்களிலும் விழாக்களிலும் திட்டங்களைப் பெருமைப்படுத்துவதால் மட்டும் என்ன பயன்? என்ற கேள்வி பெற்றோர்கள் மத்தியில் எழுந்துள்ளது.
இந்தப் புகார் தொடர்பாக முழுமையான விசாரணை நடத்தி, உணவு தயாரிக்கப்பட்ட இடம் முதல் மாணவர்களுக்கு வழங்கப்பட்ட வரையிலான அனைத்து நிலைகளிலும் உரிய ஆய்வு மேற்கொள்ள வேண்டும். விசாரணையில் தவறு உறுதி செய்யப்பட்டால், அதற்குப் பொறுப்பானவர்கள் மீது கடும் நடவடிக்கை எடுக்க வேண்டும்.
பள்ளிக் குழந்தைகளின் உணவு விஷயத்தில் அலட்சியத்திற்கோ, அதிகாரிகளின் மெத்தனத்திற்கோ இடமளிக்காமல், த.வெ.க. அரசு இனியாவது விழித்துக்கொண்டு செயல்படுமா? என்பதே பெற்றோர்கள் மற்றும் பொதுமக்களின் கேள்வியாக உள்ளது.