திருப்பூர், செப்.25–
திருப்பூர் மாவட்டம் தாராபுரம் தொகுதியில் நேற்றுகாலை நடைபெற்ற செங்கோட்டையன், அருண்ராஜ் உள்ளிட்ட 7 அமைச்சர்கள் பங்கேற்ற தேர்தல் பரப்புரைக் கலந்தாய்வுக் கூட்டத்தின் போது மின் தடை ஏற்பட்டிருக்கிறது. தமிழ்நாடு முழுவதும் அறிவிக்கப்படாத மின்வெட்டும், அடிக்கடி ஏற்படும் மின் தடைகளும் அதிகரித்து வருகிறது.
தமிழ்நாட்டில் அங்கொன்றும் இங்கொன்றுமாகத் தலைதூக்கிய மின்வெட்டு, தற்போது மாநிலம்முழுவதும் பற்றிக்கொண்டிருக்கிறது என்றும் இதன் தாக்கம், வீடுகளைத் தாண்டி விவசாயம், சிறு, குறு தொழில்களிலும் எதிரொலித்திருக்கிறது என்றும் குறிப்பிட்டுள்ளது. மின்வெட்டால் வீடுகளுக்குள் புழுக்கத்தில் உழன்ற மக்கள், தெருவில் இறங்கிப் போராடும் நிகழ்வுகளும் அரங்கேறிவருகின்றன என்று ஆனந்த விகடன் விமர்சித்துள்ளது.
தலைநகர் சென்னையில் அறிவிக்கப்படாத மின்வெட்டுகாரணமாக பொது மக்கள் சாலையில் இறங்கியும், மின்வாரிய அலுவலகத்தை முற்றுகையிட்டும் போராட்டம் நடத்துகின்றனர் என்றும் சென்னை புறநகர்ப் பகுதிகளிலும் காலை 9 மணி முதல் மாலை 5 மணி வரை மின்தடை செய்யப்படுகிறது என்றும் ஆனந்த விகடன் குறிப்
பிட்டுள்ளது. கோவை மாவட்டத்தில் ஒரு நாளைக்குப் பத்து முறைக்கும் மேல் மின் நிறுத்தம் செய்யப்படுகிறது. அதிகபட்சம் ஒரு மணி நேரம் முதல் இரண்டு மணி நேரம் வரை மின்தடை ஏற்படுகிறது.
ஓசூர் பகுதியில் சிறு, குறு தொழில் நிறுவனங்கள் மிகவும் பாதிக்கப்பட்டுவருகின்றன. சேலம் மாவட்டத்தில் மின்தடையால் தறிகளில் நெய்யப்பட்டுக் கொண்டிருக்கும் துணிகள் சேதமடைவதோடு, தொழிலாளர்களின் அன்றாடக் கூலியும் பறிபோகிறது. திருப்பூர் மாவட்டத்தில், ஆடை உற்பத்தி, வணிக நிறுவனங்கள் மற்றும் பொதுமக்களின் இயல்பு வாழ்க்கை பெருமளவில் பாதிக்கப்பட்டுள்ளன.
தொழில் நகரமான கோவில்பட்டியில் மின்தடையால் தீக்குச்சித் தொழில், கடலைமிட்டாய் தயாரிப்பு போன்ற குடிசைத் தொழில்களும் பாதிக்கப்பட்டுள்ளன.
மதுரையைச் சுற்றியுள்ள கிராமங்களில் ஒரு மணி நேரத்துக்கு ஒரு முறை 15 நிமிடங்கள் மின்தடை ஏற்படுகிறது.
இரவு நேரங்களில் இரண்டு முதல் ஐந்து மணி நேரம் வரை மின் தடைஏற்படுகிறது. மானாவாரி விவசாயம் நடக்கும் தருமபுரி மாவட்டத்தில், தண்ணீரைப் பணம் கொடுத்து வாங்கும் சூழலுக்குத் தள்ளப்பட்டிருக்கிறார்கள்.
தேனி மாவட்டத்தில் தொடர்ச்சியாக எட்டு மணி நேரத்துக்கும் மேலாக மின்சாரம்தடைப்படுவதால், விவசாயம் பாதிக்கப்படுகிறது. எந்தெந்தப் பகுதி களில், எவ்வளவு நேரம்மின் விநியோகத்தை நிறுத்தி, ஆன் செய்ய வேண்டும் என அந்தந்த மின் நிலைய உதவிப் பொறியாளர்கள் பட்டியலே போட்டுக் கொடுத்திருப்பதாகவும் ஆனந்த விகடன் இதழ் குறிப்பிட்டுள்ளது.