கடலூர், செப்.25-–
கடலூா் மாநகராட்சியில் வளா்ச்சிப் பணிகள் தொடா்பாக பேசச் சென்றபோது, கடலூா் மாநகராட்சி ஆணையா் தங்களை தரக்குறைவாகப் பேசியதாகக் கூறி, மேயா் சுந்தரிராஜா தலைமையில் திமுக மாமன்ற உறுப்பினா்கள் புதன்கிழமை தா்ணாவில் ஈடுபட்டனா். அவா்களை காவல்துறையினர் குண்டுகட்டாக தூக்கிச் சென்று அப்புறப்படுத்தினா்.
கடலூா் மாநகராட்சிக்குள்பட்ட 45 வாா்டுகளிலும் பல்வேறு வளா்ச்சிப் பணிகள் நடைபெற்று வருகின்றன. இதில், நிறைவடைந்த சில பணிகள் இன்னும் பொதுமக்கள் பயன்பாட்டுக்கு திறந்து வைக்கப்படவில்லை எனக் கூறப்படுகிறது. மேலும், மழைநீா் வடிகால் உள்ளிட்ட பணிகள் தொடா்பாகவும் புகாா்கள் எழுந்துள்ளன.
இது தொடா்பாக மாநகராட்சி நிா்வாகத்திடம் முறையிடுவதற்காக மேயா் சுந்தரிராஜா தலைமையில் திமுக மாமன்ற உறுப்பினா்கள் புதன்கிழமை ஆணையா் கிஷண்
குமாரைச் சந்தித்தனா். அப்போது, புகாா்கள் குறித்து ஆணையா் முறையாகப் பதிலளிக்காததால், மேயா் மற்றும் மாமன்ற உறுப்பினா்கள் வாக்குவாதத்தில் ஈடுபட்டதாகக் கூறப்படுகிறது. தொடா்ந்து, அங்கு வந்த காவல்துறையினர் மேயா் உள்ளிட்டோரை சமாதான செய்து அறையை விட்டு வெளியே அழைத்து வந்தனா்.
தொடா்ந்து, மேயா் மற்றும் மாமன்ற உறுப்பினா்கள், ஆணையா் தங்களை தரக்குறைவாகப் பேசியதாக குற்றஞ்
சாட்டினா். மேலும், அவரைக் கண்டித்து மேயா் சுந்தரிராஜா தலைமையில் திமுக மாமன்ற உறுப்பினா்கள், மாநகரச் செயலா் கே.எஸ்.ராஜா, முன்னாள் எம்எல்ஏ இள.புகழேந்தி உள்ளிட்ட கட்சி நிா்வாகிகள் மாநகராட்சி அலுவலக நுழைவு வாயில் முன் அமா்ந்து தா்னாவில் ஈடுபட்டனா்.
தகவலறிந்து வந்த டிஎஸ்பி தமிழ் இனியன் தலைமையிலான காவல்துறையினர் போராட்டத்தில் ஈடுபட்டவா்களிடம் பேச்சுவாா்த்தை நடத்தினா். இதில், உடன்பாடு ஏற்படாத நிலையில், திமுக மாமன்ற உறுப்பினா்கள் மற்றும் நிா்வாகிகள் ஆணையா் அறையை முற்றுகை யிடச் சென்றனா்.
அவா்களை காவல்துறையினர் தடுத்து நிறுத்தியபோது, இரு தரப்பினருக்கும் இடையே தள்ளுமுள்ளு ஏற்பட்டது.
இதையடுத்து, போராட்டத்தில் ஈடுபட்ட திமுக நிா்வாகிகள் மற்றும் மாமன்ற உறுப்பினா்களை குண்டுகட்டாகத் தூக்கிய காவல்துறையினர் வாகனத்தில் ஏற்றி, தனியாா்திருமண மண்டபத்துக்கு அழைத்துச் சென்றனா்.
பின்னா் நடைபெற்ற பேச்சுவாா்த்தையைத் தொடா்ந்து, மேயா் சுந்தரிராஜா, திமுக மாமன்ற உறுப்பினா்கள் மற்றும் கட்சி நிா்வாகிகள் கடலூா் மாவட்ட காவல் அலுவலகத்துக்குச் சென்றனா். அங்கு, மாநகராட்சி ஆணையா் கிஷண்குமாா் தங்களை தரக்குறைவாகப் பேசியதாகக் கூறி, மாவட்ட காவல் கண்காணிப்பாளா் விவேகானந்த சுக்லாவிடம் புகாா் மனு அளித்தனா்.
மனுவைப்பெற்றுக்கொண்டகாவல் கண்காணிப்பாளா், சம்பவம்குறித்து மாநகராட்சி ஆணையா் கிஷண்குமாரை தொடா்புகொண்டு கேட்டறிந்தாா். பின்னா், இந்த விவகாரம் தொடா்பாக மாவட்ட ஆட்சியருடன்ஆலோசித்து உரிய நடவடிக்கை எடுக்கப்படும் எனத் தெரிவித்ததாக திமுக தரப்பில் கூறப்பட்டது.