புதுடெல்லி, செப்.27–
இந்தியாவில் 2022ம் ஆண்டு முதல் 111 எம்.பி. மற்றும் எம்.எல்.ஏ.க்கள் எதிர்க்கட்சிகளுக்கு தாவியுள்ளதாக ஜனநாயக சீர்திருத்தங்களுக்கான சங்கம் பகீர் தகவலை வெளியிட்டுள்ளது.
இந்தியாவில் தேர்தல் களத்தில் மக்களின் வாக்குகளைப் பெற்று வெற்றி பெறும் அரசியல்வாதிகள், தங்களின் சொந்த நலனுக்காகவும் அதிகாரத்திற்காகவும் அவ்வப்போது எதிர்க்கட்சிகளுக்கு தாவுவது தொடர்கதையாக இருந்து வருகிறது. இதனைத் தடுக்கும் வகையில் கட்சித் தாவல் தடைச் சட்டம் நடைமுறையில் இருந்தாலும், பல்வேறு வழிகளில் மக்கள் பிரதிநிதிகள் கட்சி மாறுவது வாடிக்கையாகி விட்டது. இந்த சூழலில், கடந்த 2022ம் ஆண்டு முதல் தற்போது வரையிலான காலகட்டத்தில் மக்கள் பிரதிநிதிகளின் அணி மாறுதல் நடவடிக்கைகள் குறித்து ஜனநாயக சீர்திருத்தங்களு க்கான சங்கம் (ஏ.டி.ஆர்.) தீவிர ஆய்வு மேற்கொண்டு வந்தது.
அந்த ஆய்வறிக்கையில் வெளியாகியுள்ள புள்ளிவிவரங்கள் இந்திய அரசியலில் பெரும் அதிர்வலைகளை ஏற்படுத்தியுள்ளன. நாடு முழுவதும் கடந்த 2022ம் ஆண்டு முதல் 2026ம் ஆண்டு வரையிலான காலகட்டத்தில், 26 மக்களவை எம்.பி.க்கள், 7 மாநிலங்களவை எம்.பி.க்கள் மற்றும் 78 எம்.எல்.ஏ.க்கள் என மொத்தம் 111 மக்கள் பிரதிநிதிகள் அணி மாறியுள்ளனர். இதில் சுயேச்சையாக கட்சி தாவியவர்கள், ஒட்டுமொத்த கட்சியை இணைத்தவர்கள், பதவியை ராஜினாமா செய்துவிட்டு இடைத்தேர்தலில் வென்றவர்கள் மற்றும் தகுதி நீக்கம் செய்யப்பட்டு மீண்டும் தேர்வானவர்கள் அடங்குவர். அதிகபட்சமாக நாகாலாந்து மாநிலத்தில் ஆளும் தேசியவாத ஜனநாயக முற்போக்கு கட்சியுடன் ஏற்பட்ட அரசியல் உடன்பாடு காரணமாக 32 எம்.எல்.ஏ.க்கள் கட்சி மாறியுள்ளனர்.
இவ்வாறு கட்சி மாறிய மக்கள் பிரதிநிதிகளை வளைத்துப் போட்டதில் நாகா மக்கள் முன்னணி (என்.பி.எப்.) 32 பேருடனும், பாஜக 29 பேருடனும் அடுத்தடுத்த முன்னிலை இடங்களில் உள்ளன. மேலும் என்.சி.பி.ஐ. கட்சிக்கு 20 பேரும், காங்கிரசுக்கு 9 பேரும், உத்தவ் தாக்கரேவின் சிவசேனா அணிக்கு 8 பேரும், என்.பி.பி.க்கு 6 பேரும், அருணாச்சல மக்கள் கட்சிக்கு 4 பேரும் சென்றுள்ளனர். அதாவது கட்சி மாறிய 111 பேரில் 81 பேர், அதாவது 73 சதவீதம் பேர் என்.பி.எப்., பாஜக மற்றும் என்.சி.பி.ஐ. ஆகிய மூன்று கட்சிகளிலேயே தஞ்சம் புகுந்துள்ளனர். தெலங்கானாவில் பி.ஆர்.எஸ். கட்சியைச் சேர்ந்த 9 எம்.எல்.ஏ.க்கள் காங்கிரசிலும், கோவாவில் காங்கிரஸ் எம்.எல்.ஏ.க்கள் 8 பேர் பாஜகவிலும் ஐக்கியமாகினர். பஞ்சாபில் 6 மாநிலங்களவை எம்.பி.க்கள் உள்பட 8 பேரும், மகாராஷ்டிராவில் உத்தவ் அணியில் இருந்து 6 மக்களவை எம்.பி.க்களும் அணி மாறியுள்ளனர்.
இதனிடையே, மேற்குவங்கத்தில் திரிணாமுல் காங்கிரஸ் கட்சியில் இருந்து வெற்றி பெற்ற 20 எம்.பி.க்கள் தேசியவாத இந்திய குடிமக்கள் கட்சிக்கு (என்.சி.பி.ஐ.) ஒட்டுமொத்தமாக இடம் பெயர்ந்துள்ளனர்.
இதுகுறித்து அவர்கள் தெரிவிக்கையில், ‘நாங்கள் தனிப்பட்ட முறையில் கட்சி தாவவில்லை, எங்கள் பிரிவை முறைப்படி கட்சியாக இணைத்துள்ளோம்’ என்று விளக்கம் அளித்துள்ளனர். இந்த விவகாரம் தொடர்பான மனு தற்போது மக்களவை சபாநாயகர் ஓம் பிர்லா அவர்களின் பரிசீலனையில் உள்ளது. இதுதவிர மேகாலயா, மணிப்பூர், குஜராத் உள்ளிட்ட பல்வேறு மாநிலங்களிலும் மக்கள் பிரதிநிதிகள் அணி மாறியுள்ள நிலையில், வாக்களித்த மக்களை ஏமாற்றும் வகையில் அரங்கேறும் இந்த பதவி வேட்டை கலாசாரத்திற்கு முற்றுப்புள்ளி வைக்க தேர்தல் சீர்திருத்தங்கள் கடுமையாக்கப்பட வேண்டும் என்ற கோரிக்கை வலுத்துள்ளது.