ஜ
னநாயக ஆட்சிமுறை என்பது பெரும்பான்மை மக்களின் எண்ணங்களின் அடிப்படையில், ஆட்சியை உருவாக்கும் முறையாகும். ஆம்! பெரும்பான்மை மக்கள் எண்ணங்களின் பிரதிபலிப்புத்தான் மக்களாட்சியாகும் (Democratic Government). ஜனநாயக ஆட்சிமுறையை ஏற்றுக்கொண்ட எந்தவொரு நாடானாலும், மக்களின் ஆட்சிமுறைக்கான எண்ணங்களைதீர்மானிப்பது தேர்தல் முறைதான். குறிப்பாக, இந்திய அரசியல் சட்டம் (Constitution of India) ஜனநாயக ஆட்சிமுறையை ஏற்றுக்கொண்டுள்ளமையால், ஐந்தாண்டுகளுக்கு ஒருமுறை நாடாளுமன்றத்திற்கும், மாநில சட்டமன்றங்களுக்கும் தேர்தல்கள்மூலம் மக்களின் பெரும்பான்மை அடிப்படையில் ஒன்றியத்திலும், மாநிலங்களிலும் ஆட்சிகள் அமையும் தேர்தல்கள்மூலம் மக்களின் பெரும்பான்மையை நடுநிலையோடு தீர்மானிக்கும் தன்னிச்சையான (Independent Body) நிறுவனமாக இந்திய அரசியல் சட்டத்தில் தேர்தல் ஆணையம் (Election Commission vide Article 324 of the Constitution) உருவாக்கப்பட்டுள்ளது.
இந்தத் தேர்தல் ஆணையம் அரசியல் சட்டத்தின் அங்கீகாரம் பெற்ற சுதந்திரமான நிறுவனமாகும். இன்றைய நிலவரப்படி தேர்தல் ஆணையத்தில் மூன்று உறுப்பினர்கள் உள்ளனர். அவர்களில் ஒருவர் ஆணையத்தின் தலைவர், மற்றைய இருவர் உறுப்பினர்கள். அரசியல்
சட்டம் வகுத்துள்ள விதிகளின்படி இன்றைய தேர்தல் ஆணையத்தின் தலைமை தேர்தல் ஆணையராக ஞானேஷ்குமார் அவர்களும் ஆணை யத்தின் உறுப்பினர்களாக சுக்பீர்சந்து அவர்களும் விவேக்ஜோசி அவர்களும் பொறுப்பில் உள்ளனர்.
தேர்தல் ஆணையத்தினுடைய பணிகள் இந்திய அரசியல் சட்டம் 324வது பிரிவின்படி, தேர்தல்களை நடத்துவதும் அதன் நடவடிக்கைகளை மேற்பார்வையிடுதல் (Superintendence), வழிகாட்டுதல் (Direction), கட்டுப்படுத்துதல் (Control) ஆகிய பணிகளாகும். தேர்தல் ஆணையத்தினுடைய தலைவர் இந்தப் பணிகளில் ஆர்வமும், அக்கறையும் எடுத்துக் கொள்வதைவிட சிறப்புத் தீவிர திருத்தத்தில் (Special Intensive Revision) தீவிர கவனம் எடுத்துக்கொண்டு சிறப்புத் தீவிர திட்டப் பணிகளை மேற்கொண்டார். இந்தப் பணிகள் நேர்மையாக நடைபெறவில்லை எனவும், உண்மையான வாக்காளர்களின் பெயர்கள் நீக்கப்பட்டிருப்பதாகவும், பல்வேறு புகார்கள் எதிர்க்கட்சிகள் ஆட்சியிலிருக்கும் மாநிலங்களில் எழுப்பப்பட்டது.
இந்தச் சிறப்புத் தீவிர திருத்தம் தேர்தல் நடைபெறுவதற்கு ஓரிரு மாதங்களுக்கு முன்பாக நடத்தப்பட்டமையால் பல்வேறு குளறுபடிகள் மற்றும் குறைபாடுகளை அவ்வபோது தொடர்புடைய மாநிலங்களில் எடுத்துச்சொல்லியும், தேர்தல் ஆணையம் அத்தகைய பரிந்துரைகளைப்பற்றி கிஞ்சிற்றும் பரிசீலனை செய்யாமல் தன்னிச்சையாகவே முடிவுகளை மேற்கொண்டது.
சமீபத்தில் தேர்தல் நடைபெற்ற மாநிலங்களிலிருந்து அரசியல் கட்சியின் தலைவர்கள், சிறப்புத் தீவிர திருத்த திட்டம் அரசியல் காரணங்களின் அடிப்படையில் ஒருதலைபட்சமாக நடைபெற்றிருக்கிறது என்பதை சுட்டிக்காட்டியுள்ளார்கள்.எனினும், தேர்தல் ஆணையம் இதுபற்றி அக்கறை எடுத்துக்கொள்ளாமல் தன்னிச்சையாகவே முடிவுகளை தொடர்ந்து மேற்கொண்டது. தேர்தல் ஆணையத்தின் தலைமை ஆணையர் ஞானேஷ்குமார் தன்னிச்சையாக மற்ற இரு தேர்தல் ஆணையர்களுக்கு தெரியாமலேயே திட்டமிட்டு முடிவுகளை மேற்கொண்டார் என்ற அதிர்ச்சிதரும் செய்தியினை மற்றைய இரு ஆணை யர்களான சுக்பீர்சிங்சந்து அவர்களும், விவேக்ஜோசி அவர்களும் தற்பொழுது தெரிவித்த செய்திகள் அனைத்து ஆங்கில/தமிழேடுகளில் வெளிவந்து நாட்டு மக்களிடையே பதற்றத்தையும் அச்சத்தையும் ஏற்படுத்தியதோடு, தேர்தல் ஆணையத்தின் செயல்பாடுகளும், நம்பகத்தன்மையும் கேள்விக்குறியாக்கப்பட்டுள்ளது.
தலைமை தேர்தல் ஆணையர் ஞானேஷ்குமார்மேற்கொண்ட முடிவுகள் மற்றைய இரு ஆணையாளருக்கும் தெரியாமலேயே எடுக்கப்பட்ட முடிவுகள் என்ற நிலையிலும், மற்றைய இரு ஆணையாளருக்கும் தலைமை தேர்தல் ஆணையர் எடுத்த முடிவுகள் தொடர்பான எந்த விபரமும் தெரிவிக்கப்படவில்லை என்று அந்த ஆணையத்தின் உறுப்பினர்களே வெளிப்படையாக தெரிவித்துள்ள நிலையில், தலைமை தேர்தல் ஆணையர் ஞானேஷ்குமார் எப்படி நேர்மையான முடிவுகளை எடுத்திருக்க முடியும் என்ற ஆழமான ஐயப்பாடு நாட்டு மக்களிடையேயும், அரசியல் கட்சிகளின் தலைவர்களிடையேயும் வினாவையும் வியப்பையும் ஏற்படுத்திருக்கிறது. தலைமை தேர்தல் ஆணையர் தன்னிச்சையான ரகசிய முடிவுகள் மேற்கொள்வதற்கு அவருடைய அரசியல் சார்பு நிலைப்பாடுதான் காரணமாக இருக்க முடியும் என்ற அனுமானத்திற்குதான் அனைவரும் வரமுடியும்.
தலைமை தேர்தல் ஆணையர் ஞானேஷ்குமாரின் இத்தகைய ஒருதலைப்பட்சமான முடிவுகளின் காரணமாக இதுவரை நடந்துமுடிந்த தேர்தல்களின் முடிவுகள் கேள்விக்குறியாகின்றன? இத்தகைய நிலைமையை உருவாக்கிய தலைமை தேர்தல் ஆணையர் ஞானேஷ்குமாரின் நடவடிக்கை என்பது தேசவிரோதசெயல் என்பதில் மாற்றுக்கருத்திற்கு இடமில்லை. இந்திய ஜனநாயகத்தின்மீது அசைக்க முடியாத அக்கறையும் நம்பிக்கையும் கொண்ட திராவிட முன்னேற்றக் கழகத்தினு டைய தலைவர் மு.க.ஸ்டாலின் அவர்கள், தலைமை தேர்தல் ஆணையர் ஞானேஷ்குமாரினுடைய திரைமறைவு நடவடிக்கைகளும், தேர்தல் ஆணையத்தின் மற்றைய இரண்டு உறுப்பினர்களின் கருத்துக்களை பகிர்ந்து கொள்ளாமல் இருட்டடிப்புச் செய்த அவரின் போக்கும், நியாயமான தேர்தல் நடைமுறைகளை சிதறடித்து ஒருதலைபட்சமான முடிவு களுக்கு வழிவகுக்கும் என்ற நிலையில் தலைமை தேர்தல் ஆணையர் ஞானேஷ்குமார் ராஜினாமா செய்ய வேண்டும் என்று வலியுறுத்திருப்பது இங்கு குறிப்பிடத்தக்கதாகும். தளபதி மு.க.ஸ்டாலின் அவர்கள் முன்மொழிந்ததைத் தொடர்ந்து ஜனநாயகத்தில் நம்பிக்கை கொண்ட பல்வேறு அரசியல் கட்சிகளும் தலைமை தேர்தல் ஆணையர் ஞானேஷ்குமாரின் ராஜினாமாவை தொடர்ந்து வழிமொழிந்து வருகின்றனர்.
குறிப்பாக, இருபால் இளைஞர்களால் வழிநடத்தப்படும் “கரப்பான் ஜனதாக் கட்சியின்” (CJP) தலைவர்களும், தலைமை தேர்தல் ஆணையர் ஞானேஷ்குமாரின் ராஜினாமாவை வலியுறுத்துவதோடு அவர் மீண்டும் தொடர்ந்தால், நாங்கள் போராட்டத்தை தொடங்க வேண்டிய கட்டாய சூழ்நிலை உருவாகுமென எச்சரிக்கை மணியடித்துள்ளார்கள். எனவே, வேலியே பயிரை மேயவதைப் போல தலைமை தேர்தல் ஆணையர் ஞானேஷ்குமாரின் இத்தகைய ஜனநாயகத்தை உருகுலைக்கும் நடவடிக்கைக்கு காரணமென கருதப்பட்ட தலைமை தேர்தல் ஆணையர் ஞானேஷ்குமார் தன் பொறுப்பை காலதாமதப்படுத்தாமல், ராஜினாமா செய்ய வேண்டும் என்பதே அனைத்து தரப்பினரின் எதிர்பார்ப்பாகும்.
தென்தமிழகத்தின் தேசியத் தலைவரான மறைந்த பசும்பொன் முத்துராமலிங்கத் தேவர் அவர்கள் “தியாக வாழ்க்கையே தேசிய வாழ்க்கை” என வாழ்ந்து காட்டியவர் என்பதை நாடறியும். அப்படிப்பட்ட தேசியத் தலைவர் இந்தியநாடு விடுதலைப்பெற்ற பின்னர் ஜனநாயக அரசினுடைய அங்கங்களாக கருதப்படுகின்ற நிர்வாக அமைப்புகள் எப்படி நேர்மையாக செயல்பட வேண்டும் என்பதை வெளிப்படுத்தும் வகையில், என்றும் உயிர்ப்போடு வழிகாட்டும் இந்தக் கருத்தினை தெரிவித்துள்ளார்கள். இந்த ஜனநாயக நிறுவனங்கள் சீர்குலைந்துபோகு மேயானால், ஜனநாயகம் திசைமாறி சர்வாதிகாரத்தை நோக்கிச் சென்றுவிடும் என்றக் கருத்தை வலியுறுத்தும் வகையில் அவர் சொன்ன அற்புதமான வரிகள்தான்,
“மங்கை சூதகமானால் கங்கையிலே மூழ்கலாம்!
கங்கையே சூதகமானால் எங்கே போவது என்பதாகும்”
பசும்பொன் திருமகனாரின் இந்தக் கேள்வி இன்றைய நாட்டு மக்களுக்கு வெளிச்சத்தையும், விழிப்புணர்வையும் ஏற்படுத்தும் என்பதில் ஐயமில்லை!
எழுங்கள்! விழியுங்கள்!! இல்லையென்றால் எப்போதும் வீழ்ந்து கிடப்பீர்கள்!!!
என்ற எழுச்சியூட்டும் வரலாறு திரும்பட்டும்!