சூலூர், செப். 28 –
கோவை சூலூர் அருகே த.வெ.க. எம்.எல்.ஏ.வை பொதுமக்கள் சிறைபிடித்து, கற்களை வீசி தாக்கியதால் பரபரப்பு ஏற்பட்டது. கோவை மாவட்டம் சூலூர் அடுத்துள்ள பட்டணம் நாகம நாயக்கன்பாளையம் பகுதியில் 50 ஏக்கர் பரப்பளவில் குட்டை உள்ளது. இதில் மழைக்காலங்களில் மட்டும் வழிந்தோடி வரும் நீரை சேமித்து குடிநீர் பற்றாக்குறை சமயத்தில் பயன்படுத்தப்படுகிறது. கடந்த ஆண்டு தி.மு.க. ஆட்சியில் ரூ.10.50 லட்சம் செலவில் தூர் வாரப்பட்டது.
இந்நிலையில் கடந்த சில ஆண்டுக்கு முன்பாகவே ஒண்டிப்புதூர் கழிவுநீர் சுத்திகரிப்பு நிலையத்தில் இருந்து வெளியேறும் தண்ணீரை இந்த நன்னீர் குட்டையில் சேமிக்க திட்ட
மிடவே, அப்போது ஊர் மக்கள் எதிர்ப்பு காரணமாக திட்டம் கைவிடப்பட்டது. இந்நிலையில் ஆட்சி மாற்றத்துக்கு பின் சூலூர் த.வெ.க. எம்.எல்.ஏ. சுகுமார் தலைமையில் மீண்டும் குட்டை தூர்வாரப்படும் என தெரிவிக்கப்பட்டு இருந்தது. இந்நிலையில் குட்டையை தூர்வாரி அதில் கழிவு நீரை நிரப்ப உள்ளதாக பொதுமக்கள் மத்தியில் தகவல் பரவியது.
அதிர்ச்சி அடைந்த கிராம மக்கள் குட்டையை தூர்வாரி கழிவுநீர் நிரப்ப எதிர்ப்பு தெரிவித்து நேற்று முன்தினம் இரவு சுமார் 500க்கும் மேற்பட்டோர் கூடி ஆலோசனை நடத்தினர். இதில் கழிவு நீரை நிரப்புவதற்கு எந்த சூழ்நிலை யிலும் அனுமதிப்பதில்லை என தீர்மானித்தனர். இந்நிலையில் நேற்று முன்தினம் காலை குட்டையை தூர்வாரும் பணிகளை அடிக்கல் நாட்டி துவக்கி வைக்க சூலூர் த.வெ.க. எம்.எல்.ஏ. சுகுமார் வந்தார். அப்போது 300க்கும் மேற்பட்டோர் குட்டை பகுதியில் கூடி எதிர்ப்பு தெரிவித்தனர்.
நன்னீர் குட்டையை பாழ்படுத்தாதே, எங்கள் ஊருக்கு கழிவு நீர் தேவையில்லை என்பது போன்ற வாசகங்களை கொண்ட பதாகைகளை ஏந்தி நின்றனர். எம்.எல்.ஏ. சுகுமார், குட்டைக்குள் இறங்கி பூமி பூஜை செய்வதை பொது மக்கள் தடுத்து நிறுத்தினர். எம்.எல்.ஏ.வை சிறை பிடித்து கடும் வாக்குவாதத்தில் ஈடுபட்டனர். அப்போது
எம்.எல்.ஏ. ஆதரவாளர்களுக்கும் கிராம மக்களுக்கும் இடையே கடும் தள்ளுமுள்ளு ஏற்பட்டது. தொடர்ந்து, போலீசார் குவிக்கப்பட்டு எம்.எல்.ஏ. வை பத்திரமாக வெளியே அழைத்து வந்தனர். அங்கேயே அவர் காத்திருந்தார்.
பின்னர் தூர்வாரும் பணிகளுக்காக 2 ஜே.சி.பி. இயந்திரங்களை எம்.எல்.ஏ. உத்தரவுப்படி குட்டைக்குள் எடுத்துச் செல்ல அவரது ஆதரவாளர்கள் முயன்றனர். அப்போது கிராம மக்கள் ஜே.சி.பி. முன்பு அமர்ந்து போராட்டத்தில் ஈடுபட்டனர். சமரச பேச்சுவார்த்தை நடத்த எம்.எல்.ஏ. முயன்றபோது மீண்டும் எம்.எல்.ஏ. ஆதரவாளர்களுக்கும் கிராம மக்களுக்கும் இடையே பயங்கர தள்ளுமுள்ளு ஏற்பட்டது. திடீரென கற்களையும், தண்ணீர் பாட்டில்களையும் எம்.எல்.ஏ. மீது வீசி பொது மக்கள் தாக்க முயன்றதால் பரபரப்பு நிலவியது.
கூடுதலாக போலீசார் வரவழைக்கப்பட்டு இரு தரப்பினரிடமும் சமரச முயற்சியில் ஈடுபட்டனர். சுமார் 5 மணி நேரத்துக்கும் மேல் பரபரப்பு நிலவிய நிலையில் தகவல் அறிந்து வருவாய்த்துறை அதிகாரிகள் மற்றும் சூலூர் தாசில்தார் செந்தில்குமார் வந்து எம்.எல்.ஏ.விடமும் பொது மக்களிடமும் பேச்சுவார்த்தை நடத்தினர். ஏற்கனவே தூர் வாரப்பட்ட குட்டையை மீண்டும் தூர் வார வேண்டிய அவசியம் இல்லை.
இந்த குட்டையில் கழிவு நீரை நிரப்ப எம்.எல்.ஏ. தரப்பினர் முயற்சி செய்வதாகவும் அதற்கு எதிர்ப்பு தெரிவிப்பதாகவும் தாசில்தாரி டம் மக்கள் தெரிவித்தனர். பேச்சுவார்த்தையில் முடிவு எட்டப்படாதால் சூலூர் வட்டாட்சியர் அலுவலகத்திற்கு பொதுமக்களை வர வழைத்து சமரச பேச்சு வார்த்தையில் ஆர்.டி.ஓ. ஈடுபட்டார்.
இதில் குட்டையில் கழிவுநீர் விடுவதில்லை என உறுதியளித்த பின்னர் தூர் வாரும் பணிகளை மேற்கொள்வது என முடிவு செய்யப்பட்டது. இதனால் பர பரப்பு முடிவுக்கு வந்தது.