#Title

பள்ளி மாணவர்களுக்கு சத்துணவில் முட்டை வழங்குவதில் குழப்பம்! காரணமான அரசு அதிகாரிகள் மீது நடவடிக்கை தேவை! தமிழ்நாடு உயர்நிலை – மேல்நிலைப் பள்ளி பட்டதாரி ஆசிரியர் சங்க மாநிலத் தலைவர் ஆ.மலைக்கொழுந்தன் அறிக்கை!

கரூர், செப். 28–

தமிழ்நாடு உயர்நிலை, மேல்நிலைப்பள்ளி பட்டதாரி ஆசிரியர் சங்க மாநிலத் தலைவர் ஆ.மலைக்கொழுந்தன் விடுத்துள்ள அறிக்கை வருமாறு:–

தமிழ்நாடு முழுவதும் பள்ளி மாணவர்களுக்கு வழங்கப்பட்டு வரும் சத்துணவுத் திட்டத்தில் மாணவர்களுக்கு முட்டை வழங்குவது தொடர்ந்து நடைமுறையில் இருந்து வருகிறது. இதற்கு முன்பு இதுபோன்ற குழப்பம் எப்போதும் ஏற்பட்டதில்லை.

ஆனால், 25.09.2026 அன்று மட்டும், சில மாவட்டங்களில் மாணவர்களுக்கு சத்துணவுடன் முட்டை வழங்கப்பட்டுள்ள நிலையில், சில மாவட்டங்களில் மாணவர்களுக்கு முட்டை வழங்கப்படாமல் சத்துணவு மட்டும் வழங்கப்பட்டுள்ள தாகத் தகவல்கள் வெளியாகியுள்ளன.

ஒரே மாநிலத்தில், ஒரே அரசு திட்டத்தின் கீழ் மாணவர்களுக்கு வழங்கப்படும் உணவில் இவ்வாறு மாவட்ட வாரியான வேறுபாடு ஏற்பட்டிருப்பது மிகவும் அதிர்ச்சியளிக்கிறது. இதனால் மாணவர்கள் மற்றும் பெற்றோர்களிடையே குழப்பமும் ஏமாற்றமும் ஏற்பட்டுள்ளது.

மாணவர்களுக்கு வழங்கப்படும் முட்டை என்பது கூடுதலாக வழங்கப்படும் சாதாரண உணவுப் பொருள் அல்ல. அது மாணவர்களின் உடல் வளர்ச்சி, மூளை வளர்ச்சி மற்றும் ஊட்டச்சத்து தேவைக்கு முக்கியமான உணவாகும்.

எனவே, 25.09.2026 அன்று ஏற்பட்டுள்ள இந்தக் குழப்பத்திற்கான உண்மையான காரணத்தை அரசு உடனடியாக கண்டறிய வேண்டும். எந்த அதிகாரியின் உத்தரவு அல்லது நிர்வாகத் தவறின் காரணமாக இந்த நிலை ஏற்பட்டது என்பதை உரிய விசாரணை மூலம் கண்டறிய வேண்டும்.

மேலும், இந்தக் குழப்பத்திற்கு காரணமான அரசு அதிகாரிகள் அல்லது அலுவலர்களின் நடவடிக்கை கண்டறியப்பட்டு, தவறு உறுதி செய்யப்பட்டால் அவர்கள்மீது விதிமுறைகளின்படி உரிய நடவடிக்கை எடுக்க வேண்டும் என எங்கள் சங்கத்தின் சார்பில் வலியுறுத்திக் கேட்டுக்கொள்கிறோம்.

இனிவரும் காலங்களில் இதுபோன்ற குழப்பம் ஏற்படாத வகையில், தமிழ்நாடு முழுவதும் மாணவர்களுக்கு வழங்கப்படும் சத்துணவு மற்றும் முட்டை வழங்கும் நடைமுறை ஒரே சீராகவும் தடையின்றியும் நடைபெறுவதை அரசு உறுதி செய்ய வேண்டும்.

மாணவர்களின் ஊட்டச்சத்து தொடர்பான அரசு திட்டங்களில் நிர்வாகக் குழப்பம் ஏற்படுவது ஏற்றுக்கொள்ள முடியாதது. 25.09.2026 அன்று ஏற்பட்டுள்ள இந்தக் குழப்பத்திற்கு காரணமானவர்கள் யார் என்பதை அரசு கண்டறிந்து, உரிய நடவடிக்கை எடுக்க வேண்டும் என தமிழ்நாடு உயர்நிலை, மேல்நிலைப்பள்ளி பட்டதாரி ஆசிரியர் சங்கத்தின் சார்பில் வலியுறுத்திக் கேட்டுக்கொள்கிறோம்.

இவ்வாறு அவர் தெரிவித்துள்ளார்.