#Title

எஸ்.ஐ.ஆர். மூலம் கோடிக்கணக்கான வாக்காளர்களை நீக்கியது தேர்தல் ஆணையத்தின் தேசத் துரோகம்! மூத்த வழக்கறிஞர் கபில்சிபல் குற்றச்சாட்டு!

புதுடெல்லி, செப். 28–

எஸ்.ஐ.ஆர். நடவடிக்கையின் போது வாக்காளர் பட்டியலில் இருந்து கோடிக்கணக்கானவர்களை தேர்தல் ஆணையம் நீக்கியது தேசத் துரோகக் குற்றம் என மூத்த வழக்கறிஞர் கபில்சிபல் குற்றம்சாட்டி உள்ளார்.

தனியார் தொலைக்காட்சி ஒன்றுக்கு பேட்டி அளித்த கபில்சிபல், தேர்தல் ஆணையம் நாடு முழுவதும் மேற்கொண்ட SIR நடைமுறையின் கீழ், கோடிக்கணக்கான வாக்காளர்களின் பெயர்கள் நீக்கப்பட்டது தொடர்பாக கடும் விமர்சனங்களை முன்வைத்தார்.

தேர்தல் ஆணையத்தின் மையப்படுத்தப்பட்ட முடிவுகளின் அடிப்படையில் நாடு முழுவதும் வாக்காளர் பட்டியலில் இருந்து பெயர்கள் நீக்கப்பட்டது தேசத் துரோகக் குற்றத்திற்கு சமமானது என்றும் கபில் சிபல் குற்றம்சாட்டினார்.

தேர்தல் ஆணையத்தின் புதிய மென்பொருள் கட்டுப்பாடுகளால், வாக்காளர் பட்டியலில் பெயர்களைச் சேர்க்கவும் நீக்கவும் சட்டப்பூர்வ அதிகாரம் கொண்ட வாக்குச்சாவடி நிலை அதிகாரிகளின் உரிமைகள் மற்றும் அதிகாரங்கள் பறிக்கப்பட்டதாகவும் கபில் சிபல் தெரிவித்தார்.

புதிய வாக்காளர் சேர்க்கைக்கான படிவம் 6 மற்றும் ஒட்டுமொத்த வாக்காளர் பட்டியல் தரவுத் தளத்தையும் மையப்படுத்துவதில் தேர்தல் ஆணையத்திற்குள்ளேயே பிற ஆணையர்கள் ஆட்சேபனை தெரிவித்துள்ளதையும் அவர் சுட்டிக் காட்டினார்.

தமிழ்நாடு, பீகார், மேற்குவங்கம், உள்ளிட்ட பல மாநிலங்களில் உண்மையான வாக்காளர்களின் பெயர்கள் திட்டமிட்டு நீக்கப்பட்டுள்ளதாகவும் அவர் குற்றம் சாட்டியுள்ளார்.

தேர்தல் ஆணையர்களுக்குள் ஏற்பட்ட மோதல்கள் குறித்த செய்தி தவறானது எனில், அவதூறு வழக்கு தொடர தேர்தல் ஆணையம் தயங்குவது ஏன் என்றும் கபில் சிபல் கேள்வி எழுப்பினார்.

SIR மென்பொருளை வடிவமைப்பதில் அல்லது இயக்குவதில் ஈடுபட்ட தனியார் நிறுவனங்களின் பெயர்களை இந்தியத் தேர்தல் ஆணையம் இதுவரை வெளியிடவில்லை என்பது குறிப்பிடத்தக்கது.