திருவள்ளூர், செப்.29–
திருவள்ளூர் மாவட்டம் திருவள்ளூர் வட்டத்திற்கு உட்பட்ட நத்தம்பேடு ஏரிக்கரை சரிவில் உள்ள சுடுகாடு, கல்லறைகள், எரிமேடை ஆகியவற்றை பொதுப்பணித்துறையினர் திடீரென அகற்றியதால் பொதுமக்கள் பெரும் துயரத்துக்கு உள்ளாகி உள்ளனர்.திருநின்றவூர் அருகே உள்ளது நத்தம்பேடு ஊராட்சி. நத்தம்பேடு இரண்டாவது வார்டை சேர்ந்த 500–க்கும் மேற்பட்ட பொதுமக்கள் மூன்று தலைமுறையாக ஏரிக்கரை சரிவில் இருந்த சுடுகாடு, எரிமேடை ஆகியவற்றை பயன்படுத்தி வந்தனர்.20 ஆண்டுகளாக அந்த சுடுகாட்டில் இறந்தவர்களுக்காக கல்லறை கட்டி உள்ளனர்.
இறந்தவர்கள் நினைவு நாளில் அங்கு சென்று வழிபாடு செய்து வந்தனர். சிலர் எரிமேடையை பயன்படுத்தி வந்தனர்.இந்நிலையில், இறந்தவர்களின் சமாதியை அகற்றியதுடன், சுடுகாட்டால் நீர்நிலை மாசடைந்து வருகிறது என திருவள்ளூர் மாவட்ட பொதுப்பணித்துறை அதிகாரிகள், சுடுகாடு அகற்றப்படும் என கல்லறைகள் மீது நோட்டீஸ் ஒட்டி உள்ளனர்.கல்லறைகள் மீது நோட்டீஸ் ஒட்டினால் பொதுமக்களுக்கு எப்படி விழிப்புணர்வு ஏற்படும் என்பதை கூட சிந்திக்காத அதிகாரிகள் இந்த நடவடிக்கையில் ஈடுபட்டுள்ளனர்.கல்லறைகள் மீது நோட்டீஸ் ஒட்டியதற்கு பதிலாக கிராமத்தில் வருவாய் துறை மூலம் அறிவிப்பு செய்திருக்கலாம் என பொதுமக்கள் கருத்து தெரிவித்துள்ளனர்.
இதைத்தொடர்ந்து பொதுப்பணித்துறை உதவிப் பொறியாளர் உஷா தலைமையில் ஜேசிபி இயந்திரங்கள் வைத்து அனைத்து கல்லறைகளையும் இடித்து நொறுக்கி சுக்குநூறாக்கி உள்ளனர்.இதனால் பொதுமக்கள் மனம் உடைந்து போய் உள்ளனர்.அதேபோன்று எரிமேடையையும் அப்புறப்படுத்தியுள்ளனர். இது பற்றி தெரிந்ததும் அதிகாரிகளை முற்றுகையிட்டு அப்பகுதி பொதுமக்கள் ஆர்ப்பாட்டத்தில் ஈடுபட்டனர்.
சுடுகாட்டை அப்புறப்படுத்தியதால் எங்கள் கிராமத்தில் எவரேனும் இறந்தால் எங்கு கொண்டு போய் புதைப்பது, எரிப்பது, கல்லறை கட்டுவது என பொதுமக்கள் திக்குமுக்காடி அதிகாரிகளிடம் கேள்விகளை எழுப்பி உள்ளனர். இதற்கு அதிகாரிகள் சரியான பதில் அளிக்காமல் அங்கிருந்து புறப்பட்டு சென்று விட்டனர். சர்வே எண் 850/1 நத்தம்பேடு ஏரி நீர் நிலையில் அண்ணா நகர் கிழக்கு, மேற்கு, 26 வேப்பம்பட்டு ஆகிய மூன்று சுடுகாடுகள் அமைந்துள்ளன. இவற்றால் ஏற்படாத மாசு, ஏரிக்கரை சரிவில் உள்ள ஆதிதிராவிடர் சுடுகாட்டை அப்புறப்படுத்தியது கண்டனத்துக்குரியது அப்பகுதி மக்கள் மற்றும் சமூக ஆர்வலர்கள் தெரிவித்துள்ளனர்.