இன்னொரு பெண்மணி இருக்கிறார். அந்த அம்மா எல்லாவற்றையும் பேசி முடித்துவிட்டு இறுதியாக முதலமைச்சரைப் பார்த்து `மன்மத நன்றி’ என்கிறார். என்ன, சட்டசபையா இது?
இன்னொரு உறுப்பினர் இருக்கிறார், ராணிப்பேட்டையின் சட்டமன்ற உறுப்பினர். அவர்கள் ஒருநாள் எழுந்து நின்று `எங்கள் தொகுதியில் ஒரு மிகப்பெரிய இரப்பர் தொழிற்சாலை இருக்கிறது. அந்த இரப்பர் தொழிற்சாலையில் தினந்தோறும் தீ மூட்டி எரிக்கிறார்கள். அதனால் இரப்பர் எரிந்து மாசு ஏற்படுகிறது, சுற்றுச்சூழல் எல்லாம் பாதிக்கிறது, நிறைய புகை வருகிறது. அந்தத் தொழிற்சாலை மீது நீங்கள் நடவடிக்கை எடுக்க வேண்டும்’’ என்று ஒரு சட்டமன்ற உறுப்பினர் பேசுகிறார்கள். நாங்களெல்லாம் அமர்ந்து கேட்டுக்கொண்டு இருக்கிறோம். முதலமைச்சரும் எல்லாவற்றையும் கேட்கிறார்.
உடனே என்ன ஆயிற்று, சுற்றுச்சூழல் அமைச்சர் என்று ஒருவர் இருக்கிறார், அவர் எழுந்து நின்று பதில் சொல்கிறார். ``எதற்கெடுத்தாலும் தி.மு.கவைச் சொல்வார்கள் அல்லவா, இதெல்லாம் தி.மு.க ஆட்சியில்தான் நடக்கும், நம் ஆட்சியில் இவற்றையெல்லாம் நாங்கள் அனுமதிக்க மாட்டோம். நாங்கள் இரண்டு மாதமாக எல்லா இடங்களுக்கும் ஆய்வு சென்று கொண்டு இருக்கிறோம். இனிமேல் சுற்றுச்சூழலுக்கு எந்தப் பாதிப்பும் இல்லாமல் இருக்க, உடனடியாக அந்தத் தொழிற்சாலையில் நான் அரசு அதிகாரிகள், அமைச்சர் பெருமக்கள், முடிந்தால் முதலமைச்சரையும் அழைத்துக்கொண்டு சென்று நான் ஆய்வு செய்யப் போகிறேன். அந்தத் தொழிற்சாலையை இழுத்து மூடப் போகிறேன்’’ என்று சுற்றுச்சூழல் அமைச்சர் ஐந்து நிமிடங்கள் பதில் சொல்கிறார்.
தொழிற்சாலையே இல்லை!
அதன்பிறகு தொழில்துறை அமைச்சர் இருக்கிறார்கள் அல்லவா, அவர் எழுந்து நின்று சொல்கிறார். ``இங்கே பாருங்கள், சுற்றுச்சூழலுக்குப் பாதிப்பு வந்தது என்றால், அதை நாம் சரியான முறையில் சரி செய்ய வேண்டும். தொழில் பாதிக்காத மாதிரி பார்த்துக்கொள்ள வேண்டும். நீங்கள் இப்படிச் செய்தீர்கள் என்றால், தமிழ்நாட்டிற்குள் மற்ற தொழில்கள் எல்லாம் வராது’’ என்று அவர் ஓர் ஐந்து நிமிடங்கள் பேசிவிட்டு அமர்ந்துவிட்டார்.
இராணிப்பேட்டையில் அப்படி என்ன தொழிற்சாலை இருக்கிறது, அப்படி என்ன இரப்பர் டயர் செய்கின்ற தொழிற்சாலை இருக்கிறது என்று தேடிப் பார்த்தால், அது ஒரு பஞ்சர் ஒட்டும் கடை. ராணிப்பேட்டையில் அப்படி ஒரு தொழிற்சாலையே இல்லை. சென்று தேடிப் பார்த்தால் வெறும் பஞ்சர் ஒட்டும் கடை.
இதற்கு ஓர் அமைச்சர் பதில் சொல்கிறார், ஆய்வுக்கு முதலமைச்சரையே அழைத்துச் செல்லப் போகிறாராம்! இப்படித்தான் இன்றைக்கு சட்டமன்றம் நடந்து கொண்டு இருக்கிறது. இன்னும் நடனம் ஆடவில்லை, சண்டை போடவில்லை அவைதான் பாக்கி. இந்தச் சட்டமன்றம் இனிமேலாவது ஒழுங்காக நடக்க வேண்டும் என்றால், மக்கள் பிரச்சினையைப் பேச வேண்டும் என்றால், மதுராந்தகம் தொகுதியில் இருந்து உங்களுடைய சட்டமன்ற உறுப்பினராக, உங்களுடைய பிரதிநிதியாக என்னுடைய அன்புச் சகோதரர் திரு. பரந்தாமன் அவர்களை நீங்கள் ஜெயிக்க வைத்து அனுப்ப வேண்டும்.
ஆட்சிக்கு வந்த அடுத்த நிமிடம் செய்வேன்!
நான் உங்களிடத்தில் கேட்டுக்கொள்வதெல்லாம், இப்போது இருக்கக்கூடிய முதலமைச்சர் ஆட்சிக்கு வருவதற்கு முன்னால் என்ன சொன்னார்? பல்வேறு வாக்குறுதிகளைக் கொடுத்தார். என்னென்ன தெரியுமா சொன்னார்? ``நான் ஆட்சிக்கு வந்த அடுத்த நிமிடம் இதையெல்லாம் செய்யப் போகிறேன்” என்று சொன்னாரா இல்லையா?
முக்கியமாக என்ன சொன்னார்? மகளிர் உரிமைத்தொகை 1,000 ரூபாய் நம் தலைவர் கொடுத்தார். அதை உயர்த்தி 2,500 ரூபாய் தருகிறேன் என்று சொன்னாரா இல்லையா? இந்த முதலமைச்சர் சொன்னார், ஆட்சிக்கு வந்த அடுத்த நிமிடம் கொடுப்பேன் என்றார். கொடுத்தாரா? கொடுக்கவில்லை.
அதே மாதிரி வேலையில்லாத இளைஞர்களுக்கு மாதந்தோறும் 4,500 ரூபாய் உதவித்தொகை ஆட்சிக்கு வந்த அடுத்த நிமிடம் கொடுக்கிறேன் என்று இந்த முதலமைச்சர் சொன்னார். கொடுத்தாரா? கொடுக்கவில்லை.
அனைத்து இல்லங்களுக்கும், அனைத்து வீடுகளுக்கும் வருடத்திற்கு 6 கேஸ் சிலிண்டர் ஆட்சிக்கு வந்த அடுத்த நிமிடம் கொடுப்போம் என்று சொன்னார். கொடுத்தாரா? கொடுக்கவில்லை. இப்போதுதான் அதைப்பற்றி யோசித்திருக்கிறார். என்ன தெரியுமா சொல்லியிருக்கிறார்? மூன்று கேஸ் சிலிண்டர் தருவேன், அதுவும் ``நான் எப்போது நினைக்கி றேனோ அப்போதுதான் கொடுப்பேன்’’ என்று சொல்லியிருக்கிறார்.
இது எல்லாவற்றையும் விட முக்கியம், விவசாயிகளுக்கு அனைத்துப் பயிர்க்கடனும் உடனடியாகத் தள்ளுபடி செய்வேன் என்று சொன்னார், கொடுத்தாரா? எதையும் கொடுக்கவில்லை. அதே நேரத்தில் சட்டம் ஒழுங்கு எந்த அளவிற்குச் சீர்கெட்டுப் போய் இருக்கிறது என்று உங்களுக்குத் தெரியும்.
500 படுகொலைகள் நடந்திருக்கின்றன!
கடந்த ஐந்து மாதத்தில் மட்டும் தமிழ்நாடு முழுவதும் ஆட்சிக்கு வந்து இன்னும் ஐந்து மாதம் கூட ஆகவில்லை, நான்கு மாதத்தில் தமிழ்நாடு முழுவதும் 500 படுகொலைகள் நடந்திருக்கின்றன. அதுவும் இந்த மேற்கு மண்டலத்தில், கோயம்புத்தூரில் பார்த்தீர்கள் என்றால், ஒரே மாதத்தில் 10 படுகொலைகள். சென்ற வாரம் ஒரே நாளில் எட்டு கொலைகள் நடந்திருக்கின்றன. பெண்களுக்கு எங்குமே பாதுகாப்பு இல்லை.
உங்களுக்குத் தெரியும், நேற்று முன்தினம் இங்கே வண்டலூரில் பள்ளி மாண விக்குப் பாலியல் வன்கொடுமை நடந்திருக்கிறது. முதலில் இங்கே பிரச்சாரத்திற்கு வருகிறார்கள் என்று சொல்லி, அந்த மாணவியின் பெற்றோர்களுடைய புகாரைப் பெறாமல், பொய்ப் புகார் எடுத்திருக்கிறார்கள். என்னவென்று சொல்லி? பாம்பு கடித்தது என்று சொல்லி எடுத்திருக்கிறார்கள். அதுமட்டுமல்ல, இன்றைக்கு இதே மதுராந்தகத்தில் இன்னொரு சம்பவம் நடந்திருக்கிறது. ஐந்தாம் வகுப்பு படிக்கக்கூடிய ஒரு மாற்றுத்திறனாளிச் சிறுமியை வீட்டில் யாரும் இல்லாதபோது ஒரு கும்பல் கூட்டுப் பாலியல் வன்கொடுமை செய்திருக்கிறார்கள்.
இதுதான் இந்த முதலமைச்சர் பெண்களுக்கும் குழந்தை
களுக்கும் கொடுக்கின்ற பாதுகாப்பா? முதலமைச்சர் ஆட்சிக்கு வந்தவுடன் சிங்கப் பெண் படை அமைத்திருக்கிறேன் என்று அன்றைக்கே அறிவித்தார். நான் உங்களைப் பார்த்துக் கேட்கிறேன், யாராவது ஒருவர், ஏதாவது ஒரு சிங்கப் பெண்படை காவல்துறையினரை எங்கேயாவதுபார்த்திருக்கிறீர்களா? நான்கு மாதமாக எங்குமே கிடையாது, வெறும் அறிவிப்பு.
இந்தக் கேடுகெட்ட ஆட்சியை, இந்த வெட்கங்கெட்ட ஆட்சிக்கு ஒரு பாடத்தைப் புகட்ட வேண்டும் என்றால், இந்தத் தேர்தலில் பரந்தாமன் அவர்களை நீங்கள் மதுராந்தகம் தொகுதியில் சட்டமன்ற உறுப்பினராகத் தேர்வு செய்து அனுப்ப வேண்டும்.
அரிவாள் வெட்டுக்குப்
போட்டியாக மின்வெட்டு!
அரிவாள் வெட்டுக்குப் போட்டியாக இந்த ஆட்சியில் இன்னொன்று இருக்கிறது. அது என்னவென்றால் மின்வெட்டு. எங்குமே மின்சாரம் இல்லை. முதலமைச்சர் தொகுதியில் மின்சாரம் இல்லை. பெரம்பூரில் பார்த்தீர்கள் என்றால் தினமும் மக்கள் குடும்பம் குடும்பமாக வந்து தெருவில் போராட்டம் செய்துகொண்டு இருக்கிறார்கள். இப்படி எல்லாவற்றிற்கும் ஒரு சரியான பாடத்தைப் புகட்டுவதற்குச் சரியான நேரம்தான் இந்த மதுராந்தகம் இடைத்தேர்தல்.
6–ஆம் தேதி வாக்குச்சாவடிக்குச் சென்றீர்கள் என்றால் வாக்குப்பெட்டியில் மூன்றாவது பெயர், மூன்றாவது இடத்தில் பரந்தாமன் பெயர் இருக்கும், பக்கத்தில் உதயசூரியன் சின்னம் இருக்கும். 6–ஆம் தேதி மூன்றாவது இடத்தில் இருக்கக்கூடிய பரந்தாமனுடைய பெயரும் உதயசூரியன் சின்னமும் வாக்கு எண்ணிக்கையான 9–ஆம் தேதி முதலிடத்திற்கு வர வேண்டும்.
நான் உங்களிடத்தில் கேட்டுக்கொள்வதெல்லாம், நீங்கள் அத்தனை பேரும் முடிவு செய்துவிட்டீர்கள், உதயசூரியன் சின்னத்தை ஜெயிக்க வைக்க வேண்டும். பல்வேறு மாவட்டங்களிலிருந்து தேர்தல் பிரச்சாரத்தில் ஈடுபட வந்திருக்கிறீர்கள். இங்கே இருக்கக்கூடிய தொகுதி மக்களும் வந்திருக்கிறீர்கள், வாக்காளப் பெருமக்களும் வந்திருக்கிறீர்கள். நீங்கள் ஒரு நிமிடம் சிந்தித்துப் பாருங்கள். `மாற்றம் வேண்டும் மாற்றம் வேண்டும்’ என்று வாக்களித்தீர்கள். ஆனால், இன்றைக்கு எப்பேர்ப்பட்ட மாற்றத்தை இந்த முதலமைச்சர் கொடுத்துக்கொண்டு இருக்கிறார்? உங்களுக்கு மிகப்பெரிய ஏமாற்றத்தைக் கொடுத்துக்கொண்டு இருக்கிறார்.
நான் உங்களிடத்தில் கேட்டுக்கொள்வது இன்னும் நம் கைகளில் ஒரு வாரம் இருக்கிறது, எட்டு நாட்கள் இருக்கின்றன. இந்த எட்டு நாட்களும் நீங்கள் ஒவ்வொருவரும் இந்த பிரச்சாரத்தை உங்களுடைய குடும்பத்தினரிடம் பேசுங்கள். உங்களுடைய நண்பர்கள், உங்களுடைய உறவினர்கள், உங்கள் வீட்டுப் பக்கத்தில் இருப்பவர்கள், எதிர் வீட்டில் இருப்பவர்களிடம் எல்லாம் பேசுங்கள்.
ஏன் உதயசூரியன் சின்னத்தில் வாக்களிக்க வேண்டும், ஏன் பரந்தாமனை ஜெயிக்க வைத்து சட்டமன்றத்திற்கு அனுப்ப வேண்டும் என்ற பிரச்சாரத்தை அடுத்த எட்டு நாட்கள் நீங்கள் சரியாகச் செய்தீர்கள் என்றால், நிச்சயம் பல்லாயிரக்கணக்கான வாக்குகள் வித்தியாசத்தில் நம்முடைய பரந்தாமன் அவர்கள் ஜெயிக்கப் போவது உறுதி. மீண்டும் மதுராந்தகத்தில் உதயசூரியன் வெற்றி பெற்றுவிட்டது என்ற செய்தியை 9–ஆம் தேதி நீங்கள் கொடுக்க வேண்டும்.
உங்களை எல்லாம் அன்போடு கேட்கிறேன், பண்போடு கேட்கிறேன், பாசத்தோடு கேட்கிறேன், உரிமையோடு கேட்கிறேன், உங்கள் வீட்டுப் பிள்ளையாக இருந்து கேட்கிறேன், தலைவருடைய மகனாக இருந்து கேட்கிறேன். இன்னும் பெருமையாக, பூரிப்பாக சொல்ல வேண்டும் என்றால், முத்தமிழறிஞர் கலைஞரின் பேரனாகக் கேட்கிறேன்.
வருகின்ற 6–ஆம் தேதி சகோதரர் பரந்தாமன் அவர்களுக்கு உதயசூரியன் சின்னத்திலே வாக்களித்து மிகப்பெரிய வெற்றியைத் தேடித்தாருங்கள். உங்கள் அன்புக்கும் வரவேற்புக்கும் நன்றி, நன்றி, நன்றி.
இவ்வாறு கழக இளைஞர் அணிச் செயலாளரும் சட்டமன்ற எதிர்க்கட்சித் தலைவருமான உதயநிதி ஸ்டாலின் எழுச்சிமிக்க உரையாற்றினார்.
பங்கேற்றவர்கள்
தேர்தல் பொறுப்பாளர் முன்னாள் அமைச்சர் எ.வ.வேலு, முன்னாள் அமைச்சர் தா.மோ.அன்பரசன், மாவட்டச் செயலாளர் சுந்தர் சி.வி.கணேசன், நாடாளுமன்ற உறுப்பினர்கள் செல்வம், கதிர் ஆனந்த், தலைமைச் செயற்குழு உறுப்பினர் பி.ஆர்.நாராயணன், கழகக் கொள்கைப் பரப்புச் செயலாளர் சி.வி.எம்.பி.எழிலரசன், மேயர் மகாலட்சுமி யுவராஜ், நகர மன்றத் தலைவர் மலர்விழி குமார், நகரக் கழகச் செயலாளர் எம்.பி. குமார், இளைஞர் அணி மாநிலத் துணைச் செயலாளர்கள் எஸ்.ஜோயல், அப்துல் மாலிக், இளையராஜா, ஜி.பி. ராஜா, பிரபு கஜேந்திரன், மாவட்ட இளைஞர் அணி அமைப்பாளர்கள் யுவராஜ், கோல்டு பிரகாஷ், கார்த்திக், திருத்தணி கிரண், லோகேஷ், தாகப்பிள்ளை, ராயல் அன்பு, துணை அமைப்பாளர்கள் ஆண்டோ செல்வராஜ், சஞ்சய் காந்தி, இளம்பருதி, நகர இளைஞர் அணி அமைப்பாளர் முகமது புகாரி, மதச்சார்பற்ற முற்போக்குக் கூட்டணிக் கட்சி நிர்வாகிகள், தேசிய முற்போக்கு திராவிடக் கழகத்தின் செயலாளர் ராஜேந்திரன், மனிதநேய மக்கள் கட்சி மாவட்டச் செயலாளர் முகமது ரபீக், எஸ்.டி.பி.ஐ. கட்சி அக்பர் அகமது, மல்லை சத்யா, உள்பட பலரும்
கலந்துகொண்டனர்.
தாராபுரம் சட்டமன்றத் தொகுதி மதச்சார்பற்ற முற்போக்கு கூட்டணியின் வெற்றி வேட்பாளர் சுகன்யாவை ஆதரித்து கொளத்துப்பாளையம் பேரூர் காந்திஜி நகரில் வாக்காளப் பெருமக்களிடம் விளாத்திகுளம் சட்டமன்ற உறுப்பினர் ஜீ.வி.மார்க்கண்டேயன் வெற்றி சின்னமாம் உதயசூரியன் சின்னத்திற்கு வாக்கு சேகரித்தார்.உடன் விளாத்திகுளம் தெற்கு ஒன்றிய செயலாளர் இம்மானுவேல், தாராபுரம் கிழக்கு ஒன்றிய செயலாளர் துரைச்சாமி, பொதுக்குழு உறுப்பினர் ராஜாக்கண்ணு, வடக்கு மாவட்ட ஆதிதிராவிடர் அணி அமைப்பாளர் முத்துராஜ், வடக்கு மாவட்ட நெசவாளர் அணி அமைப்பாளர் பாண்டியராஜன், எப்போதும்வென்றான் சோலைசாமி திருக்கோவில் அறங்காவலர் குழு தலைவர் முத்துக்குமார், உள்ளிட்டோர் உடன் இருந்தனர்.