சென்னை, செப். 29 –
தமிழகம் முழுவதும் பல்வேறு பகுதி களில் தொடரும் மின்தடை காரணமாக வீடுகள் மட்டுமின்றி சிறு, குறு மற்றும் நடுத்தர தொழில் நிறுவனங்களும் பாதிக்கப்பட்டு வருகின்றன. அடிக்கடி ஏற்படும் மின்தடையால் உற்பத்தி பாதிப்பு, மூலப்பொருள் வீணாகுதல், இயந்திரங்களில் பழுது, தொழிலாளர்களுக்கு வேலை இல்லாத நேரத்திலும் ஊதியம் வழங்க வேண்டிய நிலை என தொழில் நிறுவனங்கள்
பல்வேறு பிரச்சினைகளை சந்தித்து வருவதாக தெரிவிக்கின்றன.
கோவை மாவட்டத்தில் மட்டும் செப்டம்பர் மாதத்தில் திடீர் மின்தடையால் 3 நாளில் சுமார் ரூ.30 கோடி வரை உற்பத்தி மற்றும் பொருள் சேதம் ஏற்பட்டதாக தொழில் துறையினர் தெரிவித்துள்ளனர். ஒரு நாளில் 7 முதல் 10 முறை வரை மின்தடை ஏற்பட்டதாகவும் அவர்கள் கூறியுள்ளனர். திருச்சி, மதுரை, திருவள்ளூர் உள்ளிட்ட மாவட்டங்களிலும் தொழில் நிறுவனங்கள் மின்தடை மற்றும் குறைந்த மின்னழுத்தம் குறித்து புகார் தெரிவித்துள்ளன.
தமிழகத்தின் மின் தேவை தொடர்ந்து அதிகரித்து வரும் நிலையில், தற்போதைய உச்ச தேவை சுமார் 19 ஆயிரம் மெகாவாட்டாக உள்ளதாக மின்துறை அமைச்சர் தெரிவித்துள்ளார். வரும் காலத்தில் தேவை மேலும்4 ஆயிரம் மெகாவாட் அதிகரித்து 23 ஆயிரம் மெகாவாட்டை எட்டும் என எதிர்பார்க்கப்படுகிறது. காற்றாலை மின் உற்பத்தி குறைந்ததால் கூடுதலாக சுமார் 3,000 மெகாவாட் மின்சாரம் கொள்முதல் செய்யப்பட்டுள்ளதாகவும் தெரிவிக்கப்பட்டுள்ளது.
முன்னதாக அதிகரித்த தேவையை
சமாளிக்க கூடுதலாக 2,000 மெகாவாட் மின்சாரம் கொள்முதல் செய்ய நடவடிக்கை எடுக்கப்பட்டதாகவும் மின்வாரியம் தெரிவித்திருந்தது.இதற்கிடையே மின்துறை வெள்ளை அறிக்கையின்படி, மின் உற்பத்தி, பரிமாற்றம் மற்றும் பகிர்மான நிறுவனங்களில் மொத்தம் 65,921 பணியிடங்கள் காலியாக உள்ளன. இதில் மின் பகிர்மானக் கழகத்தில் மட்டும் 53,575 பணியிடங்கள் காலியாக உள்ளன. 2026-–27ம் ஆண்டில் 20,449 பணியிடங்களை நிரப்ப முன்மொழிவு செய்யப்பட்டுள்ளது.
இதில் கள உதவியாளர் உள்ளிட்ட பணியிடங்களும் அடங்கும். களப்பணியாளர்கள் பற்றாக்குறை நீடிக்கும் நிலையில், 18 ஆயிரம் ஒப்பந்த தொழிலாளர்களை நேரடியாக ஈடுபடுத்த அனுமதி வழங்கப்பட்டுள்ளதாக மின்துறை அமைச்சர் தெரிவித்துள்ளார். அதேநேரம், காலிப்பணியிடங்களை நிரந்தர அடிப்படையில் நிரப்ப வேண்டும்என்று தொழிற்சங்கங்கள் வலியுறுத்தி வருகின்றன.
எதிர்க்கட்சியினர்
குற்றச்சாட்டு!
திறந்தவெளி சந்தை மூலம் மின்சாரம் பெறும் உயர் அழுத்த தொழில் நிறுவனங்களுக்கு அக்.1 முதல் மார்ச் 31 வரை யூனிட்டுக்கு 63 பைசா கூடுதல் கட்டணம் விதிக்க மின் பகிர்மானக் கழகம் ஒழுங்குமுறை ஆணையத்திடம் முன்மொழிந்துள்ளது. திறந்தவெளி மின் பயன்பாட்டால் பயன்படுத்தப்படாமல் தேங்கிய மின் திறனுக்கான செலவு உள்ளிட்டவற்றால் ரூ.180.91 கோடி நிகர செலவு ஏற்பட்டுள்ளதாக மின்வாரியம் தெரிவித்துள்ளது. இதனால் தொழில் நிறுவனங்களுக்கு தடையில்லா மின்சாரம் வழங்குவதுடன், மின் கட்டணச் சுமையையும் கட்டுப்படுத்த வேண்டும் என்ற எதிர்பார்ப்பு எழுந்துள்ளது.
இந்நிலையில், மின்வெட்டு பிரச்சி னைக்கு உடனடி தீர்வு காண்பதற்கு
பதிலாக அரசு விளம்பரம் மற்றும் சமூக வலைதள நடவடிக்கைகளில் கவனம் செலுத்துகிறது என எதிர்க்கட்சியினர் விமர்சித்து வருகின்றனர். குறிப்பாக மின் வாரிய தலைமை அலுவலகத்தில் முதல்வர் ஆய்வு செய்ததை தொடர்ந்து, ரீல்ஸ் எடுப்பதற்காகத்தான் ஆய்வு நடத்தப்பட்டதா என அரசியல் கட்சியினர் விமர்சித்துள்ளனர்.
மின்வெட்டு காரணமாக தொழில் உற்பத்தி பாதிக்கப்படாமல் இருக்க தடையில்லா மின்சாரம், காலிப்பணியிடங்களை நிரப்புதல், பழைய மின்மாற்றிகள் மற்றும் துணை மின் நிலையங்களை மேம்படுத்துதல், மின் கட்டணச் சுமையை கட்டுப்படுத்துதல் ஆகியவற்றில் அரசு தெளிவான நடவடிக்கைகளை எடுக்க வேண்டும் என்பதே தொழில் நிறுவனங்கள் மற்றும் பொதுமக்களின் எதிர்பார்ப்பாக உள்ளது.
மின்வெட்டு எப்போது முழுமையாக முடிவுக்கு வரும். தொழில்களின் உற்பத்தி இழப்புக்கு என்ன தீர்வு, காலிப்பணியிடங்கள் எப்போது நிரப்பப்படும், மின் கட்டணம் வரும் மாதங்களில் எவ்வாறு இருக்கும் என்பதற்கான தெளிவான பதிலை தமிழக அரசு அளிக்க வேண்டும் என்ற கேள்வி தற்போது எழுந்துள்ளது.