#Title

த.வெ.க. அரசு கொடுத்த வாக்குறுதியை நிறைவேற்றாததால், ஏமாற்றம் அடைந்த மக்கள் இடைத்தேர்தலில் நிச்சயம் பாடம் புகட்டுவார்கள்! திருவண்ணாமலையில் – முன்னாள் அமைச்சர் பி.கே.சேகர்பாபு பேட்டி!

திருவண்ணாமலை, அக்.1–

முன்னாள் அமைச்சரும், சென்னைகிழக்கு மாவட்டக் கழகச் செயலாளருமான பி.கே.சேகர்பாபு திருவண்ணா மலை யில் செய்தியாளர்களுக்கு அளித்த பேட்டி வருமாறு:–

செய்தியாளர்: 100 நாள் வேலை திட்டத்தில் தொடர்ந்து மூன்று மாதங்களாகப் பணி வழங்கப்படவில்லை என்றும், ஊதியம் ஒழுங்காகக் கொடுக்கப்படுவதில்லை என்றும், தொடர்ந்து 10 நாட்களுக்கு வேலை இல்லை என்று சொல்கிற மாதிரியும் பொதுமக்கள் தமிழகம் முழுவதும் ஒரு குற்றச்சாட்டை வைக்கிறார்களே, அதை நீங்கள் எப்படிப் பார்க்கிறீர்கள் சார்?

பி.கே.சேகர்பாபு: எங்களுக்கு ஒதுக்கப்பட்ட மதுராந்தகம் இடைத்தேர்தலில் கூட பல இடங்களில் மக்களைச் சந்திக்கின்ற பொழுது, உலகமே வரவேற்ற “கலைஞர் மகளிர் உரிமைத் திட்டத்தில்” பெறவேண்டிய நபர்களுக்கு உண்டான மாதாந்திர ஊக்கத்தொகை பெறவில்லை என்ற குற்றச்சாட்டு எழுந்திருக்கின்றது.

அதேபோல், மாற்றுத்திறனாளிகளுக்கு ஆயிரம் ரூபாயாக இருந்ததை ஆயிரத்து இருநூறு ரூபாயாக உயர்த்தி வழங்கிய அந்தத் தொகையும் நிறைய பேருக்கு வழங்கப்படவில்லை என்ற குற்றச்சாட்டு இருந்தது.

100 நாள் வேலைத் திட்டத்தில் பெரும் குளறுபடிகள்!

அதேபோல, 100 நாள் வேலைவாய்ப்புத் திட்டத்தில் முழுமையாகப் பணிகளும் வழங்குவதில்லை; அப்படிப் பணிகள் வழங்கினாலும் மூன்று மாதம், நான்கு மாதங்களுக்குப் பிறகுதான் அந்தப் பணிகளுக்கு உண்டான ஊதியமும் கிடைப்பதாகக் குற்றச்சாட்டு எழுந்திருக்கின்றது.

மக்களுடைய அவலக் குரல் ஒட்டுமொத்தமாக ஓங்கி ஒலித்துக் கொண்டிருக்கின்றது. அவர்களே கேட்கிறார்கள், சர்க்கரை விலையைப் பார்த்தீர்களா, அரிசி விலையைப் பார்த்தீர்களா, பருப்பு விலையைப் பார்த்தீர்களா என்று. “மாற்றம் மாற்றம்” என்றோம்; இந்த விலைவாசி உயர்வுதான் மாற்றமாக இந்த ஆட்சியில் கண்டுகொண்டிருக்கிறோம் என்று சொல்லொணாத் துயரத்தில் இன்றைக்கு மக்கள் தவித்துக் கொண்டிருக்கின்றார்கள்.

செய்தியாளர்: கடந்த ஆட்சிக் காலத்தில் நீங்கள் இந்து சமய அறநிலையத்துறை அமைச்சராக இருந்தீர்கள். ஆனால், கோயிலுக்கு இதுவரைக்கும் யானை வரவில்லை. இப்போது த.வெ.க. ஆட்சியில் புது யானை வந்திருக்கிறது.

பி.கே.சேகர்பாபு: இதற்கும், இந்த ஆட்சிக்கும் சம்பந்தம் இல்லை. ஏதோ சொல்வார்களே ‘மொட்டைக்கும் முழங்காலுக்கும் முடிச்சு போடுவது போல’, ஒன்றிய உள்துறை அமைச்சர் இந்தத் திருக்கோயிலுக்கு வந்தபோது, யானை குறித்து இங்கே இருக்கின்ற அர்ச்சகர்கள் வைத்த கோரிக்கையை ஏற்று, ஏற்கனவே வனத்துறைச் சட்டத்தில் இருந்த அந்தச் சிரமங்களைப் போக்கி, ஒன்றிய அரசு பிறப்பித்த உத்தரவிற்கு ஏற்ப மாநிலத்தின் நீதிமன்றங்களும் அந்த உத்தரவை ஏற்று யானைகள் வழங்குவதற்கு உண்டான தடையை நீக்கியதால்தான் யானைகள் இப்போது ஐந்து திருக்கோயில்களுக்கு வந்திருக்கின்றன.

அந்தத் தேவைகளையும் ஏற்கனவே அறிந்து, அதற்குண்டான கருத்துரையை வழங்கிய அரசு, இந்து சமய அறநிலையத்துறை அரசு, திராவிட மாடல் அரசு.

த.வெ.க.அரசுக்கு பணிவும் இல்லை! துணிவும் இல்லை!

செய்தியாளர்: நீங்கள் சொல்லும் அந்தக் குரல், வரும் இடைத்தேர்தல்களில் த.வெ.க. அரசுக்கு எதிர்பார்ப்பாக ஒலிக்குமா?

பி.கே.சேகர்பாபு: நிச்சயமாகப் பலன் அளிக்கும். ஏனென்றால், மனிதனிடம் அனைவரும் எதிர்பார்ப்பது ஒரு பாடல் வரியைத்தான்: “பதவி வரும்போது பணிவும் வரவேண்டும், துணிவும் வரவேண்டும் தோழா” என்பது. ஆனால், இவர்களிடம் பணிவும் இல்லை, துணிவும் இல்லை; ஆணவமும், ஆங்காரமும், அகம்பாவமும்தான் எதிரொலித்துக் கொண்டிருக்கின்றது. நிச்சயம் அதற்கு மக்கள் பதிலளிப்பார்கள்.

செய்தியாளர்: த.வெ.க. ஆட்சிப் பொறுப்பேற்ற நாளில் இருந்து பல திட்டங்களை அறிவிக்கிறார்கள், எதிர்ப்பு வந்ததும் பின்வாங்குகிறார் கள். இதை நீங்கள் எப்படி பார்க்கிறீர்கள்?

பி.கே.சேகர்பாபு: திட்டமிடல் இல்லை! நிர்வாகத் திறமையற்ற அரசு, இந்த அரசு என்பதற்கு இதெல்லாம் ஒரு உதாரணம். நீங்கள் திருக்கோயி லையே எடுத்துக்கொண்டால், முதலிலே திருச்செந்தூரிலே கட்டண உயர்வு என்றார்கள், திரும்பப் பெறப்பட்டது. ஆன்லைன் தரிசனம் என்று அறிவித்தார்கள், இதுவரை ஒரு திருக்கோயிலுக்குக் கூட ஆன்லைன் தரிசனம் கொண்டுவரப்படவில்லை. செல்போனுக்கு ரூ.5 என்றார்கள், ஒரு திருக்கோயிலிலும் செயல்படுத்தப்படவில்லை.

இன்று இந்த இடத்தில் நின்று சொல்லுகிறோம், மதுரை மீனாட்சி அம்மன் – அங்கயற்கரசி, மங்கையற்கரசி என்று போற்றப்படுகின்ற 6,000 ஆண்டுகளாக மதுரையை ஆண்டு கொண்டிருக்கின்ற அந்த அம்பாளுக்கு – 180 பணிகளில் ரூ. 35 கோடிக்கு மேல் உபயதாரர் மற்றும் திருக்கோயில் நிதியில் பணிகளை மேற்கொண்டு, ஆட்சி அதிகாரம் இருக்கின்ற பொழுதே திராவிட மாடல் ஆட்சியில் 17.09.2026 என்று அங்கு இருக்கின்ற அர்ச்சகர்கள் மற்றும் பட்டாச்சாரியாரால் நிர்ணயம் செய்யப்பட்ட அந்தத் தேதியில் குடமுழுக்கு நடத்திய ஆட்சி எங்களுடைய ஆட்சி!

இந்த 100 ஆண்டுகளில் நான் சவாலாகவே சொல்கிறேன், ஏதாவது ஒரு திருக்கோயிலில் 79 கல்தூண்கள் புதிதாக வரவழைக்கப்பட்டு, வடிவமைக்கப்பட்டு ஒரு மண்டபத்தைக் கட்டிய வரலாறை எங்காவது காண்பியுங்கள் பார்க்கலாம்.

அறநிலையத்துறையில் கழக அரசின் பணிகள்!

கிட்டத்தட்ட கடந்த ஐந்து ஆண்டுகளில் நாங்கள் தினந்தோறும் மேற்கொண்ட ஆய்வு, அந்த அறங்காவலர் குழு, அதற்குண்டான ஒத்துழைப்பு, முதலமைச்சர் மு.க.ஸ்டாலின் அவர்களுடைய வழிகாட்டுதலோடு நாமக்கல்லில் இருந்து கல்லெடுத்து, 79 தூண்களை வடிவமைத்து ‘வீர வசந்தராயர் மண்டபத்தை’ உருவாக்கிய ஆட்சி திராவிட மாடல் ஆட்சி.

எங்களைப் பார்த்து அவர் கேட்கிறார், அவருக்கு எதற்குமே வித்தியாசம் தெரியவே இல்லை. அறிவைப் பற்றிச் சொல்லுகிறார்; அவர் பெரிய மகானாகவே இருக்கட்டும், நாங்கள் ஏற்றுக்கொள்கிறோம்.

நாங்கள் கோயிலின் கோபுரத்திலே ஊற்றப்படுகின்ற புனித நீருக்கும், அண்டாவிலே வைத்து ஊற்றப்படுகின்ற தண்ணீருக்கும் வித்தியாசம் தெரிந்தவர்கள்.

இதுவரை ஒரே ஒரு திட்டத்திற்குக்கூட இந்து சமய அறநிலையத்துறையில் அடிக்கல் நாட்ட முடியாத ஒரு அரசாக இந்த அரசு இருக்கின்றது.

செய்தியாளர்: குறிப்பாக இந்து சமய அறநிலையத்துறை அமைச்சரான உங்களை மட்டும் டார்கெட் செய்வது போல “அறிவு இருக்கிறதா?” என்று கேட்கிறார். அவருக்குத் தெரியுமா, ஏன் மக்களோடு மக்களாகப் போகமாட்டார் என்பது போன்ற விமர்சனங்களைத் தொடர்ந்து வைத்துக்கொண்டே வருகிறாரே, அதற்கு என்ன காரணமாக இருக்கும் என நினைக்கிறீர்கள்?

பி.கே.சேகர்பாபு: நாங்கள் மக்களோடு பயணிப்பவர்கள். கிட்டத்தட்ட என்னுடைய பொதுவாழ்க்கையை எடுத்துக்கொண்டாலே, 48 ஆண்டுகள் பொதுவாழ்க்கையில் இருப்பவன். என்னுடைய பொதுவாழ்க்கையின் வயது கூட அவருக்கு இல்லை. நாங்கள் ஐயப்ப சரணத்தில் சொல்வது போல் “கல்லும் முள்ளும் காலுக்கு மெத்தை” என்ற வரிகளோடு பலவற்றைக் கடந்து வந்திருப்பவர்கள்.

அவர் தற்போதுதான் அரசியலுக்குப் பயணித்திருக்கின்றார். அவர் அறிவுக் களஞ்சியமாகவே இருக்கட்டும், தேவைப்படுபவருக்கு அவர் அறிவைத் தந்தால் வாங்கிக் கொள்கிறோம். அவர் ஏதாவது எங்களுக்கு உபதேசம் தந்தால் கூட அந்த உபதேசத்தை ஏற்றுக்கொள்கிறோம்.

நாட்டு மக்கள் பார்த்துக்கொண்டிருக்கிறார்கள். அவருடைய இந்தப் பேச்சை, அவருடைய தொனியை, அவருடைய செயல்பாடுகளை மக்கள் சிறப்பாகப் பார்த்துக் கொண்டிருக்கின்றார்கள், அறிந்து கொண்டிருக்கின்றார்கள்.

கோயிலுக்குள்ளேயே ரீல்ஸ்போடும் அமைச்சர்!

கோயிலுக்குள்ளேயே ‘ரீல்ஸ்’ போடுகின்ற ஒரே பழக்கத்தை வைத்திருப்பவர்; ராஜகோபுரத்தைக் கூட காலணியுடன் ஏறிச் செல்பவர்; முறுக்குக்குக் கூட நாள் கேட்பவர்; முறுக்கு உற்பத்தி ஆகின்ற நேரத்தைக் கேட்கக்கூடிய ஒரு அமைச்சரைப் பெற்றிருப்பது இந்து சமய அறநிலையத்துறையின் துரதிர்ஷ்டம்!

ஆதவ் அர்ஜூனாவின் மடமைத் தனம்!

செய்தியாளர்: இடைத்தேர்தலில் தி.மு.க. வெற்றி பெற்றால் அரசியலை விட்டுப் போய்விடுவதாக ஆதவ் அர்ஜூனா உதயநிதிக்கு நேரடியாகச் சவால் விட்டிருக்கிறாரே?

பி.கே.சேகர்பாபு: நாம் ஒன்றும் போர்க்களத்திலே, யுத்தகளத்திலே நின்று கொண்டிருக்கவில்லை. தமிழ்நாடு அரசியல் களத்திலே 78 ஆண்டுகள் பயணித்திருக்கின்ற ஒரு இயக்கத்தை மிரட்டுகின்ற பாணியிலே ஆதவ் அர்ஜுனா போன்றவர்கள் ஈடுபடுவது அவர்களுடைய மடமையைக் காட்டுகிறது. இதையெல்லாம் கடந்து வந்த இயக்கம் இது.

ஆணவம் பிடித்தவர்களுக்கு தக்க தீர்ப்பு கிடைக்கும்!

எப்பொழுதெல்லாம் திராவிட முன்னேற்றக் கழகத்திற்குச் சோதனை என்று வருகின்றதோ, எப்பொழுதெல்லாம் இந்த இயக்கம் இப்படிச் சிறுமைப்படுத்தப்படுகின்றதோ, அப்போதெல்லாம் சினம்கொண்டு சீறுகின்ற சிங்கமாக இந்த இயக்கமும், இந்த இயக்கத்தின் தொண்டனும், தோழனும் மாறுவான்!

நீதி என்று ஒன்று இருக்கின்றது, இயற்கை என்று ஒன்று இருக்கின்றது, இறை என்று ஒன்று இருக்கின்றது. இதற்கெல்லாம் அப்பாற்பட்டு ஆணவம் கொண்டு அலைபவர்களுக்கு நிச்சயமாக இயற்கையும் இறைவனும் தீர்ப்பை வழங்குவார்கள்.

இவ்வாறு முன்னாள் அமைச்சர் பி.கே. சேகர்பாபு பேட்டியளித்தார்.