சென்னை, அக்.6–
தவெக முழுக்க முழுக்க தோல்வி ஜுரத்தில் இருப்பதால் பல லட்சம் செலவு செய்கிறது. அங்கு முதல்வர் வரும்போது வைக்கப்படும் கொடி, பேனர், பேரிகார்டு செலவுகளை வேட்பாளர் கணக்கில் சேர்க்க வேண்டும் என்று தேர்தல் ஆணையத்திடம் திமுக புகார் அளித்துள்ளது. திமுக மூத்த வழக்கறிஞர் என்.ஆர்.இளங்கோ நேற்று சென்னை, தலைமை செயலகத்தில் தமிழக தலைமை தேர்தல் அதிகாரி அர்ச்சனா பட்நாயக்கை சந்தித்து ஒரு புகார் மனு அளித்தார்.
பின்னர் அவர் நிருபர்களிடம் கூறியதாவது:
திமுக சார்பாக மதுராந்தகம் மற்றும் தாராபுரம் இடைத்தேர்தல் குறித்து இன்றைக்கு தேர்தல் கமிஷனிடம் புகார் ஒன்று கொடுத்திருக்கிறோம். இந்த புகாரில் தாராபுரத்திலும், மதுராந்தகத்திலும் தோல்வி பயத்தினால் தவெக அரசு எப்படி அரசாங்க ஊழியர்களையும், அந்த நிர்வாகத்தையும் துஷ்பிரயோகம் செய்து இடைத்தேர்தலில் எப்படியாவது வென்று விடலாமா என்பதை நினைக்கிறார்கள் என்பது குறித்தான புகாரை அளித்திருக்கிறோம்.
குறிப்பாக மதுராந்தகத்தில் தவெக வேட்பாளர் தன்னுடைய பிரசாரத்தின் போது அரசு ஊழியர்களை, பொதுப்பணித்துறை ஊழியர்களை வாக்காளர்களுக்கு முன்பாகவே வைத்து உடனடியாக இதையெ ல்லாம் செய்ய வேண்டும் என்று அரசாங்க ஊழியர்களை தன்னுடைய பிரசாரத்திற்காக பயன்படுத்தி இருக்கிறார். இது மக்கள் பிரதிநிதித்துவ சட்டப்படி தவறான நடவடிக்கையாகும்.
இதை மிகவும் அப்பட்டமாக வெளிப்படையாக எந்த தயக்கமும் இல்லாமல் அதிகாரத்தை துஷ்பிரயோ கம் செய்தும் அரசாங்கத்தினுடைய ஊழியர்களை தன்னுடைய வெற்றிக்காக தவெக அரசு உபயோகிக்கபடுத்துகிறது என்பதை நாங்கள் வீடியோ பதிவுகளை ஆதாரமாக கொடுத்து புகார் கொடுத்திருக்கிறோம். அதுமட்டுமல்லாமல் தமிழக முதல்வர் 2ம் தேதி மதுராந்தகத்தில் பிரசாரம் செய்யும்போது அன்றைக்கு மட்டும் ஏறக்குறைய 20 லட்ச ரூபாய்க்கும் மேலாக செலவு செய்யப்பட்டிருக்கிறது.
கொடிகள், பேனர்கள், பேரிகார்டு என எல்லாவற்றையும் வரம்பு மீறிய செலவாக தவெக வேட்பாளர் செய்திருக்கிறார். ஒரு கட்சியினுடைய தலைவர் பிரசாரம் செய்யும்போது அந்த மேடைக்கு உண்டான செலவுகளும், அவருடைய பயணச் செலவுகளும் மட்டும்தான் கணக்கில் எடுத்துக் கொள்ளப்பட மாட்டாது. மற்றபடி இந்த கொடி, பேனர் மற்றும் பேரிகார்டு ஆகியவற்றை பல லட்சக்கணக்கான செலவில் செய்திருப்பதால் அது வரையறுக்கப்பட்ட 40 லட்ச ரூபாய்க்கு மேலாக இருக்கிறது.
இந்த செலவு தொகையை மதுராந்தகம் வேட்பாளருடைய பெயரில் சேர்க்க வேண்டும் என்று கேட்டுக்கொண்டிருக்கிறோம். தாராபுரத்தை பொறுத்தவரை தொகுதி முழுக்க தமிழக முதல்வர் மற்றும் வேட்பாளருடைய புகைப்படங்கள் அச்சிடப்பட்ட டிபன் கேரியர்கள் கொடுக்கப்பட்டிருக்கிறது. அது வெறும் டிபன் கேரியர் தானா என்று பார்த்தால் அப்படி அல்ல. இன்றைக்கு அந்த டிபன் கேரியரில் ஒவ்வொரு வீட்டுக்கும் ரூ.10,000 வைத்து கொடுக்கப்படுவதாக அங்கு இருக்கக்கூடியவர்கள் கூறியிருக்கிறார்கள்.
எனவே தேர்தல் கமிஷன் தன்னுடைய மேற்பார்வையாளர்கள் அனைவரையும் வைத்து தாராபுரம் தொகுதியை பொறுத்தமட்டிலும் அதிக கண்காணிப்பை மேற்படுத்த வேண்டும். அமைச்சர் ஆதவ அர்ஜுனா 28ம் தேதி மதுராந்தகத்தில் பேசும்போது எதிர்க்கட்சி தலைவர் அவருடைய பற்றியும், அவருடைய தனிப்பட்ட விவகாரங்களை பற்றி பொய்யான, அவதூறான, அனைவரும் முகம் சுழிக்கும் வகையில் பேசியிருக்கிறார். அது தேர்தல் நடத்தை நிதிமுறைக்கு எதிராக இருப்பதால் அவர் மீது நடவடிக்கை எடுக்க வேண்டும்.