#Title

திருவள்ளூர் அடுத்த மேட்டுப்பாளையத்தில் த.வெ.க. ஆட்சியில் குடிநீருக்காக வீதியில் இறங்கிய மக்கள்! காலிக்குடங்களுடன் சாலை மறியல் - ‘மனு வழங்கியும் எந்தப் பயனும் இல்லை’ என பொதுமக்கள் குமுறல்!

திருவள்ளூர் அக் 06;-

குடிநீர் வழங்கத் தவறிய த.வெ.க. அரசைக் கண்டித்து, மேட்டுப்பாளையம் மக்கள் காலிக்குடங்களுடன் வீதியில் இறங்கி போராட்டத்தில் ஈடுபட்டனர். குடிநீருக்காக மக்கள் போராடும் நிலை ஏற்பட்டுள்ள நிலையில், அரசு பேருந்துகள் சிறைபிடிக்கப் பட்டதால் அப்பகுதியில் பரபரப்பு ஏற்பட்டது.

திருவள்ளூர் அடுத்த பூண்டி ஒன்றியம், சென்றான்பாளையம் ஊராட்சிக்குட்பட்ட மேட்டுப்பாளையம் கிராமத்தில் 150-க்கும் மேற்பட்ட குடும்பங்கள் வசித்து வருகின்றனர். இப்பகுதியில் கடந்த 5 மாதங்களாக குடிநீர் விநியோகம் முறையாக நடைபெறவில்லை என்றும், கடந்த ஒரு வாரமாக குடிநீர் முற்றிலும் கிடைக்காத நிலை ஏற்பட்டுள்ளதாகவும் பொதுமக்கள் குற்றம்சாட்டினர்.

குடிநீர் கிடைக்காமல் தவிக்கும் மக்கள், டேங்கர் லாரிகளில் வரும் தண்ணீரை ஒரு குடம் ரூ.10 வரை பணம் கொடுத்து வாங்கிப் பயன்படுத்த வேண்டிய நிலைக்கு தள்ளப்பட்டுள்ளதாக தெரிவித்தனர். அன்றாட கூலியை நம்பி வாழும் குடும்பங்கள், தினமும் பணம் கொடுத்து குடிநீர் வாங்க வேண்டிய கட்டாயம் ஏற்பட்டிருப்பது வேதனைக்குரியது என்றும் அவர்கள் கூறினர்.

குடிநீர் பிரச்சினையைத் தீர்க்கக் கோரி பூண்டி வட்டார வளர்ச்சி அலுவலர் உள்ளிட்ட அதிகாரிகளிடமும், திருவள்ளூர் சட்டமன்ற தொகுதி உறுப்பினர் உள்ளிட்டோரிடமும் பலமுறை மனுக்கள் அளித்தும் உரிய நடவடிக்கை எடுக்கப்படவில்லை என பொதுமக்கள் தெரிவித்தனர்.

அதிகாரிகளிடம் முறையிட்டும் தீர்வு கிடைக்கா ததால் வேதனையும் ஆத்திரமும் அடைந்த பொதுமக்கள், குழந்தைகள், பெண்கள் உள்ளிட்டோருடன் காலிக்குடங்களை ஏந்தியபடி திருவள்ளூர்– ராமஞ்சேரி சாலையில் மறிய லில் ஈடுபட்டனர்.

போராட்டத்தின் போது அவ்வழியாக வந்த அரசு பேருந்துகளையும் பொதுமக்கள் சிறைபிடித்தனர். இதனால் பேருந்துகளில் பயணம் செய்த பொதுமக்கள், வேலைக்குச் சென்ற தொழிலாளர்கள் உள்ளிட்டோர் பாதிக்கப்பட்டனர். குடிநீர் பிரச்சினை காரணமாக பொதுமக்களின் போராட்டம் போக்குவரத்து பாதிக்கும் அளவுக்கு சென்றது அப்பகுதியில் பரபரப்பை ஏற்படுத்தியது.

மேட்டுப்பாளையம் கிராமத்தைச் சேர்ந்த ஒருவர் கூறுகையில், “பொய்யான வாக்குறுதிகளை நம்பி தற்போதைய த.வெ.க. அரசுக்கு வாக்களித்தோம். ஆனால் இன்று குடிப்பதற்கான தண்ணீரைக்கூட பணம் கொடுத்து வாங்க வேண்டிய அவலநிலையில் உள்ளோம். கடந்த சில மாதங்களாக இப்பகுதியில் மின்சாரம், குடிநீர் உள்ளிட்டஅடிப்படை வசதிகள் இல்லாமல் பொது மக்கள் கடுமையாகப் பாதிக்கப்பட்டு வருகின்றனர். அடிப்படை வசதிகளை செய்து தருவோம் என்ற வாக்குறுதிகளை நம்பி ஏமாறுவது இதுவே கடைசியாக இருக்கும்” என்றார்.

தகவலறிந்து சம்பவ இடத்திற்கு வந்த பூண்டி வட்டார வளர்ச்சி அலுவலர் வரபிரசாத், பொதுமக்களிடம் பேச்சுவார்த்தை நடத்தினார். அப்போது 10 நாட்களுக்குள் குடிநீர் விநியோகத்தை சீரமைக்க நடவடிக்கை எடுக்கப்படும் என உறுதியளித்ததைத் தொடர்ந்து பொதுமக்கள் போராட்டத்தை கைவிட்டனர்.