சென்னை,அக். 6 –
பட்டினப்பாக்கத்தில் புதிய தலைமைச் செயலகம் கட்ட எதிர்ப்புத் தெரிவிக்கும் விதமாக மீனவர்கள் நேற்று கருப்புக் கொடிப் போராட்டத்தில் ஈடுபட்டனர்.
அப்போது வீடு, கடை, படகுகளில் கருப்பு கொடி ஏற்றி ஊர்வலமாகச் சென்றனர்.
சென்னை, பட்டினப்பாக்கத்தில் புதிய தலைமைச் செயலகம் கட்டப்படும் என த.வெ.க. அரசு அரசாணை வெளியிட்டது. இதற்கு தி.மு.க., அ.தி.மு.க., இடதுசாரிகள், மீனவ கிராம மக்கள் உள்ளிட்ட பல்வேறு தரப்பினர் எதிர்ப்பு தெரிவித்து வருகிறார்கள்.
பல்வேறு மீனவ கிராமங்களைச் சேர்ந்த மீனவர்கள் கடந்த வாரம் பட்டினப்பாக்கத்தில் ஆர்ப்பாட்டத்தில் ஈடுபட்டனர்.
இந்நிலையில், நேற்று முன்தினம் நொச்சிக்குப்பம் முதல் சீனிவாசபுரம், முள்ளிக் குப்பம் வரையுள்ள 10 கிராமங்களின் மக்கள் வீடுகளிலும் கடற்கரை மணல் பரப்புகளிலும், மீனவர்களின் படகு களிலும் கருப்புக் கொடி கட்டியும், பட்டினப்பாக்கம் பவானி குப்பத்தில் உள்ள மீன் கடைகளில் கருப்பு கொடி ஏற்றியும், கருப்புக் கொடி ஏந்தி ஊர்வலமாகச் சென்றும் போராட்டத்தில் ஈடுபட்டு தங்களின் எதிர்ப்பை தெரிவித்தனர்.
புதிய தலைமைச் செயலகம் கட்டும் முடிவுக்கு எதிராகவும் மீனவ மக்களுக்குச் சொந்தமான பூர்வீக நிலத்தை திருப்பிக் கொடுக்க வலியுறுத்தியும் தமிழ்நாடு அரசுக்கு எதிராக கண்டன முழக்கங்களை எழுப்பினார்கள். புதிய தலைமைச் செயலகத்திற்கான அரசாணையை உடனடியாகத் திரும்பப் பெற வேண்டும்; மறுவாழ்விற்காகக் கையகப்படுத்தப்பட்ட நிலத்தை முள்ளிக்குப்பம், முள்ளிமாநகர் மீனவ மக்களுக்கான நிலமாக உறுதி செய்ய வேண்டும்; இப்பகுதியை மீனவர்களுக் கான நீண்டகால குடியிருப்புப் பகுதியாகப் பதிவு செய்ய வேண்டும்
பாதிக்கப்படும் கிராம மக்களுடன் அரசு அதிகாரிகள் நேரடியாகப் பேச்சுவார்த்தை நடத்திய பின்னரே இப்பகுதி தொடர்பான எந்த முடிவும் எடுக்கப்பட வேண்டும் ஆகிய கோரிக்கைகளை முன்வைத்து இந்தப் போராட்டம் நடத்தப்பட்டது.
அப்போது நிருபர் களைச் சந்தித்த புதிய தலைமைச் செயலக எதிர்ப்பு போராட்டக் குழுவின் நிர்வாகிகள் கூறியதாவது: –
தமிழ்நாடு அரசின் அரசாணையை எதிர்த்து நாங்கள் வழக்கு தொடர்ந்து உள்ளோம்.புதிய தலைமை செயலகம்கட்டினால் பத்தாயிரத்துக்கும் மேற்பட்ட மக்கள் பாதிக்கப்படுவார்கள்.
வஞ்சனை இல்லாமல் மீனவ மக்களின்கோரிக்கையை அரசு நிறைவேற்ற வேண்டும்.
பல்வேறு மாவட்டங்களில் இருந்து கலந்துகொண்டு கடந்த வாரம் ஒரு போராட்டத்தை நடத்தினார்கள். ஆனால் இதுவரை அரசு அதிகாரிகள் ஒருவர் கூட பேச்சுவார்த்தைக்கு வரவில்லை. இங்கு ஒரு நாள் மீனவர்கள் மீன் கடை போடவில்லை என்றால் அவர்களின் வாழ்வாதாரம் பாதிக்கும். சூழ்நிலை இவ்வாறு இருக்க புதிய தலைமைச் செயலகம் இங்கு அமைத்தால் அவர்களின் வாழ்வாதாரம் என்னவாகும் என முதலமைச்சர் எண்ணிப் பார்க்க வேண்டும்.
நாங்கள் எந்தக் கட்சிக்கும் ஆதரவானவர்களும் இல்லை, எந்த கட்சிக்கும்எதிரானவர்களும் இல்லை. எங்களோட கோரிக்கை இதுவரைக்கும் முதல்வர் கவனத்திற்குப் போயுள்ளதா என்ற கேள்வி உள்ளது. முதல்வர் இடைத்தேர்தலில் வேலை செய்து கொண்டு இருக்கிறார். அதனால் வந்து எங்களின் கோரிக்கைகள் குறித்து அமைச்சர்கள்தான் பதில் சொல்லிக்கொண்டு இருக் கிறார்கள்.
சில நாள்களுக்கு முன்னர் பள்ளி கல்வித்துறை அமைச்சர், இது மீனவர்களுக்கான இடம்தான், ஆனால் இந்த இடத்தில் பழைய பில்டிங் உள்ளது. அந்த பில்டிங்கில் மீனவர்களையே அச்சுறுத்துகிற வகையில்பல தகாத செயல்கள் நடக்கிறது எனவும் அதனால்தான் நாங்கள் இந்த இடத்தில் தலைமைச் செயலகம் கட்டுகிறோம் எனக்
கூறுகிறார். அந்த இடம் இருட்டாக உள்ளது என்றால் அங்கு மின்விளக்கு அமைத்துவெளிச்சம் கொடுக்கலாம்.
அந்த பழைய கட்டிடத்தை இடித்துவிட்டு மீனவர்களுக்குக் கொடுக்கவேண்டுமே தவிர, அதைச் செய்யாமல், தலைமைச் செயலகம் கட்டுவார்களா என்பதுதான் எங்களின் கேள்வி. தலைமைச் செயலகமா மீனவர்களின் வாழ்வாதரமா என்று கேட்டால் முதல்வருக்கு மீனவர்கள்தான் முக்கியம் என அமைச்சர் ஆதவ் அர்ஜுனா முதலில் கூறினார். அடுத்த நாளே அந்த இடம் காலியாகத்தான் உள்ளது, 1200 மீனவக் குடும்பங்கள் அங்கு இல்லை எனக் கூறுகிறார்.அவரின் கருத்துக்கள் முரணாக உள்ளது. அவர் களத்தில் வந்து பார்த்தால்தான் தெரியும். வீட்டிலோ கோட்டையிலோ உட்கார்ந்துகொண்டு பார்த்தால் தெரியாது.
இந்த பகுதி மக்களுக்குஎன்ன பிரச்சினை உள்ளதுஎன இங்கு வந்து பார்த்தால்தான் அவருக்கு தெரியும். அதை விட்டுட்டு அரசு அதிகாரிகளும், அமைச்சர்களும் தன்னிச்சையாக ஒவ்வொரு நாளும் பேட்டி கொடுப்பதை நாங்கள் வன்மையாக கண்டிக்கின்றோம்.
இவ்வாறுஅவர்கள் கூறினர்.