சென்னை, அக்.7 –
தமிழகம் முழுவதும் பல்வேறு பகுதிகளில் மின்தடை மற்றும் திடீர் மின்வெட்டு ஏற்படுவதால் பொதுமக்கள், வணிகர்கள், விவசாயிகள் மற்றும் தொழில் நிறுவனங்கள் பாதிக்கப்பட்டு வருகின்றனர். மின்வழித்தட கோளாறு, மின்மாற்றி பழுது, பராமரிப்பு பணிகள் உள்ளிட்ட காரணங்களால் சில இடங்களில் திட்டமிட்டும், பல பகுதிகளில் திடீரெனவும் மின்விநியோ கம் பாதிக்கப்படுவதாக கூறப்படுகிறது. இதற்கு நிரந்தர தீர்வு காண்பது எப்போது என பொதுமக்கள் கேள்வி எழுப்பி வருகின்றனர்.
திருவொற்றியூர் பகுதியில்
மின் வெட்டு!
சென்னையில் சில பகுதிகளில் புதிய ‘ரிங் மெயின் யூனிட்’ அமைக்கும் பணிக்காக காலை 10.30 மணி முதல் மாலை 6.30 மணி வரை மின்விநியோகம் நிறுத்தப்பட்டது. பெரம்பூர் பகுதியில் சீம்பியம் 33/11 கிலோவோல்ட் துணை மின் நிலையத்தில் இருந்து மின்சாரம் பெறும் மின்வழித்தடம் அதிகாலை 3 மணியளவில் ‘டிரிப்’ ஆனதால் மின்தடை ஏற்பட்டது. சுமார் 3 மணி நேரத்துக்கு பிறகு மின்விநியோகம் சீரானது. எண்ணூர், திருவொற்றியூர் பகுதிகளில் மின்வழித்தட கோளாறு காரணமாக பகல் முழுவதும் மின்தடை ஏற்பட்டதாக கூறப்படுகிறது. நீலாங்கரை பகுதியில் சரஸ்வதி நகர் உள்ளிட்ட இடங்களில் சுமார் 5 மணி நேரம் மின்வெட்டு நீடித்தது.
மழைநீர் வடிகால் பணிகளின்போது பூமிக்கடியில் பதிக்கப்பட்ட மின்கம்பி கள் சேதமடைவதும் சில இடங்களில் திடீர் மின்தடைக்கு காரணமாக இருப்பதாக மின்வாரிய பணியாளர்கள் தெரிவித்துள்ளனர்.
இதனால் ஒரு பகுதியில் ஏற்பட்ட பழுது சரிசெய்யப்படுவதற்குள் மற்றொரு பகுதியில் மின்தடை ஏற்படும் நிலை இருப்பதாகவும் பொதுமக்கள் தெரிவிக்கின்றனர்.
சென்னையைப் போலவே தமிழகத்தின் பல்வேறு மாவட்டங்களிலும் மின்தடை மற்றும் திடீர் மின்வெட்டு தொடர்பாக பொதுமக்கள் புகார் தெரிவித்து வருகின்றனர். குறிப்பாக கிராமப்புறங்களில் மின்விநி யோகத்தில் ஏற்படும் தடையால் விவசாய பணிகள் பாதிக்கப்படுவதாகவும், மின்மோட்டார் களை இயக்க முடியாமல் பயிர்களுக்கு தண்ணீர் பாய்ச்சுவதில் சிரமம் ஏற்படுவதாகவும் விவசாயிகள் கூறுகின்றனர்.
மின்வெட்டால்
தொழில் நிறுவனங்கள் பாதிப்பு!
தொழில் நிறுவனங்கள், சிறு, குறு தொழில்கள், கடைகள் உள்ளிட்டவற்றிலும் மின்தடையால் உற்பத்தி மற்றும் வர்த்தகம் பாதிக்கப்படுகிறது. இயந்திரங்கள் அடிக்கடி நின்று செல்வதால் உற்பத்தி நேரம் வீணாவதுடன், சில தொழில் நிறுவனங்களில் கூடுதல் செலவு ஏற்படுவதாகவும் கூறப்படுகிறது. வீடுகளில் மாணவர்களின் படிப்பு, முதியோர் மற்றும் குழந்தைகளின் அன்றாட வாழ்க்கை, வீட்டு உபயோகப் பொருட்களின் செயல்பாடு என பல்வேறு வகையிலும் மின்வெட்டு பாதிப்பை ஏற்படுத்துகிறது.
இதனால் “தமிழகம் முழுவதும் மின்வெட்டு பிரச்சினைக்கு நிரந்தர தீர்வு எப்போது?”, “திடீரென மின்சாரம் துண்டி க்கப்படுவதற்கு என்ன காரணம்?”, “பழுதுகளை சரிசெய்ய எவ்வளவு நேரம் ஆகிறது?”, “பராமரிப்பு பணிகளுக்காக அறிவிக்கப்படும் நேரத்தைவிட கூடுதலாக ஏன் மின்தடைநீடிக்கிறது?”, “மின்விநியோக கட்டமைப்பை வலுப்படுத்த என்ன நடவடிக்கை எடுக்கப்பட்டுள்ளது?” என்பன போன்ற கேள்விகளை பொதுமக்கள் எழுப்பி வருகின்றனர்.
மேலும், மின்வெட்டை கட்டுப்படுத்தவும், பழையமின்கட்டமைப்புகளை மேம்படுத்தவும், மின்மாற்றிகள் மற்றும் மின்வழித்தட ங்களின் திறனை அதிகரிக்கவும் மின்துறை என்ன திட்டம் வைத்துள்ளது என்பதையும் அரசு தெளிவுபடுத்த வேண்டும் என பல்வேறு தரப்பினர் வலியுறுத்துகின்றனர்.
தொடர்ந்து ஏற்படும் மின்தடை தொடர்பாக அரசியல் கட்சி தலைவர்களும்அரசை விமர்சித்து வருகின்றனர். மின்வெட்டு பிரச்சி னைக்கு நிரந்தர தீர்வு காணாமல் புதிய திட்டங்கள் மற்றும் அறிவிப்புகளுக்கு முக்கியத்துவம் அளிக்கப்படுவதாக சிலர் குற்றம்சாட்டுகின்றனர்.
பொதுமக்கள் அன்றாடம் சந்திக்கும் மின்தடை பிரச்சினைக்கு முதலில் தீர்வு காண வேண்டும் என்றும் அவர்கள் வலியுறுத்துகின்றனர்.முதல்வர் விஜய் தலைமையிலான அரசு மற்றும் மின்துறை அமைச்சர் நிர்மல் குமார் ஆகியோர் மின்வெட்டை கட்டுப்படுத்துவதற்கும், சீரான மின்விநியோகத்தை உறுதி செய்வதற்கும் என்ன நடவடிக்கை
எடுக்கப் போகின்றனர் என்பதையும் மக்கள் அறிய விரும்புகின்றனர். மின்விநியோக கட்டமைப்பை மேம்படுத்துவதற்கான காலக்கெடு என்ன, பழுதுகளை விரைந்து சரிசெய்யும் நடைமுறை என்ன, எதிர்காலத்தில் திடீர் மின்வெட்டு ஏற்படாமல் தடுப்பதற்கான திட்டம் என்ன என்பதற்கு அரசு விளக்கம் அளிக்க வேண்டும் எனவும் கோரிக்கை எழுந்துள்ளது.
மின்வெட்டு எப்போது
முடிவுக்கு வரும்?
மின்வெட்டு எப்போது முடிவுக்கு வரும் என்பது தெரியாத நிலையில், மின்கட்டணம் மட்டும் சரியான நேரத்தில் வந்து விடுகிறது என பொதுமக்கள் விமர்சிக்கின்றனர். “மின்சாரம் தடையின்றி கிடைப்பது எப்போது? அடிக்கடி ஏற்படும் மின்வெட்டால் ஏற்படும் பாதிப்புக்கு யார் பொறுப்பு? விவசாயம், தொழில், வணிகம் என அனைத்து துறைகளும் பாதிக்கப்படுவதை அரசு கவனிக்கிறதா?” என்றும் அவர்கள் கேள்வி எழுப்புகின்றனர்.
தமிழகம் முழுவதும் சீரான மின்விநியோ கம் கிடைக்க மின்வழித் தடங்கள் மற்றும் மின்மாற்றி களின் பராமரிப்பை விரைவுபடுத்துவதுடன், பழைய மின்கட்டமைப்பு களை மேம்படுத்தவும், அடிக்கடி பழுது ஏற்படும் பகுதிகளை கண்டறிந்து நிரந்தர தீர்வு காணவும் மின்துறை நடவடிக்கை எடுக்க வேண்டும் என்பதே பொதுமக்களின் எதிர்பார்ப்பாக உள்ளது.