சென்னை, அக். 7–
மூன்று நாட்கள் தொடர் விடுமுறை முடிந்து, சென்னை திரும்பும் மக்களால் கடும் போக்குவரத்து நெரிசல் ஏற்பட்டது. பள்ளி காலாண்டு தேர்வு, காந்தி ஜெயந்தி மற்றும் தொடர் விடுமுறையை முன்னிட்டு சென்னையில் இருந்து ஏராளமானோர் தென் மாவட்டங்கள் உள்பட சொந்த ஊர்களுக்கும், சுற்றுலா இடங்களுக்கும் சென்றிருந்தனர். விடுமுறை முடி வடைந்து பள்ளிகள், கல்லூரிகள் திறப்பு மற்றும் பணிக்கு திரும்ப வேண்டியுள்ளதால் நேற்று முன்தினம் மாலை முதல் சென்னை நோக்கி படையெடுக்க தொடங்கினர்.
இதனால் திருச்சி -சென்னை தேசிய நெடுஞ்சாலையில் வாகன போக்குவரத்து அதிகரித்து, பல இடங்களில் வாகனங்கள் ஊர்ந்து செல்லும் நிலை ஏற்பட்டது. குறிப்பாக உளுந்தூர்பேட்டை சுங்கச்சாவடி அருகே 2 கி.மீ. தொலைவுக்கு வாகனங்கள் அணிவகுத்து
சென்றது.
முன்னதாக, விடுமுறை தொடங்கியபோது சென்னையில் இருந்து சொந்த ஊர்களுக்குச் சென்றவர்களால் தாம்பரம், பெருங்களத்தூர் மற்றும் ஜிஎஸ்டி சாலையில் கடும் நெரிசல் ஏற்பட்டிருந்தது.
தற்போது விடுமுறை முடிந்து அதே அளவுக்கு மக்கள் சென்னை திரும்புவதால் மீண்டும் போக்குவரத்து நெரிசல் ஏற்பட்டுள்ளது. சொந்த வாகனங்களில் சென்னை திரும்புவோர் மட்டுமின்றி அரசு மற்றும் தனியார் பேருந்துகள், ரயில்களிலும் பயணிகள் கூட்டம் அதிகரித்தது.
இதன் காரணமாக சென்னை புறநகர் பகுதிகளிலும், நகருக்குள் நுழையும் முக்கிய சாலைகளிலும் இரவு நேரத்திலும் கடும் போக்குவரத்து நெரிசல் நீடித்தது.