சென்னை, அக். 9–
அரசு அண்மையில் கொண்டுவந்த ‘வெற்றிப் பயணம்’ திட்டத்தின் கீழ், எக்ஸ்பிரஸ், டீலக்ஸ், லிமிடெட் ஸ்டாப் (LSS) மற்றும் புறநகர் பேருந்துகளிலும் பெண்களுக்கு இலவசப் பயணம் அனுமதிக்கப்பட்டுள்ளது. ஆனால், போதிய விழிப்புணர்வும் தெளிவான வழிகாட்டுதலும் இல்லாத காரணத்தால், “இலவசப் பேருந்துகள் அனைத்தும் மகளிருக்கான பிரத்யேக ஸ்பெஷல் பஸ்கள்” என்று பல பெண் பயணிகள் தவறாகப் புரிந்து கொண்டுள்ளனர்.
இதன் விளைவாக, டிக்கெட் எடுத்துப் பயணிக்கும் ஆண் பயணிகளிடம் பெண்கள் வாக்குவாதத்தில் ஈடுபடுவதும், அவர்களை வண்டியை விட்டு இறங்கச் சொல்வதும், இருக்கைகளுக்காகக் கடுமையான சண்டைகள் வெடிப்பதும் எனப் பேருந்துகள் போர்க்களமாக மாறி வருகின்றன.
வழக்கமாக அரசு குறிப்பிட்ட சில நேரங்களில் மகளிர் சிறப்புப் பேருந்து இயக்கும். அதில் ஆண்கள் ஏற அனுமதி கிடையாது.
இது அனைத்துப் பயணிகளுக்குமான பொதுப் பேருந்து, இதில் பயணிக்கும் பெண்களுக்கு மட்டும் கட்டணமில்லை. ஆண்களுக்கு வழக்கம் போல் பயணச்சீட்டு உண்டு. முன்பகுதியில் பெண்களுக்கு ஒதுக்கப்பட்ட இருக்கைகள் போக,மற்ற இடங்களில் யார் வேண்டுமானாலும் அமரலாம்.
இருப்பினும், திட்டம் தொடங்கப்பட்ட வேகத்தில் பொதுமக்களுக்கு இதுபற்றிய தெளிவான வழிகாட்டுதல்கள் போய்ச் சேரவில்லை. “அரசாங்கம் எங்களுக்குத்தான் இந்த பஸ்ஸை இலவசமாக விட்டிருக்கு.. இதில் ஆண்கள் வந்து கூட்ட நெரிசலை ஏற்படுத்தக் கூடாது” என்ற தவறானஎண்ணம் சில பெண் பயணிகளிடையே உருவாகியுள்ளது. இதனால், அலுவலகம் மற்றும் கூலி வேலைகளுக்குச் செல்லும் சாதாரண ஆண் பயணிகள், பேருந்துக்குள் ஏறும்போதே குற்றவாளிகளைப் போலப் பார்க்கப்படும் சூழல் ஏற்பட்டுள்ளது.
ஆண்களுக்கு டிக்கெட் கொடுக்க நடத்துநர் செல்லும்போது, “அவங்களை எதுக்கு வண்டில ஏத்துனீங்க? முதல்ல அவங்களை இறக்கி விடுங்க” என்று சில பெண் பயணிகள் நடத்துநர்களிடம் வாதிடுகின்றனர். மறுபுறம், காசு கொடுத்து டிக்கெட் வாங்கும் ஆண்கள், “நாங்க காசு கொடுத்துதான் போறோம்... எங்களை இறங்கச் சொல்ல நீங்க யாரு?” என்று திருப்பிக் கேட்கும்போதுநிலைமை கைகலப்பாக மாறுகிறது.
பேருந்து நிலையங்களி லும் சிக்னல்களிலும் வண்டியை நிறுத்திவிட்டு, பயணிகளைச் சமாதானப்படுத்துவதிலேயே ஊழி யர்களின் நேரம் வீணாகிறது. ஒரு சில இடங்களில் வாக்குவாதம் முற்றி பயணிகள் ஒருவரையொருவர் தாக்கிக்கொள்ளும் வீடியோக்களும் சமூக வலைதளங்களில் வெளியாகிப் பொதுமக்களிடையே அதிர்ச்சியை ஏற்படுத்தியுள்ளன.
ஆனால், முறையான விழிப்புணர்வு இல்லாமல் அது சக பயணிகளுக்கு இடையேயான பகையாகவும், பொது அமைதியைச் சீர்குலைக்கும் களமாகவும் மாறுவதைத் தடுக்க அரசு உடனடி நடவடிக்கை எடுக்க வேண்டும் என்று பொதுமக்கள் கோரிக்கை விடுத்துள்ள னர்.