கோவை, அக். 9 –
கோவை அரசு மருத்துவமனையில் வழங்கப் பட்ட மாத்திரை கவரில் தமிழ், ஆங்கிலம் ஆகியவற்றுடன் இந்தி மொழியும் இருந்ததாக சர்ச்சை எழுந்துள்ளது.
கோவை அரசு மருத்துவமனைக்கு கோவை மட்டுமின்றி திருப்பூர், ஈரோடு, நீலகிரி உள்ளிட்ட மாவட்டங்களை சேர்ந்த ஏராளமான நோயாளிகள் தினமும் சிகிச்சைக்காக வந்து செல்கின்றனர். உள்நோயாளிகள் மற்றும் புறநோயாளி களுக்கு சிகிச்சை அளிக்கப்பட்டு, மருத்துவர்களின் பரிந்துரைப்படி பல்வேறு வகையான மாத்திரைகள் வழங்கப்பட்டு வருகின்றன.
இதற்காக, மருத்துவமனையில் பயன்படுத்தப்படும் மாத்திரை கவர்களில் காலை, மதியம், மாலை, இரவு என மாத்திரை பயன்படுத்தும் முறை உள்ளிட்ட விவரங்கள் அச்சிடப்பட்டு வழங்கப்படுவது வழக்கம். இந்நிலையில், சமீபத்தில் கோவை அரசு மருத்துவமனையில் நோயாளிகளுக்கு வழங்கப்பட்ட மாத்திரை கவர்களில் தமிழ் மற்றும் ஆங்கில மொழிகளுடன் இந்தி மொழியிலும் வாசகங்கள் இடம்பெற்றிருந்தது.
இதனை கவனித்த நோயாளிகள் மற்றும் சமூக ஆர்வலர்கள், தமிழகத்தில் உள்ள அரசு மருத்துவமனையில் வழங்கப்படும்
மாத்திரை கவரில் இந்தி மொழி இடம்பெற்றிருப்பது ஏன்? என கேள்வி எழுப்பினர். மேலும் தமிழகத்தில் தமிழ் மற்றும் ஆங்கிலம் நடைமுறையில் உள்ள நிலையில், மூன்றாவது மொழியாக இந்தி மொழி திணிக்கப்படுவதா கவும் சிலர் குற்றம்சாட்டினர்.
மேலும், கோவை அரசு மருத்துவமனையில் இந்தி மொழியுடன் வழங்கப்பட்ட மாத்திரை கவர்கள், புகைப்படங்கள் சமூக வலை தளங்களில் வைரலானது. இந்த விவகாரம் மருத்துவமனை நிர்வாகத்தின் கவனத்திற்கு சென்ற நிலையில், மருத்துவமனை டீன் உத்தரவின் பேரில் நேற்றிரவு இந்தி மொழி இடம்பெற்றிருந்த மாத்திரை கவர்கள் மாற்றப்பட்டன.
பின்னர், இந்தி மொழி இல்லாத புதிய மாத்திரை கவர்களில் நோயாளிகளுக்கு மருந்துகள் வழங்கப்பட்டது. இந்த சம்பவம் அரசு மருத்துவமனை வட்டாரத்தில் பரபரப்பை ஏற்படுத்தியுள்ள நிலையில், மாத்திரை கவர்களில் எந்த மொழிகளில் விவரங்கள் இடம்பெற வேண்டும், அவை எந்த அடிப்படையில் அச்சிடப் பட்டன, மருத்துவமனை நிர்வாக த்தின் அனுமதியுடன் தான் இந்த கவர்கள் பயன்படுத்தப்பட்டன வா? என்பது உள்ளிட்ட கேள்விகளும் எழுந்துள்ளன.
மேலும், அரசு மருத்துவமனைகளில் நோயாளிகளின் பயன்பாட்டிற்காக வழங்கப்படும் பொருட்களில் தமிழகத்தின் மொழிக் கொள்கை மற்றும் நோயாளிகளின் புரிதலுக்கு முக்கியத்துவம்அளிக்க வேண்டும் எனவும் சமூக ஆர்வல ர்கள் வலியுறுத்தியுள்ளனர். மேலும், இந்தி இடம் பெற்ற மாத்திரை கவர்கள் எவ்வளவு காலமாக பயன்படுத்தப்பட்டன? அவை எங்கிருந்து கொள்முதல் செய்யப்பட்டன? எத்தனை கவர்கள் நோயாளிகளுக்கு வழங்கப்பட்டுள்ளன? தற்போது அவை முழுமையாக திரும்பப் பெறப்பட்டுள்ளனவா? என்பது குறித்தும் விசா ரணை நடத்தப்பட வேண்டும் என்ற கோரிக்கை எழுந்துள்ளது. கோவை அரசு மருத்துவமனைகளில் வட மாநிலத்தை சேர்ந்த பலரும் சிகிச்சை பெற வருவதால் அவர்களுக்கு புரியும் வகையில் இந்தி வாசகம் இடம் பெற்று இருப்பதாகவும் கூறப்படுகிறது. இது தொடர்பாக மருத்துவமனை டீன் தொடர்பு கொண்ட போது அவர் பிறகு பேசுவதாக கூறி, கவர்கள் சர்ச்சை குறித்து பேச மறுத்துவிட்டார்.
இது குறித்து மருத்துவமனையின் ஆர்.எம்.ஓ சரவணபிரியா கூறுகையில், “மாத்திரை கவர் குறித்த சர்ச்சை எழுந்தவுடன் டீன் உத்தரவின் பேரில் மாத்திரை கவர்கள் உடனடியாக மாற்றப்பட்டது. ஆனால், டெண்டர் அடிப்படையில் கவர்கள் சிந்தாமணியிடம் இருந்து தான் பெறப்பட்டு வருகிறது.
இப்போது இந்த சர்ச்சை எழுந்துள்ளது” என்றார்.