“ஜ
னநாயகத்தின் தொட்டில்” (Cradle of Democracy) என்று ஆதவன் மறையாக ஆங்கில சாம்ராஜ்யமான இங்கிலாந்து நாட்டின் ஆட்சிமுறையை வரலாற்று ஆசிரியர்கள் வருணித்துள்ளார்கள். அந்த இங்கிலாந்து நாட்டின் ஆட்சிமுறையை பின்பற்றிய இந்தியா ஒரு காலக்கட்டத்தில் விடுதலை பெற்றபின்னர், ஜனநாயக ஆட்சிமுறையை பின்பற்றி செயல்படத் தொடங்கியது. ஆனால், இந்திய ஒன்றியத்தோடு சமகாலத்தில் விடுதலை பெற்ற அண்டைநாடான பாகிஸ்தான், சர்வாதிகார ஆட்சிமுறையை பின்பற்றி செயல்பட தொடங்கியது. அவ்வாறே இந்தோனேசியாவும் சர்வாதிகார ஆட்சிமுறையை ஏற்றுக்கொண்டு செயல்பட்டு வந்தது. அன்றைய பாகிஸ்தான் அதிபராக இருந்த அதிபர் அயூப்கானிடம் தாங்கள் சர்வாதிகார ஆட்சிமுறையை ஏற்றுக்கொண்டவர்தானே என்று பத்திரிக்கையாளர்கள் கேள்வி எழுப்பியபொழுது, அதிபர் அயூப்கான் எங்கள் நாட்டில் “பாதுகாக்கப்பட்ட ஜனநாயக ஆட்சி” (Protected Democracy) முறைதான் செயல்படுத்தப்படுகிறது என்று கூறினார்.
அதுபோன்றே இந்தோனேசிய நாட்டின் அதிபர் சுகர்னோவிடம் கேட்டபொழுது, அவர் சொன்னார் “எங்கள் நாட்டில் தூண்டிவிடப்பட்ட ஜனநாயக ஆட்சிமுறையை” (Induced Democracy) ஏற்றுக்கொண்டு செயல்படுத்துகிறோம் என்று பதில் கூறினார். எனினும் இவற்றிற்கு மாறாக ஜனநாயகத்தின் தொட்டில் என்று அறியப்பட்ட இங்கிலாந்து நாட்டில் ஆட்சிமுறை 1930களில் ஜனநாயகப் பாதையிலிருந்து தடம்மாறிச்சென்ற நிலையைக் கண்டித்து அறிஞர் பெர்ணாட்ஷா, தனது “ஆப்பிள்கார்ட்” (Apple Cart) என்ற நாடகத்தின் மூலமாக இங்கிலாந்தின் திசைமாறிய ஜனநாயக ஆட்சிமுறை கடுமையாகக் கண்டித்தார் என்பது வரலாறு.
இதுபோன்ற ஒரு வித்தியாசமான, வேறுபட்ட சூழ்நிலையில் ஜனநாயக ஆட்சிமுறையில் இன்று உருவாகியுள்ளது. ஆம்! இந்திய நாட்டின் தேர்தல் ஆணையம் வாக்காளர் பட்டியலில் மேற்கொண்ட சிறப்பு தீவிர திருத்தத்தின் (Special Intensive Revision) மூலம் ஜனநாயகத்திற்கு குடும்ப கட்டுப்பாடு அறுவைச் சிகிச்சை முறையில் செய்திருப்பதாகவே அரசியல் ஆய்வாளர்கள் வாதப்பிரதிவாதங்களை முன்வைக்கிறார்கள். அந்த வகையில், சமீபத்தில் தமிழ்நாடு உள்ளிட்ட மாநிலங்களில் நடைபெற்ற பொதுத்தேர்தல்களில், தேர்தல்கள் நடைபெறுவதற்கு முன்னரே இந்த குடும்ப கட்டுப்பாடு அறுவைச் சிகிச்சையின் மூலம், ஒன்றியத்தில் ஆட்சிப்பொறுப்பிலுள்ள ஆளும் பாரதீய ஜனதாக் கட்சிக்கு எதிரான வாக்காளர்களாக கருதப்படும் வாக்காளர்களின் பெயர்களை, வாக்காளர் பட்டியலின் வரிசையிலிருந்து நீக்கப் பட்டுள்ளது வெளிப்படையாகவே தெரியவந்துள்ளது.
இதன்மூலம் நீக்கப்பட்டுள்ள வாக்காளர்களின் பெயர்கள் சட்டப்படியான நடவடிக்கையின் மூலம் நடைபெற்றதாகத் தெரியவில்லை. ஆளுங்கட்சியான பாரதீய ஜனதாக் கட்சியின் அரசியல் லாபத்திற்காக மட்டுமே இந்திய தேர்தல் ஆணையத்தால் (Election Commission of India) மேற்கொள்ளப்பட்டுள்ளது என்பது இன்றைய தேர்தல் ஆணையம் தொடர்பான அதிர்ச்சியூட்டும் செய்திகளால் அறியமுடிகிறது.
இந்திய தேர்தல் ஆணையத்தின் சிறப்பு தீவிர வாக்காளர் பட்டியல் திருத்தமானது மதச்சார்போடுகூடிய உள்நோக்கம் கொண்டதாகவே கருதப்படுகிறது. இந்த ஒருதலைப்பட்சமான நடவடிக்கையின்மூலம் ஜனநாயக அமைப்புமுறையின் அடித்தளம் ஆட்டம் காண்பதோடு உண்மையான ஜனநாயகத்தின் மக்கள் பெரும்பான்மை என்றக் கோட்பாட்டை கேள்விக்குறியாக்கியுள்ளது. பல்வேறு மொழி பேசுகின்ற பண்பாட்டைப் பின்பற்றுகிற கலாச்சாரங்களை வாழ்வியலாக கொண்டிருக்கிற மக்கள் வாழும் பரந்துபட்ட இந்திய நாட்டில் ஒரு கட்சி ஆட்சி தொடர்ந்து நடைபெறுவதற்கான வாய்ப்பை உருவாக்கும் நோக்கத்தின் அடிப்படையில் வாக்களிப்பவர்களுக்கு மட்டுமே வாக்குரிமை வந்ததன்மூலம் வாக்குரிமையை இழந்தவர்கள், வேரற்ற மரங்களாய் உரிமையில்லாத இந்திய குடிமக்களாக சொந்த நாட்டிலேயே புறக்கணிக்கப்படுவது வேதனைகளின் உச்சமாகும்.
ஆம்! அவர்களது வாக்களிக்கும் உரிமை இந்திய தேர்தல் ஆணையத்தின் இந்த சிறப்பு தீவிர வாக்காளர் பட்டியல் திருத்தத்தின் மூலம் (SIR) நிரந்தரமாக நீக்கப்பட்டு இந்த விபரீத குடும்பக் கட்டுப்பாடு அறுவைச் சிகிச்சை மூலம் வாக்குரிமை பறிக்கப்பட்டிருப்பது “ஒரு தாய் குழந்தைபெறும் இயற்கையின் நியதியை பறிப்பதுபோல் ஆகிறது”. “கருவறையிலே கல்லறை கட்டும் கொடுமை” இந்திய தேர்தல் ஆணையம் உண்மையான வாக்காளர்களின் வயிற்றெரிச்சலுக்கு ஆளாகியிருப்பதை அனைத்து தரப்பு மக்களும் நன்கு அறிவர்.
தேர்தல் ஆணையத்தினுடைய தலைவர் ஞானேஷ்குமார்தான் இந்த குடும்ப கட்டுப்பாடு அறுவைச் சிகிச்சை நடவடிக்கை களுக்கும், கருவறையிலேயே கல்லறை கட்டிய கொடுஞ் செயலுக்கும் பொறுப்பாவார். அவரைத் தவிர்த்து மற்ற இரண்டு ஆணையாளர்கள் தலைமை ஆணையாளர் ஞானேஷ்குமார் கடந்தகாலத்தில் எடுத்த முடிவுகள் பற்றி எங்களுக்கு எதுவும் தெரியாது. அவரும் அவற்றைப்பற்றி எங்களுக்கு தெரிவிக்க வில்லை என்று வெளிப்படையாகவே தெரிவித்திருப்பது தலைமை தேர்தல் ஆணையர் ஞானேஷ்குமாரின் சர்வாதிகாரப் போக்கை படம்பிடித்துக் காட்டுகிறது.
இதில் குறிப்பாக ஆழ்ந்து பரிசீலிக்க வேண்டியது எதுவெனில், தலைமை ஆணையாளரின் பின்புலமும் அவரது கடந்தகால பணி குறித்த விபரங்களையும் அறிந்து கொள்வது இந்த சூழ்நிலையில் அவசியமானதும் தவிர்க்க முடியாததும் ஆகிறது. அதற்கு உதாரணமாகவே ஞானேஷ்குமார் கேரள மாநிலத்தில் பொதுப்பணித்துறை செயலாளராக அவர் பணியாற்றியபொழுது, அவரது துறையில் நடந்த ஊழல்கள்பற்றி விசாரிப்பதற்கு இப்போது கேரளஅரசு ஆணை பிறப்பித்திருப்பது அனைவரையும் ஆச்சரியத்தில் ஆழ்த்தியுள்ளது.
எனவே, தேர்தல் ஆணையத்தினுடைய தலைவர் ஞானேஷ்குமாரின் கடந்தகாலங்களில் பணியாற்றிய பொறுப்புகளில் அவரது நடவடிக்கைகள் விமர்சனங்களுக்கு அப்பாற்பட்டதாக தெரியவில்லை என்பதை புரிந்துகொள்ள முடிகிறது. அவரும் அவரது குடும்ப உறுப்பினர்களும் இன்றைக்கும் பல்வேறு உயர்பதவிகளில் பணியாற்றி கொண்டிருக்கின்றனர்.
மேலும் ஆணையத் தலைவர் செய்த தவறுகளுக்காக நாடாளுமன்றத்தில் அவருக்கு எதிராக நம்பிக்கையில்லா தீர்மானம் (Impeachment) கொண்டுவர வேண்டும் என்பதே நடுநிலை யாளர்களின் எதிர்பார்ப்பாகும். ஆனால், இன்றைய சூழ்நிலையில் அத்தகைய நம்பிக்கையில்லா தீர்மானம் கொண்டுவந்து நிறைவேறுவதற்கான வாய்ப்பேயில்லை. அவர் ஓய்வுபெற்ற பின்னரும்கூட இதற்காக அவர்மீது நடவடிக்கை எடுக்க முடியாது என்கின்ற சட்டபாதுகாப்பும் அவருக்கு
இருக்கிறது.
எனவே, அவர் உடனடியாக தனது பதவியை ராஜினாமா செய்ய வேண்டும் அல்லது ஒன்றிய அரசு அவரை பதவியிலிருந்து பணிநீக்கம் செய்ய வேண்டும் அல்லது உச்சநீதிமன்றம் அவரை பதவியிலிருந்து நீக்குவதற்கானவழிமுறைகளை உருவாக்க வேண்டும். இதன் முன்முயற்சியாகத்தான் இளைஞர்கள், மாணவர்கள் மற்றும் நல்லெண்ணம் கொண்டவர்கள் ஜந்தர் மந்தரில் கூடி இணைந்து நாட்டின் தலைநகர் “ஜந்தர்மந்தரில்” தொடர்ந்து போராட்டத்தை முன்னெடுத்துக் கொண்டிருக்கிறார்கள்.சமீபத்தில் ஏறத்தாழ ஆயிரம் போராட்டக்காரர்கள் கைதுசெய்யப்பட்டு விடுவிக்கப்
பட்டிருக்கின்றனர்.
இதனைத்தொடர்ந்து இருபால் இளைஞர்கள் சார்புடைய “கரப்பான் பூச்சி ஜனதாக் கட்சியின்” (Cockroach Janatha Party) நிர்வாகிகள் இணைந்து எதிர்வரும் அக்டோபர் 10ஆம் தேதியன்று ஜந்தர் மந்தரில் இந்திய தேர்தல் ஆணையத்தினுடைய தலைவர் ஞானேஷ்குமார் தனது சட்டவிரோத நடவடிக்கைகளுக்கு தார்மீகப்பொறுப்பேற்று உடனடியாக ராஜினாமா செய்ய வேண்டும் என்ற வலுவான கோரிக்கைகளை முன்வைத்தும் அவரது அறிவிக்கப்படாத மேலே சொன்ன குடும்ப கட்டுப்பாடு அறுவைச் சிகிச்சைமூலம் செய்த வாக்குரிமை பறிப்பிற்கு சட்டநடவடிக்கை மேற்கொள்ள வேண்டும் என்றும் தொடர்ந்து போராட்டத்தை நடத்தவுள்ளதாகவும் அறிவித்திருக்கிறார்கள். இந்தப் போராட்டங்களின் நியாயங்களை எந்த சூழ்நிலையிலும் யாராலும் நிராகரிக்க
வியலாது.
இத்தகைய நாடும் என்றும் கண்டிராத அசாதாரண அரசியல் சூழ்நிலையில் சிறப்பு தீவிர வாக்காளர் பட்டியல் திருத்தத்தின் அடிப்படையில், நடைபெற்ற தமிழ்நாடு உள்ளிட்ட ஐந்து மாநில சட்டமன்றத்திற்கு நடந்த பொதுத் தேர்தல்களின் முடிவுகள் எப்படி நியாயமானதாக இருக்க முடியும்? திராவிட மாடல் ஆட்சியின் நிறுவனர், உலகம் தழுவிய தமிழினத்தின் கலங்கரை விளக்கம் எங்கள் தலைவர் முத்துவேல் கருணாநிதி ஸ்டாலின் அவர்களின் கொளத்தூர் சட்டமன்றத் தோல்வி என்பது இந்த ஜனநாயக படுகொலைக்்கான திட்டமிட்ட சதியாகவே அனுமானிக்கத் தோன்றுகிறது.
இந்த வினாவிற்கு விடைகாணும் டெல்லியில் இன்னொரு படையெடுப்பாகத்தான், இருபால் மாணவர்களும் சேர்ந்து கரப்பான் பூச்சி ஜனதாக் கட்சியோடு கைகோர்த்து களம் காண்பதன்மூலம் “வற்றிய குளத்தில் புது வெள்ளம் பாய்வதுபோல்” இந்திய ஜன நாயகத்திற்கு புது இரத்தம் பாய்ச்ச, புதுயுகம் படைக்க புறப்பட்டிருப்பதைப் பார்த்து ஒன்றிய ஆட்சியாளர்கள் அச்சமும் கவலையும் அடைந்துள்ளார்கள்.
இந்திய ஜனநாயகத்தைப் பாதுகாக்க இளைஞர்கள் “ஜந்தர் மந்தரில்” மேற்கொள்ளும் போராட்டம் இந்திய ஜனநாயகம் வலுவும் பொலிவும் பெறுவதற்கு ஊட்டமாகும்!! அதற்கு ஜனநாயகத்தின் தூண்களான பாராளுமன்றமும், பத்திரிக்கைத் துறையும், நீதித்துறையும், நிர்வாக துறையும் தன் பங்களிப்பை வரலாற்றின் பக்கங்களில் பதிவு செய்யட்டும்!!! இந்திய ஜனநாயகத்தைப் பாதுகாக்க எந்த விலையும் கொடுக்க தயார்நிலையில் இருக்கும் எங்கள் தளபதியார் தலைமையில் இயங்கும் திராவிட முன்னேற்றக் கழகம் இந்த ஜனநாயக பாதுகாப்பு போராட்டத்திற்கும் தயாராகும் என்பதில் ஐயமில்லை!