சிவகங்கை, அக். 10–
சிவகங்கை மாவட்டம் சிங்கம்புணரி அருகே சூரக்குடி ஊராட்சிக்கு உட்பட்ட உள்ள சிலநீர்பட்டி, ஒத்தப்பட்டி உள்ளிட்ட பல்வேறு பகுதிகளில் அடிக்கடி மணல் கடத்தப்படுவதாக கிராம மக்கள் சிங்கம்புணரி வருவாய்த்துறை யினருக்கும், காவல்துறையினருக்கும் தகவல் தெரிவித்து வந்தனர். ஆனால் இதுவரை இரண்டு துறைகளும் கண்டும் காணாமல் இருந்து வந்ததாக குற்றம் சாட்டிய கிராம மக்கள், இன்றும் சிலநீர்பட்டி கிராமத்தில் தனியார் பட்டா நிலத்தில் அரசு அனுமதி இன்றி மணல் அள்ளுவதை அறிந்த கிராமத்து இளைஞர்கள், கிராம உதவியாளரான தலையாரி சுரேஷ்க்கு தகவல் தெரிவித்துள்ளனர்.
தகவல் அறிந்து சம்பவ இடத்துக்கு தலையாரி சென்ற போது மண் அள்ளும் இயந்திரமான ஹிட்டாச்சி வாகனம் மூலம் லாரியில் மண் அள்ளி கொண்டு இருந்துள்ளனர். அப்போது சட்டவிரோதமாக மணல் அள்ளுவதை தலையாரி, தடுத்து நிறுத்த முயன்றுள்ள தாகவும், அப்போது மண் அள்ளிய மர்ம நபர்கள் தலையாரியை தகாத வார்த்தைகளால் பேசி தாக்கியுள்ளதாகவும் கூறப்படுகிறது.
தகவல் அறிந்து அப்பகுதி கிராம மக்கள் சம்பவ இடத்திற்கு சென்ற பொழுது ஹிட்டாச்சி வாகனத்தை மட்டும் விட்டுவிட்டு அங்கிருந்து மற்ற வாகனங்களை எடுத்துக் கொண்டு மர்ம நபர்கள் தப்பி ஓடி உள்ளனர். பின்பு ஹிட்டாச்சி வாகனத்தை சிறை பிடித்து கிராம இளைஞர்கள், கிராம நிர்வாக அலுவலருக்கு தகவல் தெரிவித்துள்ளனர்.
இச்சம்பவம் தொடர்பாக கிராம நிர்வாக அலுவலர் எஸ்வி மங்கலம் காவல் நிலையத்தில் புகார் அளித்துள்ளார். அவரது புகாரின் அடிப்படையில் போலீசார் வழக்கு பதிவு செய்து விசாரணை நடத்தி வருகின்றனர்.
சட்டவிரோதமாக மணல் கடத்திச் சென்ற வாகனங்களை தடுத்து நிறுத்த முயலும் தலையாரி அல்லது கிராம உதவியாளர்கள், போலீசார் ஆகியோர் மணல் மாஃபியாக்கள், சமூக விரோதிகளால் தாக்கப்படும் சம்பவங்கள் தொடர்ந்து நடந்து வருகின்றன. இதுபோன்ற தாக்குதல்களில் ஈடுபடுபவர்கள் மீது கொலை முயற்சி மற்றும் அரசு ஊழியரை பணி செய்யவிடாமல் தடுத்தல் ஆகிய கடுமையான சட்டப்பிரிவுகளின் கீழ்போலீசார் வழக்குப்பதிவு செய்து நடவடிக்கை எடுக்க வேண்டும் என கிராமபொதுமக்கள் மற்றும் சமூக ஆர்வலர்கள் கோரிக்கை விடுத்து வருகின்றனர்.