#Title

இருபது பல்கலைக்கழகங்களில் துணைவேந்தர்கள் இல்லை; பொறுப்புத் துணைவேந்தர் நியமனம் சட்டத்திற்குப் புறம்பானது; தவறான முன்மாதிரி! சென்னைப் பல்கலைக்கழக ஓய்வாசிரியர் பேரவை சார்பில் மா.செல்வராசன் அறிக்கை!

சென்னை, அக்.10–

தமிழ்நாட்டில் சென்னைப் பல்கலைக்கழகம் முதலாக மாநிலப் பல்கலைக்கழகங்கள் இருபத்து ஒன்று இருக்கின்றன. இருபது பல்கலைக்கழகங்களில் துணைவேந்தர் பதவிகள் நிரப்பப்படாமல் வெற்றிடங்களாக உள்ளன. குறிப்பாக, 1857–ஆம் ஆண்டில் தொடங்கப்பெற்ற இந்தியாவின் மூத்த தமிழ்நாட்டின் முதல் பல்கலைக்கழகமான சென்னைப் பல்கலைக்கழகம் 20-.08.-2023 முதல் முப்பத்தேழு மாதங்களாகத் துணைவேந்தர் இல்லாமல் தொய்ந்து கிடக்கின்றது.

ஒரு துணைவேந்தர் பதவிக் காலம் முடிந்ததும் அடுத்த நாளே புதிய துணைவேந்தர் பொறுப்பேற்பது 1976 வரை நடைமுறையில் இருந்து வந்தது. ஆனால் அதன் பிறகு ஆளுநருக்கும் அரசுக்கும் முரண்பாடு ஏற்பட்டதால் துணைவேந்தர் நியமனங்களில் காலத்தாழ்வு ஏற்பட்டது.

துணைவேந்தரை நியமிக்கும் அதிகாரம் ஆளுநரிடம் இருப்பதால்தான் இந்தத் துயரம் என்பதை உணர்ந்து. அன்றைய முதல்வர் மு.க.ஸ்டாலின் அவர்கள் ஆளுநருக்கு இருந்த துணைவேந்தர் நியமன அதிகாரத்தை அரசுக்கு,அதாவது முதலமைச்சருக்கு மாற்றிச் சட்டத் திருத்தம் கொண்டுவந்தார். அச்சட்டத்தை உச்ச நீதிமன்றம் ஏற்றுத் தீர்ப்பு வழங்கினாலும் அரசியல் உள்நோக்கத்தோடு தொடுக்கப்பட்ட வழக்கால் முடிவு உயர்நீதிமன்றத்திற்கும் உச்சநீதிமன்றத்திற்கும் இடையே ஊசல் ஆடிக்கொண்டிருக்கின்றது.

வழக்கு நிலுவையில் இருப்பதற்கு ஒன்றிய அரசே உட்காரணம் என்பது உணரக்கூடிய ஒன்று. நீதி மன்றங்களோ ஒரு மாநிலத்தின் உயர்கல்வி உறங்குவதைக்கண்டு ஒரு சிறிதும் உணராமல் ஒத்திவைத்துக் கொண்டுள்ளன. வழக்கு நிலுவையில் இருந்தாலும் தீர்ப்பு வரும் வரையில் இருக்கின்ற பல்கலைக்கழகச் சட்டத்தைப் பயன்படுத்தித் துணைவேந்தர்களை நியமிக்கலாம்.

ஒன்றிய அரசோடு ஒத்துப் போகின்ற இந்த அரசு ஆளுநரை வழிக்குக் கொண்டுவராமல் பொறுப்புத் துணைவேந்தர்களை நியமிக்கும் புதுப் போக்கினை நடைமுறைப்படுத்த முயல்வது துணைவேந்தர் நிலையைத் தாழ்த்துவதாக உள்ளது!

சென்னைப் பல்கலைக்கழகச் சட்டம் 1923 தனிச்சிறப்பு வாய்ந்தது. இந்தச் சட்டத்தின. அடிப்படையிலேயே மற்றப் பல்கலைக்கழகங்களின் சட்டங்கள் உருவாக்கப்பட்டுள்ளன்.செனட் சிண்டிகேட், ஆளுநர் தேர்ந்தெடுக்கும் மூன்று கல்வியாளர்களைக் கொண்ட தேடற்குழு நீண்ட ஆய்விற்குப் பிறகு பரிவுரை செய்யும் மூன்று கல்வியாளர்களுள் அல்லது பல்கலைக்கழக நிலையிலான மூன்று பேராசிரியர்களுள் ஒருவரை ஆளுநர் நியமிக்க வேண்டும் என்பது சென்னைப் பல்கலைக்கழகச் சட்டம்.

இந்த நடைமுறைக்கு மாறாகப் பல்கலைக்கழகத்தில் பணியாற்றும் மூத்த பேராசிரியர்களுள் ஒருவரைப் பொறுப்புத் துணைவேந்தராக நியமிப்பது பல்கலைக்கழகச் சட்டத்திற்கு எதிரானது; தவறான முன்மாதிரியைத் தருவது. நூற்றுக்கு மேற்பட்ட கல்வியாளர் விண்ணப்பங்களை ஆராய்ந்து தேர்ந்தெடுக்கும் மூவர்க்குள்ள தனித்திறன் சிண்டிகேட் மூலம் தேர்ந்தெடுக்கப்படும் ஒருவருக்கு முழுமையாக இருக்கும் என்று கூற முடியாது.

பல்கலைக்கழகத்தில் பணியாற்றும் ஒருவரிடம் துணைவேந்தர் பொறுப்பை முழுமையாக அளிப்பதால் விருப்பு வெறுப்புக்கு இடமளிக்க வாய்ப்புள்ளது.

மேலும் முன்பே குறிப்பிட்டதுபோல் துணைவேந்தர் நிலையைத் தாழ்த்துவதாகும். ஓர் எந்திரத்தை வைத்தால்கூட் விதி மீறாமல் இயங்கும். ஆனால் வளர்ச்சிதான் வராது.

ஒன்று; வழக்கை விரைவாக முடித்து நல்ல தீர்ப்பைப் பெறுவது!

இரண்டு ; வழக்கில் காலத் தாழ்வு ஏற்படுவதால் நீதி மன்ற இசைவுடன இருக்கின்ற சட்டப்படி முழுநேரத் துணைவேந்தரை நியமிப்பது!

மூன்று : துணைவேந்தர் இல்லாத போது ஆட்சி மன்ற உறுப்பினர் உட்குழு பொறுப்பேற்பது தவறுகள் நடவாமல் இருக்க வாய்ப்பாகும்! எனவே இப்போதுள்ள குழுவை அவ்வப்போது மாற்றி அமைத்தால் போதும்!

நான்கு: பொறுப்புத் துணைவேந்தர்

என்ற புதுப்போக்கு பொருத்தமற்றது; பல் கலைக்கழகச் சட்டத்திற்குப் புறம்பானது; தவறான முன்மாதிரி ஆவது. எனவே இந்த முயற்சியை அல்லது முடிவை இந்த அரசு கைவிடுவது நல்லது.

இவ்வாறு சென்னைப் பல்கலைக்கழக ஓய்வாசிரியர் பேரவைத் தலைவரும் சென்னைப் பல்கலைக்கழக ஆசிரியர் பேரவை மேனாள் தலைவரும் ஆன பேரா சிரியர் மா.செல்வராசன் அறிக்கையில் தெரிவித்துள்ளார்.