சென்னை, அக்.10–
திராவிட வெற்றிக் கழகத் தலைவர் மல்லை சத்யா விடுத்துள்ள அறிக்கை வருமாறு:–
இந்தித் திணிப்பு குறித்து கேட்டால் எல்லா பூட்டுக்கும் ஒரே சாவி என்பதைப் போன்று எல்லா கேள்விகளுக்கும் ஒரே பதில் கடந்த ஆட்சி என்று மாக்கியவல்லி அரசியல் கருத்தியலை உள்வாங்கி பொறுப்பற்ற முறையில் பதில் சொல்லி வருகிறார்கள். த.வெ.க. அமைச்சர்கள் அதில் ஒன்று அரசு பொது மருத்துவமனையில் நோயாளிகளுக்கு மாத்திரை வைத்து கொடுக்கும் பேப்பர் உறையில் காலை, மதியம், மாலை, இரவு என்று தமிழுக்கு அடுத்து இந்தியும் அடுத்து ஆங்கிலத்திலும் மும்மொழியில் அச்சாகி இருப்பது குறித்து சுகாதாரத் துறை அமைச்சர் அருண் குமாரிடம் கேள்வி எழுப்பினால் எல்லாவற்றுக்கும் காரணம் கடந்த ஐந்தாண்டுகால தி.மு.க. ஆட்சி. முன்னாள் முதலமைச்சர் தலைவர் தளபதியும் அப்போதைய சுகாதாரத் துறை அமைச்சர் மா.சுப்பிரமணி அவர்களும்தான் காரணம் என்று பொறுப்பற்ற முறையில் பதில் சொல்லி உள்ளார்.
மேற்கு மண்டலம் கோவை, திருப்பூர், ஈரோடு, கரூர் ஆகிய பகுதிகளில் வட இந்தியர்கள் அதிகமாக பணியாற்றுகின்றார்கள். எனவே இந்தி மொழியில் அச்சடிக்கப்பட்டது என்று அரசு தரப்பில் நியாயம் கற்பிப்பார்களேயானால் வட இந்தியாவில் இருந்து பணியாற்றும் தொழிலாளர்கள் பெரும்பாலோர் இந்தி மொழி பேசாத மேற்கு வங்கம், அஸ்ஸாம், மணிப்பூர், மகாராட்டிர, ராஜஸ்தான் ஒரிசா போன்ற மாநிலத்தைச் சேர்ந்தவர்கள் தங்கள் தாய் மொழியில்தான் பேசுவார்கள். அதிலும் சிலருக்கு இந்தி மொழியை பேசத் தெரியுமே அன்றி படிக்கத் தெரியாது என்பதை சுட்டிக் காட்ட விரும்பு கின்றேன்.
தி.மு.க. ஆட்சி முடிந்து த.வெ.க. ஆட்சி10.05.2026 அன்று பதவி ஏற்று மாதங்கள் ஐந்து உருண்டோடி கொண்டு இருக்கிறது. இந்த ஐந்து மாத காலங்களாக சுகாதாரத் துறையில் என்ன நடக்கிறது என்று ஆய்வு செய்யாமல் கோமா நிலையில் இருந்தாரா சுகாதாரத்துறை அமைச்சர் அருண் குமார் என்று நாட்டு மக்கள் கேட்கிறார்கள். எப்பக்கம் வந்து புகுந்துவிடும் இந்தி எத்தனைப் பட்டாளம்
கூட்டிவரும் அற்பமென்போம் அந்த இந்திதனை அதன் ஆதிக்கம் தன்னைப் புதைத்திடுவோம் வாரீர். என்றும் மறுமலர்ச்சிப் பாதையில்…
இவ்வாறு அவர் அறிக்கையில் தெரிவித்துள்ளார்.