சென்னை, அக். 11–
ஒன்றிய அரசு, தேர்தல் முறைகேடுகளை கண்டித்து போராட்டம் நடத்த டெல்லி செல்லும் இளைஞர்களின் பயணத்தை தடுக்கும் நடவடிக்கைகளுக்கு எதிர்க்கட்சித் தலைவர் உதயநிதி ஸ்டாலின் அவர்கள் கண்டனம் தெரிவித்துள்ளார்.
இது குறித்து அவர் வெளியிட்டுள்ள அறிக்கை வருமாறு
தேர்தல் முறைகேடு களைக் கண்டித்தும், தலைமைத் தேர்தல் ஆணையர் ஞானேஷ் குமார் பதவி விலகக் கோரியும் போராட்டம் நடத்துவதற்காக நாட்டின் தலைநகர் டெல்லியை நோக்கிச் செல்லும் இளைஞர்களின் பயணத்தைத் தடுக்க ஒன்றிய அரசு மேற்கொண்டு வரும் நடவடிக்கைகளை வன்மையாகக் கண்டிக்கிறேன்.
முதலில், டெல்லியில் மெட்ரோ ரயில் நிலையங்கள் மூடப்பட்டன. இரண்டாவதாக, டெல்லிக்குச் செல்லும் ரயில்கள் ரத்து செய்யப்பட்டன. இறுதியாக, 24 மணி நேரத்திற்கு இணையச் சேவைகளுக்குக் கட்டுப்பாடுகள் விதிக்கப்பட்டன.
நாடு முழுவதும் மாணவர் இயக்கத்தினர், இளைஞர் தலைவர்கள்மற்றும் அரசியல் அமைப்பாளர்கள் பெருமளவில் கைது செய்யப்படுவதாக செய்திகள் வெளியாகி வருகின்றன.
நாம் மீண்டும் ஓர் அவசரநிலைக் காலத்தில் வாழ்ந்து கொண்டிருக்கிறோமா?
தேர்தல் முறைகேடு களுக்கு எதிராகக் குரல் எழுப்ப நமது இளைஞர்களுக்கு உரிமை இல்லையா?
நமது ஜனநாயகத்தைக் காப்பாற்றுவதற்காகத் துணிச்சலுடன் குரல் எழுப்பி வரும் இந்தியாவின் மாணவர்களுக்கும் இளைஞர்களுக்கும் எங்களது முழுமையான ஆதரவைத் தெரிவித்துக் கொள்கிறோம்.
மிரட்டல்கள் மற்றும் காவல்துறையின் அடக்குமுறைகள் மூலம் இளைஞர்களின் குரலை ஒடுக்க முயற்சிப்பதற்குப் பதிலாக, நாட்டின் இளைஞர்களின் குரலுக்கு ஒன்றிய அரசு செவிசாய்க்க வேண்டும் என்று வலியுறுத்துகிறேன்.
இவ்வாறு அவர் அதில் குறிப்பிட்டுள்ளார்.