புதுடெல்லி, அக். 12 –
டெல்லி மாணவர்கள் போராட்டம் தொடர்பான நீதிமன்ற அவமதிப்பு வழக்கில் ஒன்றிய அரசு விரிவான பிரமாணப் பத்திரம் தாக்கல் செய்ய உச்ச நீதிமன்றம் உத்தரவிட்டுள்ளது.
தலைமைத் தேர்தல் ஆணையர் ஞானேஷ்குமார் பதவி விலகக் கோரி கரப்பான் பூச்சி ஜனதா கட்சியினர் மற்றும் மாணவர்கள் நேற்று டெல்லி ஜந்தர் மந்தரில் போராட்டத்தில் ஈடுபட்டனர். இந்தப் போராட்டத்தை தடுத்து நிறுத்துவதற்காக, டெல்லி அரசு பல்வேறு நடவடிக்கைகளை மேற்கொண்டது.
மெட்ரோ ரயில் நிலையங்கள் மூடப்பட்டன. முக்கிய சாலைகளில் பொதுமக்களுக்கு அனுமதி மறுக்கப்பட்டது. இணையதள சேவைகள் முடக்கப்பட்டன. இது தொடர்பான வழக்கை நேற்று விசாரித்த உச்சநீதிமன்றம், மக்களை பாதிக்காத வகையில் மெட்ரோ ரயில் நிலையங்களை திறக்க அறிவுறுத்தியது. ஆனால், உச்சநீதிமன்றத்தின் உத்தரவை டெல்லி அரசு நிறைவேற்றவில்லை.
இதனை எதிர்த்து டெல்லி மற்றும் ஒன்றிய அரசுக்கு எதிராக நீதிமன்ற அவமதிப்பு மற்றும் ஆட்கொணர்வு மனுக்கள் உச்சநீதிமன்றத்தில் தாக்கல் செய்யப்பட்டன. இந்த மனுக்கள் விடுமுறை தினமான இன்று நீதிபதிகள் ஜாய்மால்யா பாக்சி மற்றும் வி. மோகனா ஆகியோர் அடங்கிய சிறப்பு அமர்வு முன் விசார ணைக்கு வந்தது. மனுதார்கள் தரப்பில் மூத்த வழக்கறிஞர்கள் கபில் சிபல், கே.கே. வேணுகோபால், மேனகா குருசாமி, கோபால் சங்கர நாராயணன் உள்ளிட்டோரும், ஒன்றிய அரசு சார்பில் சொலிசிட்டர் ஜெனரல் துஷார் மேத்தாவும் ஆஜராகினர்.
முன்னாள் முதல்வர்
கள் கெஜ்ரிவால், மம்தா பானர்ஜி, பினராயி விஜயன் உள்ளிட்ட தலைவர்கள் மற்றும் 7 ஆயிரத்திற்கும் மேற்பட்டவர்கள் கைது செய்யப்பட்டதாக மனுதாரர்கள் தரப்பு வழக்கறிஞர்கள் தெரிவித்தனர். அனைத்துத் தரப்பு வாதங்களையும் கேட்ட நீதிபதிகள், உத்தரவை செயல்படுத்த தவறிய அதிகாரிகள் மீது ஏன் நீதிமன்ற அவமதிப்பு நடவடிக்கை எடுக்கக் கூடாது என கேள்வி எழுப்பினர்.
டெல்லி மாணவர்கள் போராட்டத்தின் போது டெல்லி அரசு மற்றும் போலீசார் மேற்கொண்ட நடவடிக்கைகள் குறித்து ஒன்றிய உள்துறை செயலாளர், டெல்லி காவல் ஆணையர், டெல்லி மெட்ரோ ரயில் நிறுவன தலைவர் ஆகியோர் பிரமாண பத்திரம் தாக்கல் செய்ய வேண்டும் என்று நீதிபதிகள் உத்தரவிட்டனர்.
சட்டம்-ஒழுங்கு தொடர்பான சூழல் ஏதும் எழாதவரை மெட்ரோ ரயில் சேவை இயல்பு நிலையில் செயல்பட வேண்டும், பொதுமக்களின் தடையற்ற நடமாட்டம் மற்றும் இணைய சேவை ஆகியவை உறுதி செய்யப்பட வேண்டும் என்றும் உத்தரவிட்ட நீதிபதிகள், வழக்கறிஞர்கள் தங்கள் தொழில்முறைப் பணிகளை மேற்கொள்வதில் எவ்விதத் தடையும் செய்யக்கூடாது என்றும் தெரிவித்து, விசாரணையை ஒத்திவைத்தனர்.