#Title

SIR-ஐ கண்டித்து அறவழியில் போராடிய சமூகச் செயற்பாட்டாளர்கள் கைது! ஜனநாயக உரிமைகளை நசுக்கும் போக்கை கைவிட வேண்டும்! மனிதநேய மக்கள் கட்சியின் தலைவர் பேராசிரியர் எம்.எச்.ஜவாஹிருல்லா அறிக்கை!

சென்னை, அக். 12 –

அரசியலமைப்புக்கு விரோதமானதாக உள்ள வாக்காளர் பட்டியல் சிறப்புத் தீவிரத் திருத்த (SIR) நடவடிக்கைகளைக் கண்டித்தும், தலைமைத் தேர்தல் ஆணையர் ஞானேஷ்குமார் பதவி விலக வலியுறுத்தியும் டெல்லியில் நடைபெறும் போராட்டத்திற்கு ஆதரவாகச் சென்னை பெசன்ட் நகரில் அமைதியான முறையில் குரலெழுப்பிய சமூகச் செயற்பாட்டாளர்கள், வழக்கறிஞர்கள் உள்ளிட்ட 50-க்கும் மேற்பட்ட இளைஞர்களைக் காவல்துறை கைது செய்திருப்பது வன்மையான கண்டனத்திற்குரியது.

ஜனநாயக நாட்டில் அரசின் நடவடிக்கைகளை விமர்சிப்பதற்கும், தேர்தல் ஆணையத்தின் செயல்பாடுகளைக் கேள்வி கேட்பதற்கும், தங்களது உரிமைகளுக்காக அறவழியில் போராடு வதற்கும் ஒவ்வொரு குடி மகனுக்கும் அரசியலமைப்புஉரிமை உண்டு. அந்த உரிமைகளைப் பாதுகாக்க வேண்டிய அரசும் காவல்துறையும் போராட்டங்களை ஒடுக்குவதும், அமைதியாகப் போராடுபவர்களைக் கைது செய்வதும் ஜனநாயகத்தின் அடிப்படை விழுமியங்களுக்கு எதிரான செயலாகும்.

டெல்லியில் நடைபெறும் போராட்டத்தைத் தடுப்பதற்காகப்பல்வேறு கட்டுப்பாடுகள் விதிக்கப் படுவதாக வெளியாகும் செய்திகள் கவலையளிக்கின்றன. இத்தகைய சூழலில், அந்தப் போராட்டத்திற்கு ஆதரவாகத் தமிழகத்தில் குரலெழுப்பிய இளைஞர் களைக் கைது செய்திருப்பது கருத்துச் சுதந்திரத்திற்கும் ஜனநாயக உரிமைகளுக்கும் விடுக்கப்படும் அச்சுறுத்தலாகும்.

மேலும், தலைமைத் தேர்தல் ஆணையர் ஞானேஷ்குமார் பதவி விலகக் கோரி இந்தியா கூட்டணி சார்பில் நாடு முழுவதும் போராட்டங்கள் நடத்தப்படும் என அறிவிக்கப்பட்டுள்ள நிலையில், அதே கோரிக்கையை வலியுறுத்தி அறவழியில் போராடியவர்களைக் காவல்துறை கைது செய்திருப்பது முரண்பாடான அணுகுமுறையாகும். ஜனநாயகத்தில் போராட்டத்திற்கான உரிமை என்பது அரசியல் கட்சிகளுக்கு மட்டுமல்ல; ஒவ்வொரு குடிமகனுக்கும் பொதுவான உரிமையாகும்.

எனவே, கைது செய்யப்பட்ட அனைவரையும் எவ்வித நிபந்தனையுமின்றி உடனடியாக விடுதலை செய்ய வேண்டும். அவர்கள் தங்களது ஜனநாயகக் கோரிக்கைகளை அமைதியான முறையில் முன்வைப்பதற்கு உரிய இடத்தையும் அனுமதியையும் வழங்க வேண்டும் எனத் தமிழக அரசை வலியுறுத்துகிறேன்.

ஜனநாயகக் குரல்களைஅடக்குவதன் மூலம் மக்களின் எதிர்ப்பை ஒருபோதும் மௌனமாக்கிவிட முடியாது. அறவழிப் போராட்டங்களை ஒடுக்குவதைக் கைவிட்டு, அரசியலமைப்பு வழங்கியுள்ள அடிப்படை உரிமைகளைப் பாதுகாக்க தமிழக அரசு முன்வர வேண்டும்.

இவ்வாறு மனிதநேய மக்கள் கட்சியின் தலைவர் எம்.எச்.ஜவாஹிருல்லா அறிக்கையில் தெரிவித்துள்ளார்.