#Title

தேர்தல் ஆணையர் ஞானேஷ் குமாரை பதவி நீக்கக்கோரி சென்னையில் போராட்டம் நடத்திய மாணவர்கள் கைது! த.வெ.க. அரசின் காவல்துறை அராஜகம்! கடும் தள்ளுமுள்ளு – வாக்குவாதம்!

சென்னை, அக். 13 –

தலைமைத் தேர்தல் ஆணையர் ஞானேஷ் குமாரை பதவி நீக்கம் செய்ய வலியுறுத்தி சென்னையில் நேற்று பல்வேறு இடங்களில் மாணவர்கள், இளைஞர்கள் போராட்டத்தில் ஈடுபட்டனர். போராட்டத்தில் ஈடுபட்ட மாணவர்கள், இளம்பெண்களை போலீசார் வலுக்கட்டாயமாக இழுத்துச் சென்றதால் கடும் தள்ளுமுள்ளு ஏற்பட்டது. போலீசாரின் கைது நடவடிக்கைக்கு எதிர்ப்பு தெரிவித்து மாணவர்கள் தரையில் அமர்ந்தும், படுத்தும் போராட்டத்தில் ஈடுபட்டதால் பரபரப்பு ஏற்பட்டது.

எஸ்ஐஆர் பணியில் தன்னிச்சையாக செயல்பட்டு முறைகேட்டில் ஈடுபட்ட தலைமைத் தேர்தல் ஆணையர் ஞானேஷ் குமாரை பதவி நீக்கம் செய்ய வேண்டும் என்பதை வலியுறுத்தி நாடு முழுவதும் போராட்டங்கள் நடைபெற்று வருகின்றன.

இதன் ஒரு பகுதியாக சென்னை பெசன்ட் நகர் எலியட்ஸ் கடற்கரையில் நேற்று காலை 8 மணியளவில் இளைஞர்கள், இளம்பெண்கள் என 30க்கும் மேற்பட்டோர் திரண்டனர். ராதிகா கணேஷ் தலைமையில் நடைபெற்ற போராட்டத்தில் தலைமைத் தேர்தல் ஆணையர் ஞானேஷ் குமாருக்கு எதிராக கண்டன முழக்கங்கள் எழுப்பப்பட்டன. இதுகுறித்து தகவலறிந்து சம்பவ இடத்திற்கு வந்த போலீசார், அனுமதியின்றி போராட்டம் நடத்தக்கூடாது எனக்கூறி மாணவர்களையும் இளைஞர்களையும் கலைந்து செல்லுமாறு எச்சரித்தனர். ஆனால், போராட்டக்காரர்கள் கலைந்து செல்ல மறுத்து தொடர்ந்து கண்டன முழக்கங்களை எழுப்பினர்.

இதனால் போலீசாருக்கும் மாணவர்களுக்கும் இடையே கடும் வாக்குவாதம் ஏற்பட்டது. அப்போது போராட்டத்தில் ஈடுபட்ட இளைஞர்களை போலீசார் பிடித்து இழுத்து கைது செய்ய முயன்றனர். இதற்கு எதிர்ப்பு தெரிவித்த மாணவர்கள் தரையில் அமர்ந்து போராட்டத்தில் ஈடுபட்டனர். இதையடுத்து மாணவர்கள், இளம்பெண்களை போலீசார் குண்டுக்கட்டாக தூக்கி யும், தரதரவென இழுத்தும் கைது செய்து வாகனங்களில் ஏற்றினர். சிலர் போலீஸ் வாகனங்களில் ஏற மறுத்ததால் கடும் தள்ளுமுள்ளு ஏற்பட்டது. போலீசாரின் நடவடிக்கைக்கு எதிர்ப்பு தெரிவித்து மாணவர்கள் தரையில் படுத்து முழக்கங்களை எழுப்பினர். இதனால், கடற்கரை பகுதியில் பரபரப்பு ஏற்பட்டது. கைது செய்யப்பட்ட 30க்கும் மேற்பட்டோர் திருவள்ளு வர் நகர் சமுதாய நலக்கூடத்திற்கு அழைத்துச் செல்லப்பட்டனர்.

இதேபோல் சென்னைஅண்ணா சாலை பெரியார் சிலை அருகே அனைத்திந்திய மாணவர் பெருமன்றம், அனைத்திந்திய இளைஞர் பெருமன்றத்தைச் சேர்ந்த 100க்கும் மேற்பட்ட மாணவர்கள் மற்றும் இளைஞர்கள் திரண்டனர். அனைத்திந்திய இளைஞர் பெருமன்ற மாநிலச் செயலாளர் கே.பாரதி, அனைத்திந்திய மாணவர் பெருமன்ற மாநிலத் தலைவர் கே.இப்ராஹிம் ஆகியோர் தலைமையில் போராட்டம் நடைபெற்றது. மாணவர்கள் தலைமைச் செயலகத்தை நோக்கிப் பேரணியாகச் செல்ல முயன்றனர். சேப்பாக்கம் சிவானந்தா சாலையில் தடுப்புகளை அமைத்து போலீசார் மாணவர்களைத் தடுத்து நிறுத்தி னர். தடுப்புகளை மீறி முன்னேற முயன்ற மாணவர்களுக்கும் போலீசாருக்கும் இடையே கடும் தள்ளுமுள்ளு ஏற்பட்டது. போலீசாரை கண்டித்து மாணவர்கள் சாலையில் அமர்ந்து போராட்டத்தில் ஈடுபட்டனர். அவர்களை அங்கிருந்து அப்புறப்படுத்த போலீசார் முயன்றதால் வாக்குவாதம் முற்றியது.

தொடர்ந்து போராட்டத்தில் ஈடுபட்ட மாணவர்களை போலீசார் குண்டுக்கட்டாக தூக்கிச் சென்று வாகனங்களில் ஏற்றினர். இந்த தள்ளுமுள்ளுவின்போது மயிலாப்பூரைச் சேர்ந்த கவின் என்ற இளைஞருக்குத் தலையில் காயம் ஏற்பட்டது. இதையடுத்து அவர் சிகிச்சைக்காக மருத்துவமனைக்கு அழைத்துச் செல்லப்பட்டார். மாணவர்கள், இளைஞர்கள் என 100க்கும் மேற்பட்டோரை போலீசார் கைது செய்தனர்.

இதற்கிடையே பெசன்ட் நகரில் கைது செய்யப்பட்ட இளைஞர்களுக்கு ஆதரவாக திமுக எம்பிக்கள் ஆ.ராசா, தமிழச்சி தங்கபாண்டியன், முன்னாள் அமைச்சர் மா.சுப்பிர மணியன் உள்ளிட்டோர் தரையில் அமர்ந்து போராட்டத்தில் ஈடுபட்டனர். கைது செய்யப்பட்டவர்களை விடுவிக்க வலியுறுத்தி முழக்கங்களை எழுப்பினர். மேலும், போராட்டத்தில் ஈடுபட்டு கைது செய்யப்பட்ட இளைஞர்கள்தங்கவைக்கப்பட்டிருந்த சமுதாயநலக்கூடத்திற்குச் சென்றுஅவர்களைச்சந்தித்தனர்.

இதே கோரிக்கைகளை வலியுறுத்தி சென்னை மின்ட் பேருந்து நிலையம் அருகே நேற்று மாலை 5 மணிக்கு அகில இந்திய ஜனநாயக மாணவர் சங்கம் சார்பில் ஆர்ப்பாட்டம் நடத்த அழைப்பு விடு க்கப்பட்டிருந்தது. அங்கு திரளான மாணவர்கள் போராட்டத்தில் பங்கேற்றனர்.