#Title

போராட்டத்தை தடுத்து நிறுத்தும் வகையில் மருத்துவமனை பணியாளர்களை வீட்டுக்காவலில் வைத்துள்ள போலீசார்! தீவிரவாதிகள் போல் நடத்தப்படுவதாக குற்றச்சாட்டு!

சென்னை, அக். 13 –

பணி நிரந்தரம் உள்ளிட்ட கோரிக்கைகளை வலியுறுத்தி போராட்டத்தில் ஈடுபடுவதாக அறிவித்திருந்த மருத்துவமனை பணியாளர்களை போலீசார் தடுத்து நிறுத்தி வீட்டுக்காவலில் வைத்துள்ளனர்.

தமிழ்நாடு முழுவதும் உள்ள ஆரம்ப சுகாதார நிலையம் மற்றும் அரசு மருத்துவமனைகளில் சுமார் 3 ஆயிரத்து 500 மருத்துவமனை பணியாளர்கள் தற்காலிக அடிப்படையில் பணியாற்றி வருகின்றனர்.

பணி நிரந்தரம் உள்ளிட்ட வாழ்வாதாரக் கோரிக்கைகளை நிறைவேற்றக் கோரி அவர்கள் தொடர் போராட்டங்களை நடத்தி வந்துள்ளனர்.

தங்களது கோரிக்கைகளை வலியுறுத்தி சென்னை எழும்பூர் ராஜரத்தினம் மைதானம் அருகே உண்ணாவிரதப் போராட்டம் நடத்த உள்ளதாக அவர்கள் அறிவித்திருந்தனர்.

இந்நிலையில், சட்டம்-ஒழுங்குப் பிரச்சினையைக் காரணம் காட்டி இப்போராட்டத்தைத் தடுக்கப் பல்வேறு பகுதிகளில் உள்ள மருத்துவமனை பணியாளர்களை முன்னெச் சரிக்கை நடவடிக்கையாகநேற்று போலீசார் வீட்டுக் காவலில் தடுத்து வைத்துள்ளனர்.

காவல்துறையின் இந்த நடவடிக்கை சட்டவிரோதமானது என்றும், அமைதியான முறையில் போராடி வரும் தங்களை தீவிரவாதி கள் போல் போலீசார் நடத்துவதாகவும் மருத்துவமனை பணியாளர்கள் சங்க நிர்வாகிகள் குற்றம் சாட்டி உள்ளனர்.