புதுடெல்லி, அக். 13 –
தென்கிழக்கு வங்கக்கடல் பகுதியில் இன்று புதிய காற்றழுத்தத் தாழ்வு பகுதி உருவாகும் என இந்திய வானிலை ஆய்வு மையம் தெரிவித்துள்ளது.
இது குறித்து இந்திய வானிலை ஆய்வு மையம் வெளியிட்டுள்ள அறிவிப்பின்படி, மலாக்கா ஜலசந்தி மற்றும் அதனை ஒட்டிய பகுதிகளில் நிலவி வந்த வளிமண்டல மேலடுக்குச் சுழற்சி தற்போது அந்தமான் கடல் மற்றும் அதனை ஒட்டிய தென்கிழக்கு வங்கக்கடல் பகுதியை நோக்கி நகர்ந்து வலுவடைந்துள்ளது.
இந்த வளிமண்டல மேலடுக்குச் சுழற்சியின் காரணமாக, இன்று தென்கிழக்கு வங்கக்கடல் பகுதியில் புதிய குறைந்த காற்றழுத்தத் தாழ்வுப் பகுதி உருவாகிறது.
இந்த காற்றழுத்தத் தாழ்வுப் பகுதி அடுத்த சில நாட்களில் மேலும் வலுவடைந்து, வடமேற்கு திசையில் நகர்ந்து வட தமிழகம் மற்றும் தெற்கு ஆந்திரக் கடற்கரையை நோக்கி வரக்கூடும் என கணிக்கப்பட்டுள்ளது.
இந்த மேலடுக்குச் சுழற்சி மற்றும் உருவாகவுள்ள தாழ்வுப் பகுதி காரணமாகக் கடல் சூழலில் சாதகமான மாற்றங்கள் ஏற்பட்டு, தமிழகத்தில் வடகிழக்கு பருவமழை தொடங்குவதற்கான ஆரம்பகட்ட அறிகுறிகள் தென்படுவதாகவும், தமிழ்நாட்டின் கடலோர மாவட்டங்கள் மற்றும் பல்வேறு பகுதிகளில் வரும் நாட்களில் பரவலாக மழை பெய்யக்கூடும் என எதிர்பார்க்கப்படுவதாகவும் இந்திய வானிலை ஆய்வு மையம் தெரிவித்துள்ளது.