மயிலாடுதுறை, அக்.13–
மயிலாடுதுறையில் உள்ள அரசு தலைமை மருத்துவமனையில் கடந்த 7ம் தேதி காங்கிரஸ் எம்.எல்.ஏ. ஜமால் முகம்மது யூனூஸ் திடீர் ஆய்வு மேற்கொண்டார். அப்போது அரசு தலைமை மருத்துவர் மருதவாணன் தலைமையில் ஆய்வு கூட்டம் நடந்தது. இந்த கூட்டத்திலும் எம்.எல்.ஏ. கலந்து கொண்டார். அப்போது அரசு மருத்துவர்கள், செவிலியர்களை எம்.எல்.ஏ. திட்டி பேசியதாக கூறப்படுகிறது.இவ்வாறு திட்டி பேசியதை எம்எல்ஏ தனது முகநூல் பக்கத்தில் பதிவிட்டுள்ளார்.
இது மருத்துவர்கள், செவிலியர்கள் இடையே அதிர்ச்சியை ஏற்படுத்தியுள்ளது. அந்த வீடியோவில் பேசும் எம்.எல்.ஏ. ஜமால் முகம்மது யூனூஸ், அரசு இலவசமாக கொடுக்கும் திட்டங்கள் மக்களுக்கு சென்று சேர வேண்டும்.மருத்துவமனைக்கு வரும் நோயாளிகளுக்கு உரிய மரியாதை வழங்கப்படுவதில்லை.
உங்களால் வேலை பார்க்க முடிந்தால் பாருங்கள். இல்லாவிட்டால் நீங்களே ட்ரான்ஸ்பர் வாங்கிக் கொண்டு போய் விடுங்கள். தலைமை மருத்துவர் நடவடிக்கை எடுக்காவிட்டால் நானே மருத்துவமனையில் போராட்டம் நடத்தும் நிலை ஏற்படும் என எச்சரிக்கிறார். இதுகுறித்து, இந்திய மருத்துவ கழகம் சார்பில் மருத்துவர்கள் மற்றும் செவிலியர்கள் மயிலாடுதுறை கலெக்டரைச் நேரில் சந்தித்து புகார் மனு அளித்தனர். உரிய நடவடிக்கை எடுக்காவிட்டால் மருத்துவமனையில் தர்ணா போராட்டம் நடத்துவது குறித்தும் மருத்துவர்கள் ஆலோசித்து வருகின்றனர். இந்த சம்பவத்தால் பரபரப்பு ஏற்பட்டுள்ளது.