கோவை, அக். 13 –
கோவை மாவட்டம் சூலூர் காவல் நிலையத்தில், விசாரணைக்காக வந்தவர்கள் காவலர்கள் மீது தாக்குதல் நடத்திய சம்பவம் அதிர்ச்சியை ஏற்படுத்தி உள்ளது.
கோவை மாவட்டம் சூலூர் அனைத்து மகளிர் காவல் நிலையத்தில் சண்முகப்பிரியா என்பவர் புகார் ஒன்றை அளித்துள்ளார். அதில் தனது கணவர் ராம் பிரசாத், தனது படுக்கை அறை புகைப் படங்களை சமூக வலை
தளத்தில் பரப்பி உள்ளதாகவும் அவரது குடும்பத்தினர் தன்னை வன்கொடுமை செய்ததாகவும் தெரிவித்திருந்தார்.
இந்த புகாரை விசாரித்த போலீசார், ராம் பிரசாத் மற்றும் அவரது தாயார் ஜெயந்தி, தந்தை கருப்புசாமி, தம்பி பிரகதீஷ் ஆகிய நான்கு பேர் மீது பெண்கள் வன்கொடுமை சட்டம் பிரிவு உள்ளிட்ட ஆறு பிரிவுகளின் கீழ் வழக்குப்பதிவு செய்து ராம்பிரசாத்தை விசாரணைக்கு அழைத்துள்ளனர்.
ராம்பிரசாத் காவல்நிலையம் வந்த போது, த.வெ.க. கொடி கட்டிய காரில் வந்து இறங்கிய சண்முகப்பிரியாவின் குடும்பத்தினர் திடீரென ராம் பிரசாத் மீது கொலை வெறி தாக்குதல் நடத்தினர்.
இத்தாக்குதலை தடுக்க வந்த தலைமை காவலர் பாலமுருகன் மற்றும் பெண் காவலர் பிரியா மீதும் சண்முகப்பிரியாவின் குடும்பத்தினர் தாக்குதல் நடத்தினர்.
இச்சம்பவம் குறித்து வழக்குப் பதிவு செய்துள்ள போலீசார், 2 பேரை கைது செய்தனர். தப்பியோடிய மேலும் 10 பேரை போலீசார் தேடி வருகின்றனர்.