#Title

ராகுல்காந்தி தொடுத்த உச்சநீதிமன்ற வழக்கு: பாசிசம் – பாயாசம் எனப் ‘பஞ்ச்’ பேசும் ஜோசப் விஜய் பெயர் ‘இந்தியா’ கூட்டணித் தலைவர்கள் பட்டியலில் இல்லையே! ‘செவிட்டில் விசிலடித்து அனுப்பி விட்டாரா’ என தயாநிதி மாறன் எம்.பி. கிண்டல்!

சென்னை, அக். 15–

உச்சநீதி மன்றத்தில் மக்களவை எதிர்க்கட்சித் தலைவர் ராகுல்காந்தி தீவிர வாக்காளர் திருத்தப்பட்டியலுக்கு எதிராகவும், இந்தியத் தேர்தல் ஆணையத்திற்கு எதிராகவும் நேற்று முன்தினம் வழக்கு தொடர்ந்துள்ளார். அதில் இந்தியாக் கூட்டணித் தலைவர்களைஇதர மனுதாரர்களாகக் குறிப்பிட்டு உள்ளார்.

அந்தக் கூட்டணிக் கட்சித் தலைவர்களின் பட்டியலில், கூட்டணியிலே இருப்பதாகக் கூறிக்கொள்ளும் த.வெ.க. வின் தலைவர் ஜோசப் விஜய் பெயர் இல்லை.

இது குறித்து தயாநிதி மாறன் எம்.பி., வெளியிட்டுள்ள சமூக வலைதளப் பதிவில் ‘‘காங்கிரஸ் உள்ளிட்ட கட்சிகள் டம்மி பீஸ்கள் என்பதால், செவிட்டில் விசிலடித்து அனுப்பி விட்டாரா விஜய்’’ என்று குறிப்பிட்டுள்ளார்.

இது பற்றிய விவரம் வருமாறு:

மக்களவை எதிர்க்கட்சித் தலைவர் ராகுல்காந்தி உச்சநீதிமன்றத்தில் SIR க்கு எதிராகவும் ECI க்கு எதிராகவும் நேற்று முன்தினம் வழக்கு ஒன்றை தொடுத்துள்ளார். (டைரி எண். 64196/2026) அந்த வழக்கில் இதர மனுதாரர்கள் என்று குறிப்பிட்டு, இந்தியக் கூட்டணி தலைவர்களின் பெயர்களைக் குறிப்பிட்டுள்ளார்.

எதிர்மனுதாரர்களாக இந்தியத் தலைமைத் தேர்தல் ஆணையம், மற்றும் ஞானேஷ்குமார் உள்ளிட்ட மூன்று ஆணையர்கள்சேர்க்கப்பட்டுள்ளனர்.

இதர மனுதாரர்களாக, மல்லிகார்ஜூன கார்க்கே, சவுகதா ராய். அகிலேஷ் யாதவ். தேஜேஸ்வி யாதவ், சஞ்சய் ரவுட், எம்.ஏ. பேபி, டி.ராஜா, மாஹா மஜ்ஜி, சுப்ரியா சூலே மற்றும் முகமது பஷீர் என கூட்டணிக் கட்சித் தலைவர்களின் பெயர் இடம் பெற்றுள்ளது.

நானும் இந்தியா கூட்டணியில் இருக்கிறேன் என்று தமிழ்நாட்டில் ‘பாவ்லா’ காட்டிய த.வெ.க. தலைவர் ஜோசப் விஜய் பெயர் மட்டும் ‘மிஸ்ஸிங்’

இதைக் குறிப்பிட்டு, தயாநிதி மாறன் எம்.பி. ‘டம்மி பீஸ்கள்’ என்றும், டம்மி முதலமைச்சர் என்றும் கிண்டல் செய்து தமது சமூக வலைதளப் பக்கத்தில் கீழ்க்கண்ட வாறு பதிவிட்டுள்ளார்.

பாசிசம், பாயாசம் எனப் பஞ்ச் பேசும் நடிகர் பெயர் இதிலும் காணவில்லையே? என்ன ஆச்சு?

சாதாரணமாக பேசும் போது ஒன்று சொல்லுவார்கள், வா, போ, பேசு, அப்படியே வந்தாலும் ஒரு காபி தரேன் சாப்பிட்டு போ, அதற்கு மேலே எதையும் கேட்காதே என்பார்கள்… அப்படிதான் இதையும் பார்க்க வேண்டும் போல…

பழக்க வழக்கமெல்லாம் பனையூருக்கு வந்து காபி சாப்பிடுவதோடு நிறுத்திக் கொள்ள வேண்டும். பாசிச எதிர்ப்புக்கெல்லாம் என்னைக் கூப்பிடாதீர்கள் என செவிட்டில் விசிலடித்து அனுப்பிவிட்டாரா?

காங்கிரஸ் உள்ளிட்ட துரோகிகள் கழண்டுகொண்ட பின்பும், இடைத்தேர்தலில் கழகத்தின் வாக்கு சதவீதம் அப்படியே இருப்பதைப் பார்த்து, நீங்கள் வாக்குவங்கியில்லாத டம்மிபீஸ்கள்தான் எனும் ‘கம்பெனி சீக்ரெட்’ டம்மி முதலமைச்சருக்கே தெரிந்து விட்டதோ!

இவ்வாறு தயாநிதி மாறன் எம்.பி. பதிவிட்டுள்ளார்.