#Title

கடந்த தி.மு.க. ஆட்சியில் ஒரு யூனிட்டிற்கு ரூ.11க்கு விலை நிர்ணயித்த டெண்டரை ரத்து செய்து – ஒரு யூனிட் ரூ. 35 என்ற அதிக விலைக்கு கொள்முதல் செய்வது ஏன்? ‘தினகரன்’ நாளேடு தலையங்கத்தில் குற்றச்சாட்டு!

சென்னை, அக்.15–

தினகரன் நாளேடு 14.10.2026 அன்று வெளி யிட்டுள்ள தலையங்கம் வருமாறு:–

தமிழகத்தில் தவெ.க. அரசு பொறுப்பேற்ற பிறகு அரிசி, பருப்பு உள்ளிட்ட அத்தியாவசிய பொருட்களின் விலைவாசி கடுமையாக உயர்ந்துள்ளது. இந்த அதிர்ச்சியில் இருந்து மீள்வதற்குள் தமிழக அரசு மின்பற்றாக்குறையை சமாளிக்க ஒரு யூனிட் ரூ.35 என்ற விலையில் 4,500 மெகாவாட் மின்சாரம் வாங்க ஒப்பந்தம் செய்துள்ளது பெரும் சர்ச்சையை ஏற்படுத்தியுள்ளது. இதுதொடர்பாக விளக்க மளித்துள்ள எரிசக்தித்துறை அமைச்சர் நிர்மல்குமார், இந்த ஒப்பந்தம் நாளை (அக்.15) முதல் 31ம் தேதி வரை மட்டுமே. இதனால் ஒரு நாளைக்கு அரசுக்கு ரூ.5 கோடி கூடுதல் செலவாகும். நுகர்வோர் அதிகம் மின்சாரத்தை உபயோகிக்கும் மாலை 6 மணி முதல் இரவு 12 மணி வரையிலான மின்தேவையை சரிக்கட்டவே இந்த ஒப்பந்தம் செய்துள்ளோம் என விளக்கமளித்துள்ளார்.

சூப்பர் எல்நினோ தாக்கத்தால் தமிழகத்தில் அதிகளவு வெப்பநிலை தற்போது வரை நிலவுவது உண்மைதான் என்றாலும், தமிழக அரசின் இந்த அதிக விலை கொள்முதல் மேலும் மின்கட்டண உயர்வை ஏற்படுத்துவதோடு, வரியினங்களையும் அதிகரிக்கவே செய்யும். சட்டப்பேரவையில் குறுகிய கால மின் சாரக் கொள்முதலைக் குறைத்து, மாதத்திற்கு சுமார் ரூ.200 கோடி சேமிக்க நடவடிக்கை எடுக்கப்படும் என அமைச்சர் நிர்மல்குமார் தெரிவித்திருந்தார். இந்த சூழலில் அதிக கொள்முதலில் மின்சாரத்தை வாங்கும்போது, அது பெரும் ஊழலுக்கே வழிவகுக்கும். எதற்கெடுத்தாலும் அரசு கஜானாவை காலியாக உள்ளதாகக் கூறி வரும் த.வெ.க. அரசு, இப்படி அவசரமாக கொள் முதல் செய்து யாருக்காக?

இது அரசின் திறனற்ற நிர்வாகத்திறமையை காட்டுவதாகவும், ஊழலுக்கு வழி வகுப்பதாக உள்ளதாகவும் அரசியல் தலைவர்கள் கடும் கண்டனம் தெரிவித்துள்ளனர். கடந்த தி.மு.க. ஆட்சியில் ஒரு யூனிட்டிற்கு ரூ.11 முதல் ரூ.20 வரை விலை நிர்ணயிக்கப் பட்டிருந்த குறுகிய கால மின் கொள்முதல் டெண்டர்களைக் கடந்த மே மாதம் த.வெ.க. அரசு ரத்துசெய்தது. இது நிர்வாக சீர்திருத்த நடவடிக்கை என சப்பைக்கட்டு கட்டினாலும், அதை விட அதிக விலைக்கு கொள்முதல் செய்வது ஏன்? இதை விட குறைந்த விலைக்கான டெண்டர்களை ரத்து செய்தது ஏன்? குறுகிய காலத்திற்காக மேற்கொண்ட நடவடிக்கை என அரசு தரப்பில் கூறினாலும், மின்பற்றாக் குறை தொடரும்பட்சத்தில் இந்த ஒப்பந்தம் தொடருமா அல்லது மாற்றுவழிகள் யோசிக்கப்படுமா என்பதற்கும் அரசிடம் தெளி வான விளக்கம் இல்லை.

மின்சார வாரியம் ஏற்கனவே ரூ.2.47 லட்சம் கோடி கடனுடன் தத்தளித்துக் கொண்டிருக்கிறது. இந்த சூழலில், ஒரு யூனிட் ரூ.35 என்ற விலையில் வாங்கும்போது, மின்வாரியம் மேலும் ரூ.1 லட்சம் கோடிக்கு கூடுதலான இழப்பையும் சந்திக்க நேரிடும். ஏற்கனவே கடனுக்கு வட்டி கட்ட முடியாமல் திணறும் மின்வாரியம், இன்னும் ஓராண்டுக்கு கூட செயல்பட முடியாமல் முடங்கி விடும் அல்லது மின்சாரக் கட்டணத்தை இரு மடங்காக உயர்த்த வேண்டிய கட்டாயம் ஏற்படும் என பா.ம.க. தலைவர் அன்புமணி விமர்சித் துள்ளார்.

மேலும், பல கட்சி தலைவர்களும் இதற்கு கடும் கண்டனம் தெரிவித்துள்ளனர்.

தமிழகத்தில் தற்போது ஏழை, எளிய, நடுத்தர மக்களுக்கு கூட வழக்கத்தை விட அதிகளவு மின்கட்டணம் வருகிறது. மின்சாரத்தை தொட வேண்டாம். கட்டணத்தை பார்த்தாலே ‘ஷாக்’ அடித்த உணர்வை தரும் சூழலில், கூடுதல் விலைக்கு பெறப்படும் மின்சாரத்தால் இது மேலும் அதிகரிக்கவே வாய்ப்புள்ளது. எனவே, தமிழக அரசு இதுகுறித்து, மக்களுக்கு தெளிவானதொரு விளக்கத்தை அளிக்க வேண்டும். ஏற்கனவே, நிதிச்சுமையில் தவிக்கும் மக்களுக்கு கூடுதல் சுமையை தருவதற்கான முயற்சியில் த.வெ.க. அரசு ஒருபோதும் இறங்கக்கூடாது என்பதே அனைவரின் விருப்பமாகும்.

இவ்வாறு‘தினகரன்’ நாளேடுதனது தலையங்கத்தில் சுட்டிக்காட்டியுள்ளது.