புதுடெல்லி, அக். 15–
டெல்லி ஜந்தர் மந்தர் பகுதியில் போராட்டம் நடத்துவதற்கான அதிகாரம் நேற்று ரத்து செய்யப்பட்ட நிலையில், தடையை மீறிப் போராட்டத்தில் ஈடுபட முயன்ற கரப்பான் பூச்சி ஜனதா கட்சியைச் சேர்ந்தவர்கள் கைது செய்யப்பட்டுள்ளனர்.
ஜந்தர் மந்தரில் போராடுவதற்கான தகுதியை நீக்கி, உள்துறை அமைச்சகத்தின் பரிந்துரையின் அடிப்படையில் காவல்துறை நேற்று அறிவிப்பு வெளியிட்டிருந்தது. அத்துடன் அப்பகுதி முழுவதும் பேரிகார்டுகள் அமைக்கப் பட்டு, சாலைகளும் முற்றிலுமாக மூடப்பட்டி ருந்தன.
இந்நிலையில், தடையை மீறி இன்று ஜந்தர் மந்தர் பகுதியில் போராட்டம் நடத்த கரப்பான் பூச்சி ஜனதா கட்சியைச் சேர்ந்த அஜிங்க்யா ஷிண்டே, சௌரவ் தாஸ், அஷுதோஷ் ரங்கா மற்றும் அவர்களின் ஆதரவாளர்கள் முயன்றனர். அவர்கள் அருகில் உள்ள மெட்ரோ நிலைய வளாகத்தின் வழியாக கேட் ஏறி குதித்து, ஜந்தர் மந்தர் பகுதிக்குள் நுழைந்து தேசியக் கொடியை ஏந்தி போராட்டத்தில் ஈடுபட்டனர்.
இதையடுத்து, அங்கு பாதுகாப்பு பணியில் ஈடுபட்டிருந்த டெல்லி போலீசார் அவர்கள் அனைவரையும் அதிரடியாக கைது செய்து அழைத்துச் சென்றனர். இதற்கிடையே, ரங்கா மற்றும் தாஸ் ஆகியோர் தங்களது எக்ஸ் தளப் பக்கத்தில் இது தொடர்பான பதிவுகளையும், வீடியோக்களையும் வெளியிட்டுள்ளனர். இந்த சம்பவத்தால் டெல்லி ஜந்தர் மந்தர் பகுதியில் பெரும் பரபரப்பு ஏற்பட்டது.