#Title

விஜய் தீவிர பிரச்சாரம் மேற்கொண்ட போதிலும் வாக்கு வித்தியாசம் மிகவும் குறைவு! இடைத் தேர்தலில் தி.மு.க. தனது வலுவான அடித்தளத்தை தக்க வைத்துள்ளது! ‘தி இந்து’ நாளேடு தலையங்கம்!

சென்னை, அக். 15–

தாராபுரம், மதுராந்தகம் தொகுதிகளில் நடைபெற்ற இடைத்தேர்தலில் தி.மு.கழகம் தனது வலுவான அடித்தளத்தை தக்க வைத்துள்ளது என்று ‘தி இந்து’ நாளேடு தலையங்கம் எழுதியுள்ளது.

தேர்தலில் வெற்றி பெற்ற எம்.எல்.ஏ.க்கள் தங்களது பதவியை ராஜினாமா செய்துவிட்டு, ஆளும் கட்சிக்கு தாவி மீண்டும் இடைத் தேர்தலில் போட்டியிடுவது மக்கள் அளித்த தீர்ப்பை மீறும் செயல் எனவும் ‘தி இந்து’ நாளிதழ் தலையங்கம் விமர்சித்துள்ளது.

வித்தியாசமான வெற்றி எனும் தலைப்பில் ‘தி இந்து’ நாளிதழ் தலையங்கம் ஒன்றை வெளியிட்டுள்ளது. அதில், மேற்கு வங்கம், தமிழ்நாடு மற்றும் புதுச்சேரி இடைத்தேர்தல் முடிவுகள் ஆச்சரியம் அளிக்கவில்லை , சட்டமன்றத் தேர்தலுக்குப் பிறகு வெறும் 5 மாதங்களிலேயே, அந்தந்த மாநிலங்களில் ஆட்சியில் உள்ள கட்சிகளே இடைத்தேர்தல் நடைபெற்ற 5 தொகுகளிலும் வெற்றி பெற்றதையும், இதில் மாறுபட்டது வெற்றியின் அளவு மட்டுமே என்றும் சுட்டிக் காட்டப்பட்டுள்ளது.

மேற்கு வங்கத்தில், நந்திகிராம் தொகுதிகளில் முறையே 76, 63 சதவீதம் என்ற வலுவான வாக்கு விகிதங்களுடன் பா.ஜ.க. வெற்றி பெற்றதாகவும், புதுச்சேரியில், ஆளும் என்.ஆர். காங்கிரஸ் தட்டாஞ்சாவடி தொகுதியில் 61சதவீதம் வாக்குகளைப் பெற்றதாகவும் இத்தலையங்கம் தெரிவித்துள்ளது. ஆனால், தாராபுரம் மற்றும் மதுராந்தகம் தொகுதிகளின் அதிமுக சட்டமன்ற உறுப்பினர்கள் தங்கள் பதவிகளை ராஜினாமா செய்துவிட்டுஆளும் கட்சியான தவெக-வில் இணைந்ததைத் தொடர்ந்து, இவர்களையே மீண்டும் வேட்பாளர்களாக த.வெ.க. நிறுத்திய தும், இவர்கள் இருவரும் முறையே 37 மற்றும் 40 சதவீதம் வாக்குகளைப் பெற்று வெற்றி பெற்றதும் சுட்டிக்காட்டப்பட்டுள்ளது. தமிழ்நாட்டில் நிலவும் மும்முனைப் போட்டி அரசியல் களத்தை விறுவிறுப்பாக வைத்துள்ளதாகவும், இந்த வெற்றி , மொத்தம் 234 உறுப்பினர்களைக் கொண்ட அவையில் தவெகவின் எண்ணிக்கையை 109-ஆகஉயர்த்த உதவியுள்ளதாகவும் குறிப்பிட்டுள்ள இத்தலையங்கம், அதேநேரம் முதலமைச்சர் விஜய் தீவிரமான பிரச்சாரத்தை மேற்கொண்ட போதிலும் வாக்கு வித்தியாசம் மிகக் குறைவாகவே இருந்தது, தேனிலவு காலம் முடிந்து விட்டதையே உணர்த்துகிறது என்றும் தெரிவித்துள்ளது.

தற்போது பிரதான எதிர்க்கட்சியாக திகழும் திமுக, கடந்த மே மாதத் தேர்தலில் எதிர்பாராத தோல்வியைச் சந்தித்திருந்தாலும், தனக்கான வலுவான அடித்தளத்தைத் தக்கவைத்துள்ளதை நிரூபித்துள்ளது என்றும் சுட்டிக்காட்டி உள்ள தி இந்து தலையங்கம், அதேவேளையில், மே மாதத் தேர்தலில் பெற்ற இடங்களின் அடிப்படையில் அ,தி,மு,க, மூன்றாவதுஇடத்தைப் பிடித்திருப்பது, அதன் சரிவு குறித்த கவலைகளை அதிகரித்துள்ளது என்றும் தெரிவித்துள்ளது. அ.தி.மு.க. சட்டமன்ற உறுப்பினர்களைத் தொடர்ந்து தக்கவைக்க முடியுமா என்பது குறித்து அதன் தலைமை கடுமையான கேள்விகளை எதிர்கொள்ள வேண்டியிருக்கும் என்றும் மேலும் நான்கு அ.தி.மு.க. சட்டமன்ற உறுப்பினர்கள் த.வெ.க.-வில் இணைந்துள்ள நிலையில், அவர்களின் தொகுதிகளுக்கு இடைத்தேர்தல்கள் நடைபெறவுள்ளதாகவும் இது தமிழக அரசியலில் ஒரு பின்னடைவான போக்கு என்றும் இத்தலையங்கம் விமர்சித்துள்ளது.

தேர்தல் முடிந்த சில மாதங்கள் அல்லது சில நாட்களில் அதிகாரத்தின் சலுகைகளைப் பெறுவதற்காகச் சட்டமன்ற உறுப்பினர்கள் தங்கள் பதவியை ராஜினாமா செய்வதும், ஆளும் கட்சி அவர்களை மீண்டும் வேட்பாளர்களாகக் களமிறக்குவதும் ஜனநாயகத்திற்கு பின்னடைவு என்றும் குற்றம்சாட்டி உள்ள தி இந்து தலையங்கம்,

இது கட்சித் தாவல் தடைச் சட்டத்தின் நோக்கத்தையே சிதைப்பதுடன், சட்டமன்றத் தேர்தலில் மக்கள் அளித்த தீர்ப்பையும் மீறுவதாக அமைகிறது என்றும், இத்தகைய அரசியல் நகர்வுகளை வாக்காளர்கள் அங்கீகரித்திருப்பது, மக்கள் பிரதிநிதித்துவத்தின் தரம் குறித்து அக்கறை கொண்ட எவருக்கும் கவலையளிக்கக்கூடியது என்றும் சுட்டிக்காட்டி உள்ளது.