முத்துப்பேட்டை, அக்.16–
கல்லணையில் திறக்கப்பட்ட தண்ணீர் பாசனத்துக்கு வந்து சேராததால் முத்துப்பேட்டை, தஞ்சையில் விவசாயிகள் நேற்று சாலை மறியலில் ஈடுபட்டனர். இதனால் போக்குவரத்து பாதிப்பு ஏற்பட்டது. திருவாரூர் மாவட்டம் முத்துப் பேட்டையில் 10 ஆயிரம் ஏக்கரில் சம்பா சாகுபடி நேரடி நெல் விதைப்பு பணியில் விவசாயிகள் ஈடுபட்டு வருகின்றனர். இந்நிலையில் முத்துப் பேட்டையில் உள்ள கோரையாறு, மறைக்கா கோரையாற்றில் இதுவரை போதுமான தண்ணீர் வரவில்லை. இதன் காரணமாக முத்துப் பேட்டையில் சாகுபடி செய்யப்பட்ட நெற்பயிர்கள் கருகும் அபாயம் ஏற்பட்டதால்இடும்பாவனம், கற்பகநாதர்குளம், தொண்டியக்காடு, விளாங்காடு விவசாயிகள் சிரமத்துக்கு ஆளாகியுள்ளனர்.
இதையடுத்து முத்துப்பேட்டை கோரையாறு, மறைக்கா கோரையாற்றில் பாசனத்துக்கு தண்ணீர் திறந்து விடக்கோரி மறைக்கா கோரையாறு பாலம் அருகே 300க்கும் மேற்பட்ட விவசாயிகள் நேற்று முன்தினம் காலை 9.30 மணியளவில் சாலை மறியல் போராட்டத்தில் ஈடுபட்டனர். தகவல் அறிந்த அதிகாரிகள் சென்று விவசாயிகளுடன் பேச்சுவார்த்தை நடத்தினர். இதில் உடன்பாடு ஏற்பட்டதை தொடர்ந்து மறியல் போராட்டம் கைவிடப்பட்டது. போராட்டத்தால் முத்துப்பேட்டை- வேதாரண்யம் சாலையில் 3 மணி நேரம் போக்குவரத்து பாதிக்கப்பட்டது.
இதேபோல் தஞ்சாவூர் மாவட்டம் உய்யங்கொண்டான்வாய்க்கால்,புதிய கட்டளைமேட்டு வாய்க்காலுக்கு கல்லைணையில் இருந்து திறக்கப்பட்ட தண்ணீர்
இன்னும் வரவில்ைல. இதனால் அசூர்,பொய்யங்குடி, வல்லம், புதூர், பாளையப்பட்டி, குரும்பூண்டி, ஆச்சாம்பட்டி உள்ளிட்ட 20 கிராமங்களில் 27,000 ஏக்கர் பரப்பளவில் சாகுபடி செய்ய முடியாமல் விவசாயிகள்தவித்து வருகின்றனர். உய்யங்கொண்டான் வாய்க்கால், புதிய கட்டளை மேட்டு வாய்க்காலுக்கு தண்ணீர் திறந்து விடக்கோரிசெங்கிப்பட்டியில் நேற்று முன்தினம் காலை 12.30 மணியளவில் விவசாயிகள் மறியலில் ஈடுபட்டனர்.
தகவல் அறிந்த புதிய கட்டளை மேட்டு வாய்க்கால் செயற்பொறியாளர் திருமூர்த்திநடத்திய பேச்சுவார்த்தையில் உடன்பாடு ஏற்பட்டதை தொடர்ந்து போராட்டம் கைவிடப்பட்டது. இந்த போராட்டத்தால் தஞ்சை- திருச்சி சாலையில் 1 மணி நேரம் போக்குவரத்து பாதிக்கப்பட்டது.