சென்னை, அக். 16 –
வரவிருக்கும் பண்டிகைகள் மற்றும் தொடர்ச்சியான விடுமுறைகளை முன்னிட்டு தமிழ்நாட்டில் ரயில் சேவைகள் மற்றும் முன்பதிவு இல்லா பெட்டிகளின் (unreserved coach) எண்ணிக்கையை அதிகரிக்க வேண்டும் என ஒன்றிய அரசை வலியுறுத்தி தயாநிதி மாறன் எம்.பி. அவசரக் கடிதம் எழுதியுள்ளார்.
தமிழ்நாட்டில் திருச்சி, மதுரை, கோவை, நெல்லை உள்ளிட்ட முக்கியமான வழித்தடங்களில் கூடுதல் ரயில் சேவைகள் தொடர்பாக, கழகத் தலைவர் மு.க. ஸ்டாலின் அவர்களின் வழிகாட்டுதலின்படி, கழக நாடாளுமன்றக் குழுத் துணைத் தலைவர் தயாநிதி மாறன் எம்.பி., ஒன்றிய ரயில்வே துறை அமைச்சர் திரு. அஸ்வினி வைஷ்ணவ் அவர்களுக்கு செப்டம்பர் மாதம் 17-ஆம் தேதி கடிதம் எழுதியிருந்தார். இந்தக் கோரிக்கையை ஏற்று, இதன் மீது உரிய நடவடிக்கை எடுக்கப்படும் என ரயில்வே துறை அமைச்சர் திரு. அஸ்வினி வைஷ்ணவ் அவர்களும் செப்டம்பர் மாதம் 22-ஆம் தேதி எழுதியிருந்த பதில் கடிதம் வாயிலாக உறுதியளித்திருந்தார்.
இந்நிலையில், விடுமுறை மற்றும் பண்டிகை காலங்களில், பயணிகளின் இன்னல்களை போக்கும் வகையில் ரயில் சேவைகளை மேம்படுத்த மீண்டும் வலியுறுத்தி, ரயில்வே துறை அமைச்சர் திரு. அஸ்வினி வைஷ்ணவ் அவர்களுக்கு அவசரக் கடிதம் எழுதியுள்ளார்.
அக்கடிதத்தில் அவர் குறிப்பிட்டுள்ளதாவது:–
கழகத் தலைவர் மு.க. ஸ்டாலின் அவர்களின் வழிகாட்டுதலின்படி, இக்கடிதத்தை எழுதுகிறேன். வரவிருக்கும் விடுமுறைக்காலங் களை முன்னிட்டு தமிழ்நாட்டின் முக்கிய நகரங்களுக்கு இடையே கூடுதல் ரயில் சேவைகளை இயக்க வேண்டியதன் அவசியத்தை உங்கள் கவனத்திற்குக் கொண்டுவருகிறேன். இது தொடர்பாக நான்
17-.09.-2026 அன்று உங்களுக்கு கடிதம் எழுதியிருந்தேன். அதற்கு நீங்கள் 22-.09.-2026 அன்று அளித்திருந்த பதிலில், “உங்கள் கோரிக்கையை ஆய்வு செய்து கூடுதல் ரயில்களை இயக்கத் தேவையான நடவடிக்கைகள் எடுக்கப்படும்” என்று உறுதியளித்திருந்தீர்கள். அதன் தொடர்ச்சியாக இக்கடிதம் அமைகிறது. அடுத்தடுத்து தொடர்ச்சியாக பண்டிகைக்கால விடுமுறைகள் நெருங்கிவரும் நிலையில், பயணிகளின் தேவை அதிகரிப்பதற்கு முன்பாகவே இப்பிரச்சினைக்குத் தீர்வு காண வேண்டியதன் அவசியத்தை மீண்டும் வலியுறுத்த விரும்பு கிறேன். பயண நெரிசல் மிகுந்த காலங்களில், முன்பதிவு செய்யப்பட்ட டிக்கெட்டுகளைப் பெறுவதில் பயணிகள் கடும் சிரமத்தை எதிர்கொள்கின்றனர். அதேவேளையில், முன்பதிவில்லா பெட்டிகளில் அளவுக்கு அதிகமான கூட்டம் காணப்படுவதால், பெண்கள், குழந்தைகள், முதியவர்கள் மற்றும் பிற பயணிகள் பல மணிநேரம் நின்று கொண்டே, மிகவும் சிரமமான சூழலில் பயணிக்க வேண்டிய கட்டாயத்திற்குத் தள்ளப்படுகின்றனர்.
போதுமான ரயில் சேவைகள் இல்லாதது சாலைப் போக்குவரத்தின் மீதும் கூடுதல் சுமையை ஏற்படுத்து கிறது. இதனால் பயணிகள் தனியார் பேருந்து மற்றும் வாகனங்களின் அதிகப்படியான கட்டணச் செலவிற்கும், கடுமையான போக்குவரத்து நெரிசலுக்கும் ஆளா கின்றனர். விடுமுறைக்கா லங்களில் ஏற்படும் இத்தகைய பயணிகளின் தேவை அதிகரிப்பை முன்கூட்டியே கணிக்க முடியும் என்பதால், அவசரக்கால நடவடிக்கைகளைத் தாண்டி, முன்கூட்டி யே திட்டமிடுவதன் மூலம் இதற்குத் தீர்வு காணப்பட வேண்டும். ரயில் சேவைகளை அதிகரிப்பதில் ஏற்படும் எந்தவொரு தாமதமும், வரவிருக்கும் விடுமுறைக்கா லங்களில் ஆயிரக்கணக்கான பயணிகள் அதே சிரமங்களை எதிர்கொள்ளும் நிலையை உருவாக்கும்.
எனவே, இப்பிரச்சனை குறித்த ஆய்வை விரைவு படுத்தி, பின்வரும் நடவடிக்கைகளை மேற்கொள்ளுமாறு அமைச்சகத்தைக் கேட்டுக்கொள்கிறேன்:
1. பண்டிகைக் காலங்கள், தொடர் விடுமுறை நாட்கள் மற்றும் வார இறுதி விடுமுறை நாட்களில் தமிழ்நாட்டிற்குச் சேவை அளிக்கும் முக்கிய மற்றும் அதிகத் தேவை உள்ள வழித்தடங்களில் கூடுதல் ரயில்களை இயக்க வேண்டும்.
2. அதிகப் பயன்பாட்டில் உள்ள வழித்தடங்களில் முன்பதிவு இல்லா / பொதுப் பெட்டிகளின் எண்ணிக்கையை அதிகரிக்க வேண்டும். குறிப்பாக, குறைந்தது 10 கூடுதல் பெட்டிகளை இணைப்பதற்கான சாத்தியக்கூறுகளை ஆய்வு செய்ய வேண்டும்.
3. பயண நெரிசல் மிகுந்த காலங்களுக்கு முன்பாகவே கூடுதல் ரயில்கள் மற்றும் பெட்டிகளை இயக்க ஏதுவாக, கடந்த காலப் பயண முறைகள் மற்றும் முன் பதிவுத் தரவுகளைப் பயன் படுத்திப் பயணிகளின் தேவையை முன்கூட்டியே மதிப்பிடும் நடவடிக்கையை மேற்கொள்ள வேண்டும். ஏற்கனவே தொடங்கப்பட்டுள்ள இந்த ஆய்வு நடவடிக்கைகள், வரவிருக்கும் விடு முறைக்காலத்திற்கு முன்பாகவே உரிய நேரத்தில் உறுதியான நடவடிக்கைகளாக மாற்றப்படுவதை உறுதி செய்யுமாறு கேட்டுக்கொள்கிறேன்.
நீண்டகாலமாக நிலுவையில் உள்ள இக்குறைபாடுகளை நிவர்த்தி செய்வதற்காக அமைச்சகம் முன்வை க்கவுள்ள குறிப்பிட்ட நடவடிக்கைகளை நான் ஆவலுடன் எதிர்பார்க்கிறேன்; இதற்காக உங்களுக்கு நன்றி தெரிவித்துக்கொள்ளவும் விரும்புகிறேன்.
இவ்வாறு தயாநிதி மாறன் எம்.பி. அக்கடிதத்தில் தெரிவித்துள்ளார்.