#Title

காவல்துறை ஜீப் கவிழ்ந்து விபத்து: காயமடைந்த கொளத்தூர் தொகுதி தி.மு.க. தகவல் தொழில்நுட்ப அணி அமைப்பாளர் செந்தில்குமாரை – பி.கே.சேகர்பாபு எம்.எல்.ஏ. மருத்துவமனையில் சந்தித்து நலம் விசாரித்தார்!

சென்னை, அக். 16–

சென்னைகிழக்கு மாவட்ட திராவிட முன்னேற்றக் கழகத்தின் சார்பில் நேற்று (15.10.2026) காலை சென்னை மாவட்ட ஆட்சியர் அலுவலகம் அருகில் நடைபெற்ற கண்டன ஆர்ப்பாட்டத்தில், கொளத்தூர் சட்டமன்றத் தொகுதி தகவல் தொழில்நுட்ப அணி அமைப்பாளர் த. செந்தில்குமார் கலந்துகொண்டார்.

ஆர்ப்பாட்டம் முடிந்து வீடு திரும்பிக்கொண்டிருந்தபோது, மூலக்கொத்தளம் பகுதியில் ஆய்வு மேற்கொள்ள வந்த தமிழ்நாடு முதலமைச்சர் ஜோசப் விஜய் அவர்கள் செல்லும் பாதையில், திமுகவின் இருவண்ணக் கொடியை ஏந்திச் சென்ற செந்தில்குமாருக்கும் தமிழக வெற்றிக் கழகத்தினருக்கும் இடையே வாக்குவாதம் ஏற்பட்டதாகக் கூறப்படுகிறது.

இதையடுத்து, அங்கு பாதுகாப்புப் பணியில் ஈடுபட்டிருந்த காவல்துறையினர் தலையிட்டு, செந்தில்குமாரைக் காவல்துறை ஜீப்பில் அழைத்துச் சென்றபோது, அந்த ஜீப் எதிர்பாராதவிதமாக விபத்துக்குள்ளாகிக் கவிழ்ந்ததாகத் தெரிவிக்கப்படுகிறது.

இந்த விபத்தில் செந்தில்குமாருக்குத் தோள்பட்டையில் எலும்பு முறிவு ஏற்பட்டு ராஜீவ் காந்தி பொது மருத்துவமனையில் அனுமதிக்கப்பட்டு சிகிச்சை பெற்று வருகிறார்.

இச்சம்பவம் குறித்து தகவலறிந்த சென்னை கிழக்கு மாவட்டக் கழகச் செயலாளரும் முன்னாள் அமைச்சருமான பி.கே. சேகர்பாபு எம்.எல்.ஏ., உடனடியாக மருத்துவமனைக்கு விரைந்து சென்று, சிகிச்சை பெற்று வரும் செந்தில்குமாரை நேரில் சந்தித்து நலம் விசாரித்தார். மேலும், அவருக்கு அளிக்கப்பட்டு வரும் சிகிச்சை குறித்தும் கேட்டறிந்தார்.

அப்போது சென்னை மாநகராட்சி மேயர் பிரியா ராஜன், கே.எஸ். ரவிச்சந்திரன், தமிழன் பிரசன்னா, தலைமைச் செயற்குழு உறுப்பினர் சி. மகேஷ்குமார், பொதுக்குழு உறுப்பினர் சரிதா மகேஷ்குமார் ஆகியோர் உடனிருந்தனர்.