#Title

ஒரு யூனிட் மின்சாரம் ரூ.35க்கு கொள்முதல் செய்வதால் ரூ.1 லட்சம் கோடி நிதிச்சுமை! மின்வாரியத்துக்கு கடும் நிதி நெருக்கடி ஏற்படும்!

சென்னை।, அக். 16 –

தமிழகத்தில் கடந்த மே மாதம் த.வெ.க. ஆட்சி அமைத்ததில் இருந்து தமிழக மக்கள் மின்வெட்டை சந்தித்து வருகின்றனர். தொடர்ந்து மின் தேவையை சமாளிக்க தமிழக அரசு வெளிச்சந்தையில் இருந்து 4,500 மெகாவாட் மின்சாரம் கொள்முதல் செய்யத் திட்டமிட்டுள்ளதாக தகவல்கள் வெளியாகி யுள்ளன. ஒரு யூனிட் மின்சாரத்துக்கு ரூ.31.99 முதல் ரூ.37 வரை விலை குறிப்பிடப்பட்டுள்ளதாகவும் வெளியாகியுள்ள தகவல்கள் சர்ச்சையை ஏற்படுத்தியுள்ளன. சராசரியாக யூனிட்டுக்கு ரூ.35க்கு அதிக விலையில் மின்சாரம் வாங்குவதால் ஆண்டுக்கு ரூ.1 லட்சம் கோடி வரை நிதிச்சுமை ஏற்படும் என்ற தகவல்கள் வெளியாகியுள்ள நிலையில், திட்டமிட்டே அதிக விலையில் மின்சாரம் கொள்முதல் செய்ய தமிழக அரசு முயற்சி செய்கிறதா என்ற சந்தேகமும் மக்கள் மத்தியில் பெரும் விமர்சனத்தை ஏற்படுத்தியுள்ளது.

தமிழகத்தில் கடந்த ஏப்ரல் மாதம் வரை சீரான மின்விநியோகம் இருந்த தாகக் கூறப்படும் நிலையில், மே மாதம் முதல் பல்வேறு பகுதிகளில் மின்தடை ஏற்படுவதாக புகார்கள் எழுந்துள்ளன. இதனால், வீடுகளில் அன்றாட பணிகள் பாதிக்கப்படுவதுடன் சிறு கடைகள், உணவகங்கள், பட்டறைகள் மற்றும் தொழில் நிறுவனங்களும் பாதிப்பைச் சந்திக்கின்றன. பல நகரங்களில் மறியல் போராட்டங்கள் நடந்தன. கிராமங்களில் குறைந்தழுத்த மின் விநியோகத்தால் மோட்டார்கள் பழுதடைந்தன. இதனால் விவசாயம் பெரிய அளவில் பாதிக்கப்பட்டது. இத்தகைய சூழலில், மின் தட்டுப்பாட்டுக்கான காரணம் என்ன, தேவையான மின்சாரத்தை முன்கூட்டியே திட்டமிட்டு கொள்முதல் செய்ய ஏன் நடவடிக்கை எடுக்கப்படவில்லை என்ற கேள்விகள் எழுந்துள்ளன.

தற்போது 4,500 மெகாவாட் மின்சாரம் கொள்முதல் செய்வது தொடர்பான தகவல்கள் வெளியாகியுள்ள நிலையில், அக்டோபர் மாத தேவைக்காக 3,000 மெகாவாட் மின்சாரம் வாங்க நடவடிக்கை எடுக்கப்பட்டதாகவும், 2027ம் ஆண்டு கோடைகால தேவைக்காக 2,000 முதல் 3,200 மெகாவாட் வரை கொள்முதல் செய்யத் திட்டமிடப்பட்டுள்ள தாகவும் கூறப்படுகிறது. இந்த திட்டங்கள் தனித்தனி டெண்டர்களா அல்லது ஒரே கொள்முதல் திட்டத்தின் வெவ்வேறு கட்டங்களா என்பது குறித்து தெளிவான விவரங்கள் மின்வாரியம் சார்பில் வெளியிடப்படவில்லை. எந்த நிறுவனங்களிடம் இருந்து மின்சாரம் வாங்கப்படுகிறது, ஒவ்வொரு நிறுவனத்துக்கும் நிர்ண யிக்கப்பட்ட விலை என்ன, ஒப்பந்த காலம் எவ்வளவு, மொத்தச் செலவு எவ்வளவு என்பன போன்ற விவரங்களை அரசு வெளியிட வேண்டும் என சமூக ஆர்வலர்கள் வலியுறுத்துகின்றனர்.

4500 மெகாவாட் மின்சாரத்தை ரூ.37க்கு கொள்ளுதல் செய்தால், ஆண்டுக்கு ஒரு லட்சம் கோடி நிதிச்சுமை ஏற்படும் என்று கூறப்படுகிறது. முந்தைய ஆட்சியில் மேற்கொள்ளப்பட்ட மின்சார கொள்முதல் ஒப்பந்தங்கள் இன்னும் நடைமுறையில் உள்ளனவா, அவற்றின் காலக்கெடு எப்போது முடிவடை கிறது, அவை ரத்து செய்யப்பட்டிருந்தால் அதற்கான காரணம் என்ன, புதிய டெண்டர் அறிவிக்கப்பட்டுள்ளதா என்பதை மின்துறை அமைச்சர் வெளிப்படையாக தெரிவிக்க வேண்டும் என்ற கோரிக்கையும் எழுந்து வருகிறது. மின்வாரியத்தின் செலவுகள் அதிகரித்தால், அரசுக்கு கூடுதல் நிதிச்சுமை ஏற்படலாம் அல்லது மின்வாரியத்தின் கடன் சுமை உயரக்கூடும். இதன் தாக்கம் தொழில் நிறுவனங்களின் உற்பத்திச் செலவு மற்றும் பொதுமக்களின் வாழ்க்கைச் செலவிலும் எதிரொலிக்க வாய்ப்புள்ளது.

இதனால், மின்சார கொள்முதலில் வெளிப்படைத்தன்மையை உறுதி செய்வதுடன், குறைந்த விலையில் மின்சாரம் பெறுவதற்கான வழிகளையும் அரசு ஆராய வேண்டும் என்ற எதிர்பார்ப்பு அதிகரித்துள்ளது. தொடர்ந்து மின்துறை தொடர்பாக பல்வேறு கேள்விகள் எழுந்து வரும் நிலையில், முதல்வர் விஜய் தலைமையிலான தமிழக அரசு இந்த விவகாரத்தில் என்ன நடவடிக்கை எடுக்கப்போகிறது என்ற எதிர்பார்ப்பு நிலவுகிறது. மின்தட்டுப்பாட்டால் மக்கள் அவதிப்படும் நிலையில், அதிக விலைக்கு மின்சாரம் வாங்க வேண்டிய அவசியம் என்ன, கடந்த ஆட்சியின் டெண்டர்கள் என்னவாயின, திட்டமிட்டே அதிக விலையில் மின்சாரம் கொள்முதல் செய்ய தமிழக அரசு முடிவு செய்துள்ளதா என்ற கேள்விகளுக்கு அரசு அளிக்கும் விளக்கத்தை மக்கள் எதிர்பார்த்துள்ளனர்.

மின்தேவையை கணிக்க தவறியதால் அதிக விலைக்கு மின்சாரம் வாங்கும் நிலை

தமிழகத்தில் மின்சாரத் தேவை குறையும் என கணித்து, மின்வாரியம் தாமதமாக ஒப்பந்த புள்ளிகளைக் கோரியதால் அதிக விலைக்கு மின்சாரம் வாங்கும் நிலை ஏற்பட்டுள்ளது. ஆந்திரபிரதேசம் இதே காலகட்டத்திற்காக 150 மெகாவாட் மின்சாரத்தை யூனிட்டுக்கு ரூ.16 முதல் ரூ.20 வரை விலையில் வாங்க ஒப்பந்தம் செய்துள்ளது. அக்டோபர் மாத மின்தேவைக்கான ஒப்பந்தத்தை செப்டம்பர்9ம் தேதியே இறுதி செய்த நிலையில், தமிழக மின்வாரியம் அக்டோபர் 12 முதல் 31ம் தேதி வரையிலான தேவைக்காக ஒரு வாரத்திற்கு முன்புதான் ஒப்பந்தப புள்ளிகளைக் கோரி உள்ளது.

மாத வாரியாக பட்டியல்!

மே முதல் அக்டோபர் வரை மின்வாரியம் வெளியிட்ட மொத்த டெண்டர்களின் எண்ணிக்கை, மின்சார கொள்முதல் விலை, அதனால் ஏற்படும் செலவு குறித்த முழுமையான மாத வாரியாக பட்டியலை அரசு வெளிப்படையாக வெளியிட வேண்டும். மின்சார கொள்முதல் டெண்டர்களையும், மின்மாற்றிகள் மற்றும் பராமரிப்புப் பணிகளுக்கான டெண்டர்களையும் தனித்தனியாக வெளியிட வேண்டும் என்ற கோரிக்கை எழுந்துள்ளது.