#Title

ரூ.2,000 முதல் ரூ.2,500 வரை கட்டணம் செலுத்தி வந்தவர்களுக்கு ரூ.20 ஆயிரத்திற்கு மேல் கட்டணம்! சேலத்தில் மின் அலுவலகம் முற்றுகை – பொதுமக்கள் திரண்டு சரமாரி புகார்!

சேலம், அக். 16 –

சேலம் அஸ்தம்பட்டி பகுதியில் வசிப்போருக்கு ரூ.20 ஆயிரத்திற்கு மேல் மின் கட்டணம் வந்ததால், உதவி பொறியாளர் அலுவலகத்தை பொதுமக்கள் முற்றுகையிட்டனர். தமிழ்நாடு மின்சார வாரியம் சார்பில் வீடு களுக்கு பயன்படுத்தப்படும் மின்சாரத்திற்கு 2 மாதங்களுக்கு ஒரு முறை, மின்மீட்டரை கணக்கீட்டு மின் கட்டணம் நிர்ண யித்து வசூலிக்கின்றனர். த.வெ.க. ஆட்சிக்கு வந்த பின் கடந்த 4 மாதமாக பெரும்பாலான மின் வாடிக்கையாளர்களுக்கு மின் கட்டணம் பன்மடங்கு அதிகமாக வசூலிக்கப்படுகிறது.

இக்கட்டண அதிகரிப்பு தொடர்பாக மாநிலம் முழுவதும் தொடர் புகார்கள் எழுந்துள்ளது. இந்தவகையில், சேலம் அஸ்தம்பட்டி பகுதியில் உள்ள வீடுகளில் கடந்த சில நாட்களுக்கு முன் மின் கணக்கீட்டு பணி நடந்தது. அதில்,பலரது வீட்டிற்கு மின் கட்டணமாக ரூ.10 ஆயிரம்முதல் ரூ.20 வரையில் வந்துள்ளது.இதனை பார்த்து மக்கள் கடும் அதிர்ச்சியடைந்தனர். நேற்று முன்தினம், 50க்கும் மேற்பட்டோர் அஸ்தம்பட்டி மின்வாரிய உதவி பொறியாளர் அலுவலகத்தை முற்றுகையிட்டனர்.

அப்போது பொதுமக்கள் கூறுகையில், ‘‘நாங்கள் இதுவரை அதிகப்பட்சமாக ரூ.2,000 முதல்ரூ.2,500 வரை மின் கட்டணம் செலுத்தி வந்தோம். ஆனால் தற்போது ரூ.10,000, ரூ.15,000, ரூ.20,000 கட்ட வேண்டும் என கணக்கிட்டுள்ளனர். 100 யூனிட் இலவச மின்சாரம் வழங்கி வந்தநிலையில், தற்போது த.வெ.க. ஆட்சிக்கு வந்ததும் 200 யூனிட்இலவச மின்சாரம் என்றனர். ஆனால், கட்டணம் மட்டும் அப்போது வந்ததை விட பன்மடங்கு அதிகமாக வந்திருக்கிறது. இது மிகப்பெரிய மோசடியாகும்.

மின்வாரிய அதிகாரிகள் தவறாக கணக்கீடு செய்து, அதிக கட்டணம் விதிக்கின்றனர். பயன்படுத்தாத மின்சாரத்திற்கு பணம் வசூலிக்கின்றனர்,’’ என்றனர். முற்றுகையில் ஈடுபட்டவர்களிடம் உதவி பொறியாளர் மஞ்சு பிரியதர்ஷினி பேச்சுவார்த்தை நடத்தினார். அப்போது அவரிடம், தங்கள் வீடுகளுக்கு இதுநாள் வரையில் இவ்வளவு கட்டணம் வந்ததே கிடையாது. ஏன் இப்படி ரூ.20ஆயிரத்திற்கு மேல் கட்டணம் வருகிறது, எனக் கேள்வி எழுப்பினர்.

இதையடுத்து வீடுகள் தோறும் கணக்கீடு செய்யும் ரீடிங் மேன் கன்னியப்பன் மற்றும் ரிவென்யூ சூப்பர்வைசர் கீதா ஆகியோர் மீது நடவடிக்கை எடுப்பதாகவும், கூடுதல் மின் கட்டணம் குறித்து விசாரணை நடத்தப்படும் என்றும் உதவி பொறியாளர் தெரிவித்தார். தொடர்ந்து அனைவரிடமும் புகார் மனுக்களை பெற்றுக்கொண்டார். தவறாக கணக்கிட்டுள்ள மின் கட்டணத்தை குறைக்காவிட்டால், கட்டணம் செலுத்தமாட்டோம் என பொதுமக்கள் கூறிவிட்டு, அங்கிருந்து கலைந்துச் சென்றனர்.