திருப்பூர், அக்.18–
பள்ளிக்கல்வித்துறை மற்றும் விளையாட்டு மேம்பாட்டுத்துறை சார்பில் வழக்கமாக நடத்தப்படும் போட்டிகளை முறையாக நடத்துவதற்கு முன்பாகவே,ம் விளையாட்டு வீரர்களை ஊக்கப்படுத்த ரூ.5 கோடி பரிசு என அறிவித்து முதலமைச்சர் கோப்பை விளையாட்டு போட்டிகளை இடைச்செருகல் செய்து அரசியலுக்காக அவசரக்கதியில் நடத்தும் நிலை மாற வேண்டும். போட்டிகள் நடந்த மைதானமும் இல்லை, ஆசிரியரும் இல்லை, கட்டமைப்பில் பெரும் சவால்கள் உள்ளன.
தமிழ்நாட்டில் இளைஞர்கள் மாணவர்கள் இடையே விளையாட்டு திறனை ஊக்கப்படுத்தும் வகையில் அடுத்தடுத்து பல அதிரடி அறிவிப்புகளை தமிழ்நாடு அரசு வெளியிட்டு வந்தாலும் தற்போதைய சூழலில் அதற்கான போதிய அடிப்படை கட்டமைப்புகள் இல்லாததே மிகப்பெரிய சவாலாக உள்ளதாக உடற்கல்வி ஆசிரியர்கள் வேதனை தெரிவிக்கின்றனர்.
தமிழ்நாட்டில் உள்ள பள்ளிகளில் பயிலும் மாணவர்கள் மற்றும் விளையாட்டு வீரர்கள் இடையே விளையாட்டு ஆர்வத்தை ஊக்கப்படுத்தவும். அவர்களின் திறமைகளை வெளிக்கொணரவும் அரசு பல்வேறு முன் முயற்சிகளை மேற்கொண்டு வருகிறது. குறிப்பாக, பள்ளிகளில் வாரத்தின் ஐந்து நாட்களும் உடற்கல்விக்கு ஒரு பாடவேளை ஒதுக்கப்படும் என்ற அறிவிப்பும், ஒலிம்பிக் உள்ளிட்ட சர்வதேச அளவிலான போட்டிகளில் வெற்றி பெற்று திரும்பும் வீரர்களுக்கு ஐந்து கோடி ரூபாய் வரை பரிசுத்தொகை வழங்கப்படும் என்ற அறிவிப்பும் கிராமப்புற மற்றும் ஏழை, எளிய மாணவர்களின் விளையாட்டுக் கனவுகளுக்கு மிகப்பெரிய நம்பிக்கையை அளித்துள்ளன. ஆனால், களத்தில் உள்ள குறைபாடுகளை சரி செய்யாமல் அரசு இத்தகைய அறிவிப்புகளை வெளியிடுவது வெறும் கவர்ச்சி கரமானதாக இருக்குமே தவிர, நடைமுறையில் பலனளிக்காது எனப்பலரும் தெரிவிக்கின்றனர்.
திருப்பூர் மாவட்டம் மட்டுமன்றி தமிழ்நாடு முழுவதும் ஏராளமான அரசு பள்ளிகளில் பயிற்சி மேற்கொள்வதற்கான மைதான வசதிகளே இல்லாத நிலை நீடிக்கிறது. ஏற்கெனவே வாரத்திற்கு இரண்டு நாட்கள் உடற்கல்வி பாடவேளை இருந்த போதே, போதிய மைதான வசதியும், ஆசிரியர்களும் இல்லாத சூழலே நிலவியது. வாரத்திற்கு மூன்று நாட்கள் மட்டுமே பகுதி நேர உடற்கல்வி ஆசிரியர்கள் பணியாற்றி வரும் நிலையில், தற்போது வாரத்தின் ஐந்து நாட்களும் உடற்கல்வி பாடவேளை கொண்டுவரப்பட்டால் மாணவர்களுக்கு யார் பயிற்சி அளிப்பார்கள் என்ற கேள்வியும் எழுந்துள்ளது.
அதேபோல் கழகத் தலைவர், எந்நாளும் எங்கள் முதலமைச்சர் முத்துவேல் கருணாநிதி ஸ்டாலின் அவர்களின் தலைமையிலான கடந்த திராவிட மாடல் ஆட்சியின் போது கழக இளைஞர் அணி செயலாளர், அன்றைய விளையாட்டு மேம்பாட்டு துறை அமைச்சர், இன்றைய தமிழ்நாடு சட்டமன்ற எதிர்க்கட்சித் தலைவர் உதயநிதி ஸ்டாலின் அவர்களால் ஒவ்வொரு தொகுதியிலும் ஒரு மினி விளையாட்டு அரங்கம் அமைப்பதற்கான முயற்சிகள் முன்னெடுக்கப் பட்ட நிலையில், தற்போது பல்வேறு பகுதிகளிலும் புதிதாகப் பொறுப்பேற்ற தவெக அரசால் கால்ப்புணர்ச்சியின் காரணமாக அந்தத் திட்டங்கள் நிறுத்தி வைக்கப்பட்டுள்ளன. இதனால் பள்ளி மாணவ, மாணவிகள் மட்டுமன்றி விளையாட்டு ஆர்வலர்களும் முறையான பயிற்சி பெறமுடியாத சூழல் உருவாகியுள்ளது. இதன் காரணமாகவே அரசின் இந்த அறிவிப்புகள் அமலாவதும் அதன் மூலம் விளையாட்டுத்துறை வளர்ச்சியடையும் என்பதும் சந்தேகத் திற்குரியதாக இருப்பதாக விளையாட்டு ஆர்வலர்கள் தெரிவிக்கின்றனர்.
இதுகுறித்து திருப்பூரை சேர்ந்த உடற்கல்வி ஆசிரியர் கூறுகையில், பள்ளிக் கல்வித்துறை மற்றும் விளையாட்டுத்துறை சார்பிலான அறிவிப்புகள் வரவேற்க கூடியவை தான். ஆனால், அதற்கான கட்டமைப்பையும் முதலில் உருவாக்க வேண்டும். தொடக்க மற்றும் நடுநிலைப் பள்ளிகளிலும் உடற்கல்வி ஆசிரியர் பணியிடங்களை உடனடியாக உருவாக்க வேண்டும். உடற்கல்விப் பாடத்தைக் கட்டாயமாக்கி, ஆறாவது பாடமாகச் சேர்ப்பதோடு, அதற்குரிய பாடநூல்களையும் மாணவர்களுக்கு வழங்க வேண்டும். மேலும், அரசு பள்ளிகளில் குறைந்தபட்ச பயிற்சிகளுக்கான விளையாட்டு மைதானங்களை அமைத்துத் தருவது அவசியமாகும். விளையாட்டுப் போட்டிகள் நடத்துவதற்கான செல்வினத் தொகையை உயர்த்திக் கொடுப்பதோடு, போட்டிகளுக்கான கால அட்டவணையைச் சரியாகத் திட்டமிட்டு அமைக்க வேண்டும். மாதாந்திர விளையாட்டுப் போட்டிகளை அந்தந்தக் குறுவட்ட அளவிலும், மாவட்ட அளவிலும் தொடர்ச்சியாக நடத்த வேண்டும். அதை விட்டுவிட்டு பள்ளிக்கல்வித்துறை மற்றும் விளையாட்டு மேம்பாட்டுத்துறை சார்பில் வழக்கமாக நடத்தப்படும் போட்டிகளை முறையாக நடத்துவதற்கு முன்பாகவே, முதலமைச்சர் கோப்பை விளையாட்டு போட்டிகளை இடைச்சொருகல் செய்து அரசியலுக்காக அவசரக்கதியில் நடத்தும் நிலை மாற வேண்டும்.
கள அளவிலான இத்தகைய அடிப்படை மாற்றங்களைச் செய்யாதவரை, அரசின் கனவு ஒலிம்பிக் திட்டம் வெறும் கனவாக மட்டுமே எஞ்சியிருக்கும். அரசின் உயரிய இலக்குகள் வெற்றிபெற வேண்டுமானால், கிராமப்புற மற்றும் நகர்ப்புற பள்ளிகளில் அடிமட்ட அளவில் விளையாட்டுக்கான கட்டமைப்பு வசதிகள் உடனடியாக மேம்படுத்தப்பட வேண்டும். போதிய உடற்கல்வி ஆசிரியர்களின் நியமனமும் உறுதி செய்யப்பட்டால் மட்டுமே அரசின் அறிவிப்புகள் களத்தில் முழுவதுமாய் செயல்பாட்டுக்கு வருவதோடு, தமிழ்நாடு மற்ற மாநிலங்களுக்கு முன்மாதிரியாக திகழும் என்கிறார்.