சென்னை, அக்.19–
முதல்வர் விஜய்யின் ‘ரோடு ஷோ’ காரணமாக போக்குவரத்து, தொழில்கள் முடங்கி, அரசுக்கு தேவையற்ற செலவு ஏற்படுவதாக சமூக ஆர்வலர்கள் குற்றஞ்சாட்டுகின்றனர்.
முதல்வராக பொறுப்பேற்றது முதல், அவ்வப்போது மாவட்ட வாரியாக, விஜய் சுற்றுப்பயணம் செய்து, அரசு நிகழ்ச்சிகளில் பங்கேற்று வருகிறார்.
கர்நாடகா, ஆந்திரா என, அண்டை மாநிலங்களுக்கும் சென்று வருகிறார். பெரும்பாலும் தனி விமானத்தில் சென்றாலும், விமான நிலையத்தில் இருந்து விழா நடக்கும் இடத்திற்கு சாலை மார்க்கமாக செல்கிறார்.
தனது பிரச்சார வாகனத்தின் மேல் நின்றபடி, ‘ரோடு ஷோ’ வாயிலாக மக்களை சந்தித்தபடியே கையசைத்து செல்கிறார். அதைக் கட்சி நிர்வாகிகள், தொண்டர்கள், ஆதரவாளர்கள் விரும்புகின்றனர்.
போக்குவரத்து
நிறுத்தம்!
ஆனால், இந்த நிகழ்ச்சிக்கு ஒரு நாளுக்கு முன்பாக, அந்த பகுதியை தங்களது கட்டுப்பாட்டில், போலீசார் கொண்டு வருகின்றனர். முதல்வர் செல்லும் போது இடையூறு ஏற்படாமல் இருப்பதற்காக, சாலைகளில் போக்குவரத்தும் நிறுத்தப்படுகிறது.
முன்னாள் முதல்வர்கள் கலைஞர், மு.க.ஸ்டாலின், ஜெயலலிதா, பழனிசாமி, உள்ளிட்டோர் சாலைகளில் நிகழ்ச்சிகளுக்கு செல்லும் போது, சிறிது நேரமே போக்குவரத்து நிறுத்தப் படும்.
ஆனால், முதல்வர் விஜய் செல்லும் போது, குறைந்தபட்சம் மூன்று முதல் ஆறு மணி நேரம் வரை போக்குவரத்து நிறுத்தப்படுகிறது. அந்த பகுதிகளில் கடைகளையும் அடைக்கும்படி போலீசார் அறிவுறுத்துகின்றனர்.
இதனால், அன்றைய தினம் போக்குவரத்து மட்டுமின்றி, தொழில்களும் முடங்குகின்றன. சிறுதொழில் நிறுவனங்கள், கடைகளில் வேலை பார்ப்பவர்களுக்கு அன்றைய நாளுக்கான ஊதியம் பாதிக்கப்படுகிறது.
தடுப்பு வேலிகள்
ரூ.5 கோடி செலவு!
முதல்வர் பாதுகாப்பிற்காக விமான நிலையம் துவங்கி, அவர் செல்லும் வழிகளில் எல்லாம், இரண்டு புறங்களிலும் இரண்டு தடுப்புகள் வைக்கப்படுகின்றன.
இதற்கு குறைந்தபட்சம் ஐந்து கோடி ரூபாய் வரை செலவிடப்படுகிறது. கடும் நிதி நெருக்கடியில் அரசு சிக்கியுள்ள நிலையில், தேவையற்ற செலவும் ஏற்படுகிறது.
அவதிக்குள்ளாகும்
போலீசார்!
முதல்வரின் சாலை வலம் நிகழ்ச்சியால், பல்வேறு பாதிப்புகள் ஏற்பட்டு வருகின்றன. பாதுகாப்பு பணியில் ஈடுபடும் ஆண், பெண் போலீசாரும் அவதிக்குள்ளாகி வருகின்றனர்.