சென்னை, அக்.20–
கழகத் தலைவர் அவர்களின் அறிவுறுத்தலின்படி, சட்டமன்றத் தேர்தலுக்குப் பிறகு கழக அமைப்பை வலுப்படுத்தி, சீரமைப்பு களை மேற்கொள்ளும் வகையில், துறைமுகம், கொளத்தூர், எழும்பூர், வில்லிவாக்கம், திரு.வி.க. நகர் ஆகிய சட்டமன்றத் தொகுதிகளைத் தொடர்ந்து, இறுதியாக நேற்று (19.10.2026) சென்னை கிழக்கு மாவட்டக் கழகத்திற்கு உட்பட்ட அம்பத்தூர் சட்டமன்றத் தொகுதி நிர்வாகிகளுடன் நடைபெற்ற ஆலோசனைக் கூட்டத்தில் சென்னை கிழக்கு மாவட்ட கழகச் செயலாளர் பி.கே.சேகர்பாபு ஆலோசனை வழங்கினார்.
இக்கூட்டத்தில் பகுதிக் கழகச் செயலாளர்கள் ஜோசப் சாமுவேல், டி.எஸ்.பி. ராஜகோபால், எம்.டி.ஆர்.நாகராஜ், பி.கே.மூர்த்தி மற்றும் பொதுக்குழு உறுப்பினர்கள், பகுதி மற்றும் வட்டக் கழகச் செயலாளர்கள், மாவட்ட நிர்வாகிகள், மாமன்ற உறுப்பினர்கள், பகுதி கழக நிர்வாகிகள், மாவட்ட அணிகளின் அமைப்பாளர்கள் உள்ளிட்டோர் பங்கேற்றனர்.
இக்கூட்டத்தின் முடிவில் செய்தியாளர்களை சந்தித்த பி.கே.சேகர் பாபு அளித்த பேட்டி வருமாறு:–
திராவிட முன்னேற்றக் கழகத் தலைவர் அவர்கள், தேர்தலுக்குப் பிறகு கட்சியை அமைப்பு ரீதியாகச் சீராய்வு செய்து, சட்டமன்றத் தொகுதிகள்தோறும் சீரமைப்புப் பணிகள் நடைபெறும் என்றார். அது கிட்டத்தட்ட இறுதிக்கட்டத்தை எட்டியிருக்கிறது.
இன்றைக்கு அம்பத்தூர் சட்டமன்றத் தொகுதியில் பகுதிக் கழகச் செயலாளர்கள் ஜோசப் சாமுவேல், அன்பிற்கினிய டி.எஸ்.பி. ராஜகோபால் மற்றும் நம்முடைய நாகராஜ், தலைமைச் செயற்குழு உறுப்பினர் பி.கே. மூர்த்தி ஆகியோரின் தலைமையில், வட்டச் செயலாளர்கள் மற்றும் ஏனைய நிர்வாகிகளுடன் கலந்தாலோ சித்து, தலைமைக் கழகத்தின் கட்டளைப்படி சீரமைப்புகளை மேற்கொள்வதற்காக ஆய்வுகளை மேற்கொ ண்டோம்.
கேள்வி:
எஸ்.ஐ.ஆர். விவகாரத்தில் தோற்றுவிட்டார்கள் என்று திருமாவள வன் அவர்கள் கருத்துத் தெரிவித்திருக்கிறார். முன்னாள் முதலமைச்சர் தோற்றுவிட்டார் என்றும் சொல்லியிருக்கிறார்.
ஆனால், இந்தக் குளறுபடிக்குக் காரணமே தி.மு.க. தான் என்று வைகோ அவர்கள் கருத்துத் தெரிவித்திருப்பதாகச் சொல்கிறார்களே?
பதில்:
இப்போது ஒரு கூட்டணி உருவாகியிருக்கிறது. அது குழம்பிய குட்டை. அதில் மீன்பிடிக்க முடியாது.
திருமாவளவன் அவர்கள் சொல்வதற்கெல்லாம் நான் பதில் சொல்ல விரும்ப வில்லை. அவர் மீது எனக்கு மரியாதை இருக்கிறது.
ஆனால், வைகோ அவர்கள் இந்தக் குளறுபடிக்குக் காரணமே திமுகதான் என்று சொல்லியிருக்கிறார்.
வைகோ அவர்கள் அரசியல் கட்சியைத் தொடங்கிய காலத்திலிருந்து அவருடைய கடந்த காலப் பேச்சுகளை எடுத்துப் பாருங்கள்.
ஒரு நிலையான கருத்து இல்லாமல், மாறி மாறிப் பேசுகின்றார். அப்படிப் பேசுகின்ற பேச்சு என்பது அவருடைய நிலைத்தடுமாற்றத் தையே வெளிப்படுத்தும்.
ஆனால், சிறந்த பேச்சாளர். ஏனோ அப்படி மாறி மாறிப் பேசுகிறார் என்பது அவருக்கு மட்டும்தான் தெரியும்.
கேள்வி:
இன்றைக்கு விலைவாசி உயர்வு மக்களை மிகவும் தொந்தரவு செய்து கொண்டிருக்கிறது. அரிசி விலைகூட 100 ரூபாய்க்கு மேல் உயர்ந்துவிட்டது.
இது சர்வதேசப் பிரச்சினை. இதற்கும் மாநில அரசுக்கும் சம்பந்தம் இல்லை என்பதைப் போல ஒரு கருத்தைச் சொல்லியிருக்கிறார்களே?
பதில்:
எந்தப் பிரச்சினை யாக இருந்தாலும் சரி, அது சர்வதேசப் பிரச்சினையாக இருந்தாலும் சரி, மாநிலத்தில் விலைவாசியைக் கட்டுப்பாட்டிற்குள் வைத்திருக்க வேண்டியது அந்த மாநில அரசினுடைய பொறுப்பு.
அந்தப் பொறுப்பிலிருந்து இந்த ஆட்சி விலகியிருக்கிறது என்பதனை உணர்ந்து, த.வெ.க. பக்கமிருந்த மக்கள் அதிலிருந்து விலகிச் செல்கின்ற ஒரு சூழல் உருவாகியிருக்கிறது.
இது இந்த ஆட்சியினுடைய நிர்வாகத் திறமை யின்மையைச் சுட்டிக்காட்டு கிறது.
கேள்வி:
சரி, இந்த ஆட்சி பொறுப்பேற்று ஐந்து மாதங்களுக்கு மேல் ஆகிவிட்டது.
இப்போதும் மழை பெய்தால், மழைநீர் தேங்குவதற்குத் திமுக அரசாங்கம்தான் காரணம் என்று சொல்லிக் கொண்டிருக்கிறார்களே?
பதில்:
எங்கே மழைநீர் தேங்கியது?
நாங்கள் ஏற்படுத்திய கட்டமைப்பால்தான் 17 சென்டிமீட்டருக்கு அதிகமாக மழை பெய்தபோதுகூட, ஒருசில பகுதிகளைத் தவிர, சென்னையில் பெரிய அளவில் நீர்த்தேக்கம் எங்கும் இல்லை.
இந்த ஆட்சிக்கும் நல்ல பெயர் வாங்குவதற்குக் காரணமாக இருந்தது திராவிட மாடல் ஆட்சிதான் என்பதைப் பெருமையோடு குறிப்பிட விரும்புகிறேன்.
திராவிட முன்னேற்றக் கழக ஆட்சி பொறுப்பேற்ற 2021ஆம் ஆண்டு, சென்னையில் 731 இடங்கள் தாழ்வான, மழைநீர் தேங்கும் பகுதிகளாகக் கண்டறியப்பட்டன.
அது தற்போது 231 ஆகக் குறைந்திருக்கிறது என்று சென்னை மாநகர ஆணையரே சொல்லிவிட்டார்.
திராவிட மாடல் ஆட்சியின் மக்கள் பணிகளுக்கு அவரே சான்றிதழ் தந்திருக்கின்றார்.
அப்படி 2021இல் 731 இடங்கள் தாழ்வான பகுதிகளாகக் கண்டறியப்பட்டதில், 500-க்கும் மேற்பட்ட தாழ்வான இடங்களில் மழைநீர் தேங்கும் பிரச்சினைக்குத் தீர்வு கண்ட பெருமை திராவிட முன்னேற்றக் கழக ஆட்சியைத்தான் சாரும்.
ஆகவே, இந்தத் தண்ணீர் தேங்காத நிலைக்குக் காரணம், மாண்புமிகு திராவிட மாடல் ஆட்சியினுடைய நாயகர், கழகத் தலைவர் முத்துவேல் கருணாநிதி ஸ்டாலின் அவர்களும், துணை முதலமைச்சர் அன்பிற்கினிய அண்ணன் உதயநிதி ஸ்டாலின் அவர்களும்தான்.
விண்ணிலே இருந்த மழைத்துளி மண்ணிற்கு வருவதற்கு முன்பாக, மண்ணிலே கால் பதித்து மக்களுடைய குறைகளைக் களைந்தவர் எங்களுடைய திராவிட மாடல் ஆட்சியினுடைய நாயகன் முத்துவேல் கருணாநிதி ஸ்டாலின் அவர்கள்.
எங்கள் தலைவர் மேம்போக்காக எந்த அரசியலும் செய்யாதவர். அடிமட்டம் வரை சென்று, இருக்கின்ற பிரச்சினைகளை உணர்ந்து, அவற்றுக்குத் தீர்வு கண்டதால்தான் இன்றைக்குச் சென்னை இந்த நிலையில் இருக்கிறது.
கேள்வி:
அமைச்சர் ரமேஷ் அவர்களிடம் கட்டணமில்லா தரிசனத்தைப் பற்றி நாங்கள் கேள்வி கேட்டபோது, ஆட்சிப் பொறுப்பேற்று மூன்று மாதங்கள்தான் ஆகின்றன. இவ்வளவு சீக்கிரத்தில் எல்லாவற்றையும் கட்டுப்படுத்த முடியாது. கொஞ்சம் கொஞ்சமாகத்தான் செய்வோம் என்று சொல்லியிருக்கிறார். அதுகுறித்த தங்களின் பார்வை என்ன?
பதில்:
எதுவுமே அவரால் செய்ய முடியவில்லை. கட்டணமில்லா தரிசனம் என்றார்கள். முடிந்ததா? ஆன்லைன் என்றார்கள். முடிந்ததா? செல்போன் வாங்கி வைப்பேன் என்றார். முடிந்ததா?
மதுரை மீனாட்சியம்மன் கோயில் கும்பாபிஷே கத்தைச் சர்ச்சை இல்லாமல் நடத்த முடிந்ததா?
இல்லை!
ஆனால், எங்கள் ஆட்சியில், எங்களுடைய திராவிட மாடல் ஆட்சியில், எங்கள் தலைவர் முத்துவேல் கருணாநிதி ஸ்டாலின் அவர்கள் கொண்டு வந்த திட்டங்க ளுக்குத்தான் அவர்கள் ஸ்டிக்கர் ஒட்டிக் கொண்டிருக்கிறார்கள். இப்பொழுது ரிப்பன் வெட்டிக் கொண்டிருக்கிறார்கள்.
நாங்கள் கொண்டு வந்த திட்டங்களைத் திறந்து வைத்துவிட்டு, ஏதோ இவர்கள் புதிதாகச் செய்ததைப் போலப் பேசிக் கொண்டிருக்கிறார்கள்.
ஆகவே, நான் நிச்சய மாகச் சொல்லுவேன். இன்னும் ஓராண்டு கழித்துப் பேசினால்கூட அவர்களுக்கு நிர்வாகத் திறன் போதாது.
நிர்வாகத் திறமையின் மையால் உருவாகியிருக்கக்கூடிய பிரச்சினைகளைச் சமாளிக்க முடியாமல் தவித்துக் கொண்டிருக்கிறது இந்த ஆட்சி.
ஆகவே, இப்படித்தான் இருக்கும்.
இவ்வாறு முன்னாள் அமைச்சர் பி.கே.சேகர்பாபு பேட்டியளித்தார்.