கன்னியாகுமரி, அக். 20–
இந்திய தூதரகம் மாலத்தீவில் சிக்கியுள்ள 26 மீனவர்களையும் 3 விசைப் படகுகளையும் எந்தவித அபராதமுமின்றி மீட்டுத்தர வேண்டும் என சர்வதேச மீனவர் வளர்ச்சி அறக்கட்டளை தலைவர் முனைவர் ப.ஜஸ்டின் ஆன்டணி கோரிக்கை வைத்துள்ளார்.
இது குறித்து அவர் விடுத்த அறிக்கை வருமாறு:–
ஆழ்கடலில் மீன்பிடிக்கச் சென்றபோது மாலத்தீவு படையால் சுற்றி வளைக்கப்பட்ட தூத்துக்குடி, ராமநாதபுரம், விழுப்புரம் மாவட்டங்களை சார்ந்த 26 மீனவர்களையும் 3 விசைப்படகுகளையும் மீட்கவும் இம்மீனவர்களை சந்தித்து தேவையான உதவிகளை செய்யவும் வேண்டி மாலத்தீவிலுள்ள இந்திய தூதரகம் சர்வதேச மீனவர் வளர்ச்சி அறக்கட்டளை தலைவர் ஜஸ்டின் ஆன்டணி வேண்டுகோள் வைத்தார்.
இவ்விவகாரத்தை பிரதமர், வெளிவிவகாரத்துறை அமைச்சர், தமிழக முதல்வர் உள்ளிட்டோருக்கும் தெரிவித்திருந்தார்.
“மீனவர்களையும் படகுகளையும் மீட்க துரித நடவடிக்கை எடுக்கப்படும்” என மாலத்தீவுக்கான இந்திய உயர் ஆணையர் ஜி.பாலசுப்ரமணியன், ஜஸ்டின் ஆன்டணிக்குப் பதிலளித்துள்ளார். மேலும், இந்திய உயர் ஆணைய அதிகாரிகள் அக். 17-ம் தேதி இம்மீனவர்களை சந்தித்ததாகவும், இவர்களது உணவு, மருத்துவ வசதிக்கான ஏற்பாடுகளை செய்துள்ளதாகவும் உயர் ஆணைய அதிகாரிகள் சர்வதேச மீனவர் வளர்ச்சி அறக்கட்டளைக்கு தெரிவித்துள்ளனர். இதற்கு மீனவர்கள் மற்றும் குடும்பத்தினர் சார்பில் சர்வதேச மீனவர் வளர்ச்சி அறக்கட்டளை நன்றி தெரிவித்துள்ளது.
அக்டோபர் 1, 2, 3 ஆகிய தேதிகளில் தூத்துக்குடி மாவட்டம் தருவைகுளம் மீன்பிடி இறங்கு தளத்திலிருந்து மீன்பிடிப்பிற்காகச் சென்றி ருந்த இம்மீனவர்கள், மாலத்தீவிலிருந்து சுமார் 180 கடல் மைல் தொலைவில் மீன் பிடித்துக் கொண்டிருந்த போது மாலத்தீவு நாட்டு
எல்லைக்குள் நுழைந்ததாக 26 தமிழக மீனவர்களையும் 3 விசைப்படகுகளையும் மாலத்தீவு படையினர் சிறைபிடித்து அவர்களது
கட்டுப்பாட்டில் வைத்துள்ளனர்.
இம்மீனவர்கள் வேண்டுமென்றே எல்லை தாண்டிச்சென்று தங்களுடைய வாழ்வாதாரத்திற்கு எதிரான ஒரு சூழ்நிலையை உருவாக்குபவர்கள் அல்ல. கடல் தொழில் மட்டுமே இவர்களது ஒரே வாழ்வாதாரமாகும். மீன்பிடிப்படகு கள் என்பவை இவர்களது உயிருக்கு நிகரான சொத்தாகும். மாலத்தீவு நாட்டிலுள்ள இந்திய தூதர கத்தின் கனிவான தலையீடு மட்டுமே, இம்மீனவர்களையும் படகுகளையும் எந்தவித அபராதமுமின்றி பாதுகாப்பாக மீட்டுக் கொண்டுவர முடியும் என ஜஸ்டின் ஆன்டணி தனது கோரிக்கையில் தெரிவித்திருந்தார்.
மாலத்தீவிலிருந்து ஜஸ்டின் ஆன்டணியிடம் பேசிய இம்மீனவர்களில் ஒருவர், மாலத்தீவிலுள்ள இந்திய தூதரகம் அதிகாரிகள் தங்களை வந்து சந்தித்து தேவைகளை கேட்டறிந்ததும், மருத்துவ வசதிக்கான ஏற்பாடுகளை செய்துள்ளதும் தங்களுக்கு மிக்க மகிழ்ச்சியையும் நம்பிக்கையையும் அளிப்பதாக தெரிவித்துள்ளார்.
இவ்வாறு அவர் தெரிவித்துள்ளார்.