சென்னை, அக். 20–
வடகிழக்கு பருவமழை துவங்கியுள்ளதை ஒட்டி, சென்னையில் நிலவும் வளிமண்டல மேலடுக்கு சுழற்சி காரணமாக வடசென்னை பல்வேறு பகுதிகளில் நேற்று முன்தினம் மாலை முதல் நேற்று விடியற்காலை வரை கனமழை பெய்ததால் திருவொற்றியூர், கார்கில் நகர், ராஜாஜி நகர், எர்ணாவூர், மணலி, ஆண்டார் குப்பம்-செங்குன்றம் சாலை, காமராஜ் சாலை, மாதவரம் ரவுண்டானா போன்ற இடங்களில் மழை நீர் தேங்கியதால் வாகனங்கள் செல்ல முடியாமல் போக்குவரத்து நெரிசல் ஏற்பட்டு வாகன ஓட்டிகள், பொதுமக்கள் கடும் சிரமப்பட்டனர்.
மேலும் கனமழை காரணமாக பொதுமக்கள் வீட்டில் முடங்கினர், அவசர தேவைக்காக வெளியே செல்ல முடியாமல் தாழ்வான தெருக்களில் மழைநீர் தேங்கியது. திருவொற்றியூர் அரசு மருத்துவமனை, பூந்தோட்ட பள்ளி வளாகம் உள்ளிட்ட பல்வேறு பகுதிகளில் மழைநீர் சூழ்ந்ததால் பொதுமக்களின் இயல்பு வாழ்க்கை பாதிக்கப்பட்டது. ஆனாலும் சென்னை மாநகராட்சி சார்பில் தாழ்வான இடங் களை கண்டறிந்து அங்கு ராட்சத மோட்டார்களை முன்னெச்சரிக்கை யாக பொருத்தி, மழைநீரை வெளியேற்றும் பணி நடைபெற்றதால் தேங்கிய மழைநீர் சில மணி நேரத்தில் கால்வாய்களில் சென்றது.
இதில் அதிகபட்சமாக கத்திவாக்கத்தில் 26.4 செ.மீ மற்றும் சாத்தாங்காட்டில் 22.2 செ.மீ அளவுக்கு மழை பெய்துள்ளதாக பதிவாகியுள்ளது. இதனிடையே கனமழை பெய்வதால் மழைநீர் தேங்காத வண்ணம் மீட்புப் பணிகளை மேற்கொள்ள வேண்டும் என்று மாநகராட்சி ஆணையர் சமீரன் மண்டல அதிகாரிகளுக்கு உத்தரவிட்டிருந்தார். இதன்படி அனைத்து மண்டலங்களிலும் அதிகாரிகள் நேற்று முன்தினம் மாலை வீட்டுக்கு செல்லாமல் பல்வேறு பகுதிகளுக்கு வாகனங்களில் சென்று கண்காணிப்பு பணியில் ஈடுபட்டனனர்.
தொடர்ந்து நேற்று காலை மழை சற்று ஓய்ந்ததால் சாலை மற்றும் தெருக்களில் தேங்கியிருந்த மழைநீர் வடிந்து கால்வாய்களில் சென்றது. அதன் பின்பும் தேங்கி இருந்த மழைநீரை மாநகராட்சி ஊழியர்கள் மழைநீரை அப்புறப்படுத்தும் பணியில் ஈடுபட்டனர்.
மேலும் கடல் சீற்றமாக காணப்பட்டதால் திருவொற்றியூர், எண்ணூர்பகுதிகளை சேர்ந்த மீனவர்கள் யாரும் மீன்பிடிக்க செல்லவில்லை. கடந்த மூன்று மாதமாக குடிநீர் மற்றும் பாதாள சாக்கடை திட்ட பணிகள் முடிவடையாமல் மந்தகதியில் நடப்பதால் மணலி, மாதவரம் போன்ற பகுதிகளில் பல சாலைகள், மற்றும் தெருக்கள் சேரும் சகதியமாக காணப்பட்டது.