விஜயவாடா, அக். 20 –
தேர்தல் ஆணையர் நியமன சட்டத்தை நிறைவேற்ற ஆதரவளித்தது தவறானது என்றும் அதற்கு இப்போது வருந்துவதாக ஆந்திர முன்னாள் முதலமைச்சர் ஜெகன் மோகன் ரெட்டி தெரிவித்துள்ளார்.
தேர்தல் ஆணையர்களை நியமிக்கும் தேர்வுக் குழுவில் உச்ச நீதிமன்ற நீதிபதிக்குப் பதிலாக ஒன்றிய அமைச்சரை நியமிக்கும் மசோதாவை ஒன்றிய அரசு கடந்த ஆண்டு 2023 ஆம் ஆண்டு நிறைவேற்றியது. இதற்கு ஒய்.எஸ்.ஆர். காங்கிரஸ் அப்போது ஆதரவு தெரிவித்தது. இந்த நிலையில் அந்த மசோதாவுக்கு ஆதரவளித்தது தவறானது என்றும் அதற்கு தற்போது வருந்துவதாக தற்போது ஒய்.எஸ்.ஆர். காங்கிரஸ் தலைவர் ஜெகன் மோகன் ரெட்டி தெரிவித்துள்ளார்.
அந்த சட்டத்தின் அடிப்படையில் தேர்தல் ஆணையரை நியமிக்கும் தற்போதைய நடைமுறை தேர்தல் ஆணையத்தின் கட்டமைப்பையே ஒருதலைப் பட்சமாக மாற்றியுள்ளதாக அவர் குற்றம் சாட்டியுள்ளார். இந்த சட்டத்தை மீண்டும் திருத்தம் செய்து, தேர்வுக் குழுவில் உச்ச நீதிமன்ற தலைமை நீதிபதியை சேர்க்க வேண்டும் என்று ஜெகன்மோகன் ரெட்டி வலியுறுத்தி உள்ளார்.
2020 முதல் பா.ஜ.க.வுக்கு நாடாளுமன்றத்தில் ஆதரவளித்துவரும் ஒய்.எஸ்.ஆர். காங்கிரஸ், தேர்தல் ஆணையர் விவகாரத்தில் ஒன்றிய அரசை கடுமையாக விமர்சித்துள்ளது குறிப்பிடத்தக்கது.