கா
ல் நூற்றாண்டு காலத்தில் இது போன்ற ஒரு நிலைமையை காவிரி டெல்டாவில் வாழும் தலைமுறை பார்த்ததேயில்லை. கடந்த 5 ஆண்டுகளில் சாதனை அளவிலான நெல் அறுவடையைக் கண்ட டெல்டா மாவட்டங்கள் இந்த ஆண்டு வானம் பார்த்த பூமி போல வறண்டு கிடக்கின்றன. வடகிழக்குப் பருவ மழை முறையாகவும், சரியாகவும் பெய்தால் மட்டுமே சம்பா மற்றும் தாளடி பருவ நெற்பயிர்கள் விளையும். குறுவைப் பயிர் ஏற்கனவே கைவிரித்துவிட்டது என்று வேதனையுடன் சொல்கிறார்கள் டெல்டா விவசாயிகள்.
ஆண்டுதோறும் ஜூன் 12ஆம் நாள் டெல்டாவின் குறுவை சாகுபடிக்காக மேட்டூர் அணையைத் திறப்பது வழக்கம். கடந்த 5 ஆண்டுகால திராவிட மாடல் ஆட்சியில், உரிய நேரத்தில் மேட்டூர் அணை திறக்கப்பட்டது. அதற்கு முன்பாகவே, ஆறுகளும் வாய்க்கால்களும் தூர்வாரப்பட்டதால், மேட்டூரிலிருந்து கல்லணைக்கு வரும் காவிரி நீர் தஞ்சை மாவட்டத்தில் தொடங்கி, டெல்டாவின் கடைமடைப் பகுதியான புதுச்சேரியின் காரைக்கால் மாவட்டம் வரை ஓடியது. வயல்வெளிகள் செழித்தன. மேட்டூர் அணைத் திறப்பு முதல் நெல் அறுவடை வரை ஒவ்வொன்றிலும் தனிக்கவனம் செலுத்தினார் டெல்டா மாவட்டத்துக்காரரான கழகத் தலைவர்-திராவிட நாயகர்.
அடுத்த பிறவியில் விவசாயியாகப் பிறக்க ஆசைப்படுகிறேன் என்று தஞ்சையில் தேர்தல் பிரச்சாரத்தில் உளறிய த.வெ.க தலைவர் விஜய் தலைமையில் ஆட்சி அமைந்தபிறகு, நீர்மேலாண்மை என்பதே சீரழிந்து கிடக்கிறது. ஜூன் மாதம் திறக்கப்பட வேண்டிய மேட்டூர் அணை ஜூலை, ஆகஸ்ட் என ஏறத்தாழ 80 நாட்கள் கடந்து செப்டம்பர் 1ஆம் நாள் திறக்கப்பட்டது. விஜய்யின் வருகைக்காக சாலையோரத் தடுப்புகள் மற்றும் அலங்காரங்களுக்காக 5 கோடி ரூபாய் அரசாங்கப் பணம் செலவழிக்கப்பட்டது. அணையைத் திறந்து வைத்த விஜய், வழியில் ஒரு கிராமத்தில் உள்ள குடிசைக் குள் புகுந்து, மூதாட்டி ஒருவருக்கு கூலிங்கிளாஸ் மாட்டிவிட்டார் என ஊடகங்கள் புளகாங்கிதம் அடைந்தன. எல்லாம் சரி! மேட்டூர் தண்ணீர் காவிரி டெல்டாவில் பாய்ந்ததா?
காவிரியிலும் கிளை ஆறுகளிலும் ஓடிவரும் தண்ணீர், வாய்க்கால்கள் வழியே வயலுக்குப் பாய்ந்தால்தான் விவசாயம் செய்ய முடியும். “விநாடிக்கு 20ஆயிரம் கனஅடி தண்ணீரை மேட்டூர் அணையிலிருந்து விடுவிச்சாதான் வாய்க்காலிலும் வயலிலும் தண்ணீர் வரும். ஆனால், 15ஆயிரம் கன அடிக்கும் குறைவாத்தான் திறக்குறாங்க. பாசன வாய்க்கால்களில் போதுமான அளவு தண்ணீரே இல்லீங்க. அப்புறம் எப்படி வயலுக்கு தண்ணி பாய்ச்ச முடியும்? எப்படி பயிர் பண்ண முடியும்?” எனக் கேட்கிறார்கள் திருவாரூர் மாவட்ட விவசாயிகள்.
ஜூன் முதல் ஆகஸ்ட் வரை அதிகளவில் பெய்யும் தென்மேற்கு பருவமழை இந்த ஆண்டு போதுமான அளவில் இல்லை என்பதால், கர்நாடக அணைகளில் தண்ணீர் இல்லை என்று அந்த மாநில அரசு கைவிரித்துவிட்டது. இதுபோன்ற தண்ணீர்த் தட்டுப்பாடு நிலவும் காலங்களில், முறைப்பாசனம் என்ற முறையில், ஆறுகளையும் பாசன வாய்க்கால்களையும் தேர்ந்தெடுத்து இரண்டு மூன்று நாட்கள் என்ற கால இடைவெளியில் சீராகத் தண்ணீர் பாய்வதற்கு அரசாங்கம் வழி செய்யும். அந்த நீர்மேலாண்மை என்பது த.வெ.க ஆட்சியில் சீரழிந்துவிட்டது.
காவிரியில் தமிழ்நாட்டின் உரிமைகளை நிலைநாட்டுவதிலும் த.வெ.க அரசுக்கு அக்கறையேயில்லை. விஜய் கர்நாடகாவுக்குப் போனார். கொல்லூர்
மூகாம்பிகை கோயிலில் வழிபட்டார். ஆனால், கர்நாடகத்தில் ஆட்சி செய்யும் தனது கூட்டணிக் கட்சியான காங்கிரஸ் அரசிடம் தமிழ்நாட்டின் உரிமை குறித்து வலியுறுத்தவில்லை. காவிரி மேலாண்மை வாரியம், காவிரி ஒழுங்காற்று ஆணையம், உச்சநீதிமன்றம் ஆகியவற்றிலும் தமிழ்நாட்டின் உரிமையை நிலைநாட்டிடும் வலிமை த.வெ.க அரசுக்கு இல்லை.
காவிரியில் தமிழ்நாட்டின் உரிமைக்காக அமைக்கப்பட்டதுதான் நடுவர் மன்றம். அதனை அமைப்பதில் முனைப்பாக இருந்தவர் முத்தமிழறிஞர் கலைஞர். தி.மு.க பங்கேற்றிருந்த தேசிய முன்னணி ஆட்சியில்தான் உச்சநீதிமன்ற உத்தரவுப்படி நடுவர் மன்றத்தை அமைத்தார் அப்போதைய பிரதமர் வி.பி.சிங் அவர்கள். நடுவர் மன்றம் இடைக்காலத் தீர்ப்பையும், இறுதித் தீர்ப்பையும் வழங்கியது. இறுதித் தீர்ப்பு வெளியானபோதும் கலைஞர்தான் முதலமைச்சராக இருந்தார். முழுமையான உரிமைக்காகத் தொடர்ந்து வழக்குகள் தொடுக்கப்பட்டதன் விளைவாகத்தான் காவிரியில் தமிழ்நாட்டின் உரிமை நிலைநாட்டப்பட்டது.
தமிழ்நாடு போராடிப் பெற்ற உரிமையை மாற்றம் செய்ய வேண்டும் என கர்நாடகம் அண்மையில் உச்சநீதிமன்றத்தில் தெரிவித்துள்ளது. சர்வதேச ஆற்று நீர் ஒப்பந்தங்களை காலச்சூழலுக்கேற்ப மறுபரிசீலனை செய்யும் வாய்ப்புள்ளதாகவும், 1960ஆம் ஆண்டு சிந்து நதி நீர்தொடர்பாக இந்தியாவுக்கும் பாகிஸ்தானுக்கும் இடையில்போடப்பட்ட ஒப்பந்தம், காஷ்மீரின் பெஹல்காமில் தீவிரவாதிகள் நடத்திய கொடூரத் தாக்குதலைத் தொடர்ந்து 2025ஆம் ஆண்டில் கைவிடப்பட்டது என்பதையும், இப்போது சிந்து நதி நீரை பாகிஸ்தானுக்கு இந்தியா தருவதில்லை என்றும் உச்சநீதிமன்றத்தில் சுட்டிக்காட்டி, “சூழ்நிலை மாற்றத்தைக் கருத்தில் கொண்டு காவிரி ஒப்பந்தத்தையும் மாற்றம் செய்ய வேண்டும்” என்று கர்நாடக அரசு வலியுறுத்தியுள்ளது.
தமிழ்நாட்டின் உயிர் ஆதாரமான காவிரி நீரில், கீழ் ஆயக்கட்டு மாநிலமான தமிழ்நாட்டிற்குக் கிடைக்க வேண்டிய உரிமையை மறுப்பதுடன், தமிழ்நாட்டை பாகிஸ்தானுடன் ஒப்பிட்டு வாதாடியிருக்கிறது கர்நாடக காங்கிரஸ் அரசு. தமிழ்நாட்டை ஆளும் விஜய் அரசு, காவிரியில் தமிழ்நாட்டின் உரிமையை நிலைநாட்டும் அக்கறையில்லாமலும், கர்நாடக காங்கிரஸ் அரசின் நிலைப்பாட்டைக் கண்டிக்காமலும் வாய் மூடிக் கிடக்கிறது. டெல்டா மாவட்டங்கள் வறண்டு, வானம் பார்த்துக் கிடக்கின்றன.
தண்ணீர் இல்லாத காரணத்தால், நேரடி நெல் விதைப்பு செய்யும் நிலைக்கு டெல்டா விவசாயிகள் தள்ளப்பட்டுள்ளனர். அதாவது, வழக்கமாக நாற்றங்காலில்தான் நெல் விதைப்பார்கள், ஒரு ஹெக்டேர் வயல் என்றால் அதில் ஏறத்தாழ 20 சென்ட் நிலம் நாற்றங்காலுக்குத் தேவைப்படும். நெல் ரகத்தைப் பொறுத்து, நாற்றுகள் வளரும். அதற்கேற்ப தண்ணீர் தேவைப்படும். நாற்றங்காலில் தண்ணீர் அதிகமாக இருக்க வேண்டிய நாட்களும் உண்டு. தண்ணீரைக் குறைக்க வேண்டிய நாட்களும் உண்டு. சரியான முறையில் நீர் மேலாண்மை இருந்தால்தான், நாற்றாங்காலில் நெல் விதைத்து, குறிப்பிட்ட நாட்களுக்குப் பிறகு, நாற்றுகளைப் பறித்து, வயலில் நட முடியும். அதன்பிறகே நெற்பயிர் வளர்ந்து, அறுவடைக்குத் தயாராகும்.
நேரடி நெல் விதைப்பு என்பது மிக மோசமான தண்ணீர்ப்பற்றாக்குறை காலத்தில் மட்டுமே டெல்டா மாவட்டங்களில் மேற்கொள்ளப்படும். 33 ஆண்டுகளுக்குப் பிறகு டெல்டா மிக மோசமான நிலைக்குத் தள்ளப்பட்டுள்ளது. 1993ஆம் ஆண்டு ஜெயலலிதாவின் ஆட்சி நடந்தபோது, ஜெ.ஜெ.92 என்ற நெல்ரகம் அறிமுகப்படுத்தப்பட்டது. ஜெயலலிதாவின் பெயரைக் குறிக்கும் வகையில் இந்தப்பெயர் வைக்கப்பட்டது. இந்த நெல்ரகம் நல்ல விளைச்சல்தரும் என்றும், அரிசி பொங்கினால் மல்லிகைப் பூ போல இருக்கும் என்றெல்லாம் அதிகாரிகள் சொன்னார்கள்.
“பேரு வச்சியே, சோறு வச்சியா?” என்பது போல நெல்ரகத்துக்கு ஜெ.ஜெ.92 என்று ஜெயலலிதாவின் பெயரை வைத்தது அப்போதைய அ.தி.மு.க. அரசு. ஆனால், பருவமழையும் இல்லை. அணையிலும் தண்ணீர் இல்லை. வயல்கள் காய்ந்து கிடந்ததால் நாற்று விட முடியவில்லை. நேரடியாக நெல் விதைக்கும் முறையை ஜெயலலிதா அரசாங்கம் வலியுறுத்தியது. டெல்டா மாவட்ட விவசாயிகள் வேறு வழியின்றி, நேரடி நெல் விதைப்பை மேற்கொள்ள வேண்டியதாயிற்று. விளைச்சல் சரியாக இல்லை. பயிர் எது? களை எது? என்று தெரியாத வகையில் புல்லும் களையும் நெல்லுடன் சேர்ந்து வளர்ந்தன. அறுவடையும் மோசமாக இருந்தது. அப்போதைய ஜெயலலிதா ஆட்சிக்குப் பிறகு, இப்போதைய விஜய் ஆட்சியில்தான் காவிரி டெல்டா விவசாயிகள் நேரடி நெல் விதைப்புக்குத் தள்ளப்பட்டுள்ளனர்.
வடகிழக்குப் பருவ மழை தொடங்கியுள்ள நிலையில், அதன் தாக்கம் எப்படி இருக்கும் என்பதும், எல்-நினோ எனும் பருவநிலை மாற்றத்தால் அதிகரிக்கும் வெப்பம் டெல்டா நெற்பயிரை என்ன செய்யும் என்றும் தெரியாமல் தவிக்கிறார்கள் விவசாயிகள். “பேஞ்சு கெடுக்கும். இல்லேன்னா காஞ்சு கெடுக்கும்” என்று டெல்டாகாரர்கள் சொல்வது வழக்கம். மழை அதிகமாகப் பெய்தால் 10 இலட்சம் ஏக்கரில் உள்ள குறுவைப் பயிர் மூழ்காமல் காப்பாற்றப் படவேண்டும். மழை போதுமான அளவில் பெய்யாவிட்டாலும் பாதிப்புதான். நேரடி நெல்விதைப்பு செய்யப்படும் சம்பா பயிர்கள் நிலை இன்னும் மோசம்.
இயற்கை கொடுத்தாலும், கெடுத்தாலும் அதை டெல்டா விவசாயிகள் எதிர்கொண்டு விடுவார்கள். வாழ்வோ சாவோ தங்கள் நிலத்தை விட்டுப் போக மாட்டார்கள். அரசாங்கம் கைக்கொடுக்கும் என்பதுதான் அவர்களின் கடைசி நம்பிக்கை. த.வெ.க. ஆட்சியில் அந்த நம்பிக்கையையும் இழந்து வருகிறார்கள்.
வறட்சி நிவாரணத்தை அரசு வழங்கினால் மட்டுமே விவசாயிகளால் இழப்பை ஓரளவேனும் எதிர்கொள்ள முடியும். த.வெ.க அரசோ, குறுவைப் பயிர் இழப்புக்கான காப்பீட்டுத் தொகையையே இன்னும் சரியாக வழங்காத நிலையில், சம்பா பயிரைக் காப்பாற்ற என்ன செய்வது என்று தெரியாமல் விவசாயிகள் தவிக்கிறார்கள்.
ஒரு காலத்தில் வானம் பார்த்த பூமியாக இருந்த மாவட்டங்களைச் சேர்ந்த மக்கள், காவிரி டெல்டாவுக்கு வந்து தங்கள் வாழ்க்கையை அமைத்துக் கொண்டார்கள். இப்போது, காவிரி டெல்டாவே வானம் பார்த்த பூமிபோல ஆகிவிட்டது. வயலில் தண்ணீர் இல்லாததால், உழவனின் கண்ணீர் பெருக்கெடுக்கிறது.